Manki i Helpim Papamama na Marit Bilong Ol i No Bruk

SAPOS man marit i slip wantaim narapela meri, na em i mekim wanpela taim tasol, na em i hevi tru long rong bilong em, yu ting meri tru bilong em i mas brukim marit? Wanpela meri marit i bin ting olsem, tasol pikinini bilong em i gat narapela tingting. Dispela pikinini man i gat 9-pela krismas tasol.

Man hia em i baptais pinis, na meri bilong em tu i dediket pinis. Man i slip wantaim narapela meri. Em namba wan taim em i bin mekim olsem. Kwiktaim ern i go kamapim long ol elda bilong kongrigesen. Ol i tokim em long i go na kamapim long meri bilong em na askim meri long em i ken sori long em na lusim tingting long dispela samting. Tasol meri i kros na em i laik pinisim marit bilong tupela. Meri i tokim ol elda long em i laik mekim olsem na em i toktok pinis long wanpela loya. Ol elda i tokim em, ating i no gutpela long katim marit, long wanem, ol i gat 3-pela liklik pikinini. Tasol meri i strong. Olsem na man i bel hevi tru. Em i no laik kaikai. Em i krai tasol i stap.

Namba wan pikinini, em manki hia, em i save long dispela hevi na i redim wanpela tok bilong givim long mama. Em i tingim sampela tok bilong Baibel em i bin harim long Haus Kingdom, na sampela tok bilong buk “Rot Bilong Kamapim Amamas Insait Long Famili.” Em i singautim mama i kam. Em i tok, em i bel hevi tru long dispela samting, na em i no laik bai famili i bruk. Na em i tok: “Mama, lukim dispela tok hia long Niemaia 9:17.” Mama i kaunim, na pikinini i tok: “Yu save? Jehova em i Man bilong sori na lusim tingting long rong man i mekim. Mama, olsem wanem? Yu no laik lusim tingting long rong bilong Papa?” Mama i tok: “Ating mi ken.”

Na pikinini i kolim tok bilong Efesas 5:22, 33 na em i tok, papa i bos bilong famili, olsem na mama i mas harim tok bilong papa. Na pikinini i kaunim Matyu 6:11, 12 na em i askim mama, olsem wanem long dispela tok “lusim ol rong”? Mama i bekim, na pikinini i tok: “Orait, yu mas lusim rong bilong Papa.” Na em i kamapim planti tok moa bilong Baibel, na nau em i askim mama: “Olsem wanem? Yu inap lusim tingting long rong bilong Papa?” Na tarangu, mama i tok: “Bai mi mekim.”

Nau dispela famili i stap wanbel gen. Meri i tok, em i amamas long stretim dispela hevi; em i lukim man i hevi long rong bilong em na em i laik stretim. Sampela man i bin traim long stretim dispela hevi na ol i no inap, tasol wanpela liklik manki i mekim na Baibel i helpim em. Tru tumas, “ol liklik pikinini i save litimapim nem bilong yu [Jehova].”—Sam 8:2, Baibel Pisin.