Sakim Wok Bilong Ol Spirit Nogut
TAIM mi gat 14 krismas, hevi i painim famili bilong mi. Wanpela kilman nogut i wok long kilim i dai ol wan wan bilong famili. Em i kilim i dai olgeta pikinini bilong brata bilong mi−9-pela olgeta. Bihain em i mekim nogut long man bilong brata bilong mi. Na bihain liklik em i kilim i dai wanpela brata bilong mi. Na bihain moa em i kilim i dai 4-pela susa na brata bilong mi, na mitupela mama tasol i stap. Mi pret nogut tru!
Bihain, inap planti yia, taim mi kaikai o wok o slip, olgeta de mi pret. Mi tingting: ‘Wanem taim em bai kam bek na kilim narapela? Em bai kilim husat pastaim? Ating Mama, o ating mi?’
Taim Mi Yangpela
Pastaim mi ken stori long taim mi bin stap yangpela bambai yu ken save long ol samting i bin painim mi long bihain. Mama i karim mi long 1917 long wanpela ailan namel long Wara Maroni, long Suriname. Mipela bilong lain Paramakana Bus-Nigro. Ol tumbuna bilong mipela i bin wok kalabus na ol i ranawe na hait long bikbus. Long dispela taim ol man i no kalabusim ol moa, tasol ol spirit nogut i kalabusim ol.
Long ples bilong mipela, ol spirit nogut i bosim ol man. Mipela save bihainim pasin tambaran. Sapos wanpela man i laik kilim i dai narapela man, em i wokim posin, na bai sik i painim dispela man na em bai dai. Kilman hia em i mekim wok long wisi, olsem posin. Na sampela taim em i singautim wanpela kunu (koenoe) bilong helpim em. Ol man i tok, kunu em tewel bilong man i dai pinis; taim dispela man i bin stap laip, famili bilong em i bin mekim nogut long em, na taim em i dai pinis tewel i kam bek bilong bekim nogut long famili. Tasol em i no tewel bilong man; nogat; em wanpela spirit nogut na em i subim ol man na bai ol i mas lotuim em.
Lotu bilong mi long dispela taim bipo, em wanpela lotu Talatala ol i kolim Evanjelikal Brata Komuniti. Mi bin kisim liklik save tasol long God. Mi no bin save long pasin bilong lotuim em, tasol mi lukim ol bus i stap nabaut na mi save God em i givim planti gutpela samting long ol man. Long tingting bilong mi mi tok: ‘Mi laik lotuim wanpela gutpela God; mi no laik lotuim wanpela spirit nogut i putim ol hevi long ol man.’ Mi save ol kunu i amamas long mekim nogut long ol man na kilim ol i dai.
Bihain mi harim olsem sampela lain ol i birua long famili bilong mi ol i bin salim wanpela kunu i kam long mipela; mi kirap nogut taim mi harim olsem. Long dispela taim mi gat 14 krismas. Kunu i kirap mekim ol wok nogut bilong em na kilim i dai ol famili bilong mi, na 26 yia i go pinis, na nau mitupela Mama tasol i stap.
Namba Wan Taim
Mama em meri bilong wok. Wanpela taim em i wokabaut i go long gaden bilong em na wanpela samting i paitim em na em i pundaun na em i no inap kirap. Wanpela kunu i mekim. Sik i painim em; olgeta bun bilong em i dai. Em i mas i gat man bilong helpim em, em mi tasol i mas helpim em. Mi laik helpim Mama, tasol mi pret long dispela spirit nogut i stap long Mama. Taim kunu i wok long mekim nogut long Mama, Mama i kisim bikpela pen na em i krai strong, olsem na mi no inap lusim em na mi slipim het bilong em long lek bilong mi. Taim mi mekim olsem, Mama i pilim orait liklik, tasol mi pilim olsem tupela han i holim mi na taitim skin bilong mi.
Olsem na mi laik ranawe, tasol Mama i kirap krai gen. Mi tingim em, na mi stap wantaim em na mi guria i stap. Em namba wan taim bilong mi long bungim dispela kilman. Long dispela taim mi gat 40 krismas.
Em i Mekim Moa Yet
Mama i dai pinis, na tripela de bihain, wanpela nek, olsem bilong pren, em i tok: “Lintina, Lintina, yu harim mi? Mi singautim yu.” Kirap long dispela taim spirit nogut i putim bikpela hevi tru long mi na mi laik bai mi mas dai hariap.
