Ripot long Wok Bilong Kingdom
Tok i Tru Bilong Baibel i Helpim Man Long Lusim Wok Bilong Ol Spirit Nogut
JEHOVA i tokim ol Isrel long em i ting olsem wanem long wok bilong ol spirit nogut, na em i tok: “Yupela no ken mekim wok bilong painim save long ol samting i stap hait, na yupela no ken wok long mekim sampela samting ol spirit i mas helpim yupela long mekim.” (Levitikas 19:26, NW) Sapos man i pas long dispela wok nogut na em i laik lusim, wanem samting i ken helpim em? Jisas i tok: “Yupela bai i save long tok tru. Na tok tru em bai i mekim yupela i kamap fri.” (Jon 8:32) Yumi ken harim stori bilong wanpela Witnes bilong Frans na yumi ken save, tok bilong Jisas i stret.
“Mi bin go sindaun long nupela haus, na meri i stap klostu em i kam na i tok, sapos mi laik, em i ken lukim ol sta na em i ken tokim mi long ol samting bai painim mi long bihain. Mi sakim em na mi ting, bihain mi mas klia long dispela meri long wanem em i mekim wok bilong ol spirit nogut. I hatwok long mi givim baksait long em, long wanem, em i gat gutpela pasin na i laik pren gut long mi.
“Long Novemba 1980 sik i painim mi, na dispela meri i kam bilong helpim mi. Mi laikim gutpela pasin em i mekim na mi sori long em, long wanem em i tok, taim em i slip, planti taim wanpela samting i pasim win bilong em na em i kirap na em i pret nogut. Bipo mi ting em i save stap amamas, tasol nau mi save em i gat hevi na ol spirit nogut i as bilong en. Tasol olsem wanem mi ken helpim em long klia long spirit nogut? Orait, mi tingting long kamapim tok i tru long em.
“Bilong kirapim tok, pastaim mi toktok long hevi bilong mani samting, em hevi bilong mipela ol meri singel. Em i tok: ‘Mi save mekim wok long ol kas. Sapos man i laik save long samting bilong bihain na i stap hait, mi kamapim long em long rot bilong ol kas na em i mas baim mi, na mi kisim mani long dispela rot’ Mi kamautim Baibel bilong mi na mi soim sampela tok bilong Baibel long em, em Baibel i tok, sapos yumi mekim wok bilong ol strongpela spirit nogut ol bai bagarapim yumi.
“Nau mitupela i kirap long toktok gut wantaim long wok bilong ol spirit nogut. Meri i tok, olgeta tok em i givim long ol man, truim bilong em i save kamap. Mi soim tok bilong Moses long em long Diuteronomi 18:10, 11, (NW) i tok: ‘Yupela i no ken larim sampela man i stap insait long lain bilong yupela, olsem man . . . i save wokim wanpela samting bilong kamapim save, o man bilong mekim sampela samting ol spirit i mas helpim em long mekim, o man bilong painimaut ol samting i laik kamap bihain, o man bilong singautim wailis bilong ol spirit, o glasman, o man bilong singautim man i dai pinis.’ Mipela toktok pinis, na taim mi laik lusim em em i tok: ‘Mi bin ting mi painim pinis rot bilong lusim hevi bilong mi, tasol nau mi save, samting mi mekim em i no stret.’ Mi amamas long harim em i tok olsem. Mi toktok wantaim em wanpela taim tasol na em i pilim pinis dispela tok long wok bilong ol spirit nogut na em i laik lusim. Em gutpela tru!
“Dispela meri i olsem em i hangre long tok bilong Baibel, na em i save kaunim Baibel i go inap 3 klok o 4 klok long moningtaim. Mitupela stadi long Baibel tupela taim long olgeta wik. Em i save go long ol miting na em i kamap strong hariap. Mipela wok long painim ol tok insait long Baibel na ol buk bilong Sosaiti Was Taua bilong helpim mipela long save gut long rot bilong sakim ol spirit nogut. Ol dispela save em i kisim, i kirapim em na em i tok, em bai kukim ol buk samting em i save mekim wok long en bilong mekim wok bilong ol spirit nogut.
“Meri i givim bel, na i no longtaim na em i kirap wok long autim gutpela tok long ol narapela manmeri. Bipo ol manmeri i save kam long em na bai em i ken wokim marila na kamapim tok hait long ol. Nau sampela i save askim em long mekim yet, tasol em i tokim ol, em i lusim dispela wok bilong ol spirit, na em i tokim ol long kam harim sampela gutpela tok, winim ol tok bipo em i bin givim long ol. Em i kisim baptais na nau em i wanpela sista bilong yumi”