God Em i Wanpela Man i Staptru?
“GOD em i stap.” Wanpela nius i tok “olsem. (Daily Express bilong Ogas 14, 1981) Dispela nius i stori long tupela saveman bilong saiens. Bipo tupela i no bilip long God, tasol nau tupela i kirap long bilip olsem i mas i gat wanpela God i stap. Tupela i skelim skelim ol lo i bosim ol samting na nau tupela i save, samting i gat laip em i no inap kamap nating, olsem na tupela i kirap long bilip olsem God em i stap. Tasol tupela i ting olsem wanem long God? Dispela nius i tok, tupela i ting olsem God em i olgeta samting i stap long ples antap na long graun.
Olsem wanem? Yu bilip long God? Orait, yu ting God em i husat? Yu ting em i olsem wanpela “Samting” i gat bikpela save? O em i olsem wanpela strong i stap long olgeta hap? O yu ting em i Bikpela Man i stap antap na em i gat tingting na bikpela save?
Sampela man i tok, ‘Yumi no ken tok God em i wanpela Man.’ Ol i pilim olsem dispela i daunim nem bilong God. Ol i no laik bai yumi tingim God em i olsem wanpela man bilong graun, olsem ol pikinini i mekim, em ol i save ting God em i olsem wanpela lapun man i gat waitpela mausgras na em i pasim longpela klos na sindaun long smok bilong antap. Wanpela man bilong bipo, nem bilong em Maikelanjelo, em i sapim wanpela piksa bilong God long rup insait long wanpela liklik haus lotu Katolik. Dispela piksa i makim God i olsem wanpela strongpela lapun man em i stap long antap.
Tru, taim yumi kolim dispela tok “man” yumi tingim ol man bilong graun, tasol wanpela buk i tok, dispela tok “man” i makim tu olsem man i gat tingting na em inap pilim samting i stret na samting i no stret. Olsem na i stret yumi ken tok, God em i Bikpela Man bilong antap.—Webster’s Third New International Dictionary.
Tasol ating sampela man bai tok, ‘Sapos yumi tingim God em i olsem wanpela strong o em i wanpela Man, dispela i no bikpela samting.’ Tasol em i bikpela samting. Long wanem sapos God em i wanpela strong tasol, orait bai i stap bilong yumi i no gat as bilong en. Bai yumi stap olsem wanpela liklik hap bilong wanpela bikpela masin. Tasol sapos God em i wanpela Man em i stap tru na em i gat tingting, orait bai i stap bilong yumi i gat as tru bilong en, a? Na bai yumi inap save long God na kamap pren bilong em.
Gutpela tru sapos yumi inap save long God na kamap pren bilong Em. Tasol pastaim Yumi mas save, God em i wanpela Man i stap tru o nogat. Olsem wanem yumi ken save long dispela samting? Na sapos em i stap tru, orait, olsem wanem yumi ken save long em na kamap pren bilong em? Baibel i tok wanem long dispela samting? Orait, nau yumi ken skelim.