“Mirakel Bilong Etpela Mun” Long Peru
INAP 34,238 ol i bung na ol i amamas tru. Ol i kam long planti hap bilong Peru na long ol narapela narapela hap bilong graun na ol i bung long biktaun Lima bilong dediketim nupela brens-ofis bilong Sosaiti Was Taua. Taim ol i harim tok long bikpela wok ol brata i bin mekim insait long 8-pela mun tasol bilong sanapim dispela haus, ol i kirap nogut. I no gat narapela haus olsem long Peru em ol i bin sanapim kwik olsem.
Ol Samting Ol i Mekim Pastaim
Trupela lotu i wok long i go bikpela hariap long Peru, olsem na ol i mas wokim nupela brens-ofis i bikpela moa. Long 1980 ol i bin baim wanpela hap graun em i bikpela inap 1.8 hekte. Pastaim ol i wokim gaden long dispela hap graun, na ol brata i wok long brens-ofis ol i kisim kaikai long dispela gaden.
Tasol pe bilong plang samting bilong wokim haus i wok long i go antap, olsem na ol Witnes i tingting long baim sampela plang na kapa na brik samting na putim i stap. Ol i tingting tu long rot bilong kisim wara. Olsem na ol i kirap long wokim wanpela hul wara. Ol i digim graun long savol samting na digim i go daun inap 75 mita. Tasol bihain ol i singautim sampela man bilong ausait long i kam pinisim dispela wok. Ol dispela lain i go daun inap 96 mita na ol i painim pinis wara.
Long kirap bilong Februeri 1984, tripela Witnes long Amerika ol i wokim piksa bilong wanpela haus ol brata inap sanapim insait long liklik hap taim tasol. Dispela haus i gat tupela plua inap long ol ofis, 22 rum slip, wanpela rum bilong famili bilong brens-ofis i ken bung long en, ples bilong kaikai, ples bilong wasim laplap, na wanpela Haus Kingdom. Ol i tok ol brata inap sanapim dispela haus insait long 8-pela mun tasol. Long Peru dispela i olsem wanpela mirakel!
Ol i Redi long Mekim Wok
Long Mas 25 ol i bin bung long wanpela hap graun bilong Sosaiti long Kampoi, em ol i save mekim ol kibung long en, bilong tokim ol brata long dispela bikpela wok ol i laik mekim. I gat 19,000 pablisa tasol long Peru long dispela taim, tasol inap olsem 26,500 manmeri i kam bung. Ol i amamas long helpim dispela wok na ol i givim bel long mekim i go inap long dispela wok i pinis.
Ol i stretim wok ol brata sista i mas mekim. Ol i singautim 200 painia regula na painia spesel long i kam helpim dispela wok. Na ol brata i save bosim sampela wok long kibung, ol i makim ol dispela brata long lukautim dispela wok. Ol i makim taim bilong olgeta wan wan kongrigesen i kam mekim wok long Sarere na Sande.
I gat wanpela bikpela bakstua long dispela hap graun ol i bin baim, na ol i wokim dispela bakstua i kamap ples slip bilong ol brata i kam wok. Ol i putim ol matres antap long ol bokis i gat buk insait long en. Ol i wokim ol ples waswas na toilet klostu long banis ausait long dispela bakstua. Em taim bilong kol long Peru na ol brata i mas waswas long wara i kol, olsem na long moningtaim ol i save waswas hariap. Ol i wokim wanpela gutpela ples bilong kisim kaikai. Olgeta i save kaikai long 7 klok long moningtaim na kirap mekim wok long 7:30. Ol sista i wok long ples kibung long Kampoi, em i stap longwe liklik long ples ol i sanapim nupela brens-ofis long en. Ol i save wasim na ainim ol laplap. Ol i wokim tu ples bilong stretim su bilong ol brata, long wanem su bilong ol bilong wok i save bagarap kwik.
Ol Brata Bilong Longwe Hap i Kam Helpim Wok
Insait long dispela 8-pela mun ol i bin wok long sanapim nupela brens-ofis, inap olsem 145 brata sista bilong Not Amerika ol i kam helpim dispela wok. Planti bilong ol dispela brata ol i bin insait long wok bilong sanapim ol Haus Kingdom. Ol i wok i go na sampela brata i gat save long lainim ol brik, na ol plama, na ol brata i wok long paua ol i kam mekim wok. Ol i inapim wok bilong ol insait long tupela o tripela wik tasol na ol i go bek long kongrigesen bilong ol. Tasol sampela i stap inap 8-pela mun olgeta.
Ol dispela brata i kisim ol tul samting bilong ol yet i kam na ol i wok wantaim ol brata em ol i no save long tok ples bilong ol. Tasol ol i mekim wok long han samting na traim kolim tok ples bilong ol na ol i laik wok gut wantaim, olsem na ol inapim wok bilong ol.
Planti brata sista long Peru ol i mekim pasin sori na singautim ol dispela brata bilong narapela hap i kam i stap long haus bilong ol. Long 6 klok moningtaim long olgeta de bilong wok, wanpela bas i raun long haus bilong ol dispela brata bilong Peru na kisim ol brata bilong narapela hap i go kisim kaikai na mekim wok. Ol brata sista i wok long Betel long Peru, ol tu i helpim dispela wok.
Bilong helpim ol dispela brata bilong narapela hap na ol inap kisim ol kaikai bilong spirit, ol i bin kamapim wanpela kongrigesen bilong ol brata i save long tok Inglis. Planti brata bilong narapela hap ol i bin wok strong long autim tok tu na ol i kirapim sampela Baibel-stadi, na taim ol dispela brata i lusim Peru i go bek long ples bilong ol, sampela bilong ol dispela Baibel-stadi ol i stadi yet.
Ol Narapela Manmeri i Kirap Nogut
Planti handet brata sista bilong Peru, ol yangpela wantaim ol lapun, ol i kam mekim wok long Sarere Sande samting. Ol sista na ol yangpela tu i mekim wok inap long strong bilong ol. Ol man bilong ausait i lukim dispela samting na ol i kirap nogut.
Wanpela ensinia bilong wanpela bikpela kampani em i kam lukim wok ol brata i mekim. Em i lukim pasin bilong ol brata long mekim wok, na em i tok: “Yupela save baim ol dispela man inap hamas na ol i wok strong olsem?” Narapela man i tok: “Wanem samting i mekim na ol wokman i amamas tru?” Wanpela lain bilong televisen long hap bilong Lima, ol i kam, na inap 4-pela aua samting ol i wok long toktok wantaim ol brata sista i mekim wok na kisim piksa bilong ol.
Ol i Mekim Gutpela Wok
Olsem wanem? Ol i sanapim dispela haus insait long 8-pela mun tasol? Tru tumas, ol i mekim. Tasol ol i no pilim olsem ol brata i subim ol long mekim kwik dispela wok. Nogat. Taim ol i kirap long wokim haus, ol brata i tokim ol, ol i mas wokim gut bambai lain bilong Jehova inap mekim gutpela wok long en. Olsem na ol i save, sapos ol i wok inap 9-pela o 10-pela mun samting bilong sanapim dispela haus, no gat samting.
Ol brata long Peru i redi long mekim wok, na sampela brata bilong ol narapela hap bilong graun, em ol i gat save long mekim wok, ol tu i kam, olsem na ol i sanapim dispela haus long taim stret olsem ol i bin makim. Long Desemba 3, 1984, lain bilong Betel ol i kisim ol samting bilong ol i go putim long nupela Haus Brens. Ol brata i bin wok inap 8-pela mun na wanpela wik long sanapim dispela haus.
Taim Bilong Dediketim
Ol i bin makim Janueri 27, 1985, olsem de bilong dediketim dispela nupela brens-ofis. Brata M. G. Henschel, em bilong Lain Bilong Bosim Ol Witnes, em i lusim Bruklin, Nu Yok i kam bilong mekim namba wan tok. Planti brata sista bilong ol narapela hap na ol brata sista i bin mekim wok bilong sanapim dispela brens-ofis—inap 500 samting—ol i kam bung long nupela Haus Kingdom na long ples bilong kisim kaikai. Na planti brata sista i bung long ples kibung long Kampoi na ol i harim ol tok long rot bilong telefon.
Long moningtaim, Brata Henschel i mekim wanpela tok long tok ples Spen bilong dediketim dispela haus. Long belo bek, ol i mekim ol tok samting long ples kibung long Kampoi. Inap 34,238 ol i bin bung. Ol i singautim dispela bikpela lain olgeta i go lukim nupela brens-ofis. Ol i amamas tru long lukim dispela “mirakel bilong 8-pela mun” i makim olsem Jehova i blesim wok bilong ol.
Wok bilong sanapim dispela haus i kamapim planti blesing. Wanpela blesing em olsem: Ol i gat gutpela haus bilong helpim wok bilong lain bilong Jehova long Peru. Narapela blesing em olsem: Ol brata sista i bin wok wantaim inap 8-pela mun, na dispela samting i mekim pasin bilong i stap wanbel i kamap strong moa namel long ol. Na ol i kamap strongpela Kristen. Ol i bin bung wantaim long ol miting, na long taim bilong kaikai, na long olgeta moningtaim ol i mekim teks, dispela olgeta samting i strongim pasin bilong sori i stap namel long ol brata. Ol brata i lusim Not Amerika i kam wok long dispela “longwe” ples ol i pilim olsem dispela samting i bin helpim ol. Tru tumas ol brata i bin mekim sampela wok bilong helpim dispela “mirakel” i kamap, ol i no ken lusim tingting long gutpela amamas ol i kisim taim ol i wok inap 8-pela mun wantaim ol brata na mekim dispela bikpela wok.—Lukim Hagai 1:7, 8.
[Piksa long pes 30]
Ol yangpela wantaim ol lapun i mekim wok