Pastaim spirit i mekim dispela samting long mi taim mi laik slip. Em i kirap toktok long mi na mi no inap slip. Em i stori long ol samting bilong ples matmat na dai. Mi no inap kisim gutpela slip, olsem na strong i lusim mi, tasol mi lukautim yet ol pikinini bilong mi.
Bihain dispela spirit i mekim dispela samting long mi Planti taim. Sampela taim mi pilim em i laik holim nek bilong mi na pasim win. Mi traim ranawe, tasol i olsem wanpela hevipela samting i daunim mi na mi no inap. Mi traim singaut, tasol nek i pas. Tasol mi wok yet long sakim dispela spirit; mi no laik lotuim em.
Taim em i mekim dispela samting long mi, na em i lusim mi liklik, mi mas malolo na kisim bek sampela strong, na wokim gen gaden na kamapim tapiok na suga na karim i go long maket long wanpela liklik taun long nambis. Mi no hatwok tumas long painim liklik wansiling, tasol mi hatwok long karim bikpela hevi tru i laik painim mi bihain.
Mi Painim Rot Bilong Ranawe
Wanpela taim spirit nogut i mekim wanpela tok long mi na dispela i pretim mi nogut. Em i tok: “Bai mi mekim bel bilong yu i solap olsem bal.” Bihain buk i kamap insait long bel bilong mi, na em i go bikpela bikpela, na bel bilong mi i solap olsem mi gat bel. Nau mi pret moa yet, na mi tingting: ‘God i gat bikpela strong. Olsem wanem? Em inap helpim mi long rausim dispela kunu, o nogat? God inap salim wanpela gutpela strongpela spirit long rausim dispela kunu i stap long mi?’ Mi laik save long dispela, olsem na mi go long wanpela bonuman (bonoeman ), em man bilong wokim marila samting.
Dispela marilaman i givim tupela paspas long mi bilong putim long tupela han bilong mi, tasol buk long bel i no slek. Mi go traim narapela marilaman, tasol em tu i no inap tekewe dispela buk. Mi mas wok yet long gaden bilong painim mani bilong baim ol samting bilong givim long ol dispela marilaman, olsem bia, na wain, na ol narapela strongpela dring, na laplap, em bilong baim ol dispela marilaman na bai ol i ken helpim mi. Planti taim ol i tokim mi: “Yu brukim skru na lotuim dispela kunu. Kolim em bikpela bilong yu. Lotu long em na em bai lusim yu.” Tasol mi no inap mekim olsem, long wanem dispela spirit i bin wok long bagarapim mi na em i laik kilim mi i dai. Olsem na mi no lotuim em.
Tasol mi laik tru long pinisim hevi bilong mi, olsem na mi mekim olgeta samting ol marilaman i tokim mi long mekim. Wanpela i mekim ol samting long mi inap 5-pela mun. Em i wasim mi long wara i gat sampela kain lip i stap long en, na em i putim wara bilong 11-pela kain gras i go insait long ai bilong mi; dispela i mekim ai bilong mi i pen na mi krai, tasol em i tok em i mas “klinim” ai bilong mi. Dispela 5-pela mun i pinis, na mani tu bilong mi i pinis, tasol sik i stap yet; em i go bikpela, na mi pilim nogut tru.
“Nau Bai Mi Pinisim Yu”
Wanpela pikinini man bilong mi i stap long Holan, na em i salim mani long mi na bai mi ken baim yet dokta samting. Mi go long wanpela dokta long biktaun na em i glasim mi na i tok: “Mi no inap helpim yu. Yu go painim wanpela bonuman.” Olsem na mi go long wanpela marilaman, em bilong Is India. Tasol em i no stretim sik bilong mi. Mi laik i go bek long ples, tasol taim mi kamap long haus bilong wanpela pikinini meri bilong mi long biktaun, nau mi bagarap na olgeta mani bilong mi i pinis. Inap 17 yia i lus long painim rot bilong stretim sik, na mi bin tromoi K8,300. Nau mi gat 57 krismas.
Spirit nogut i tok: “Mi les pinis long yu. Nau bai mi pinisim yu.”
Mi tokim em: “Yu no God na yu no Jisas na bai yu inap pinisim mi.”
Spirit nogut i bekim na i tok: “God i no inap pasim mi. Yu bai dai.”
Laspela Hevi
Sampela wik bihain wanpela meri i askim pikinini meri bilong mi: “Olsem wanem long mama bilong yu?” Meri hia, nem bilong em Mina (Meena), em wanpela Witnes Bilong Jehova na em i mekim wok painia. Em i tokim pikinini bilong mi, em i tok: “Baibel tasol inap helpim mama bilong yu.” Mi harim tupela i toktok, na mi kirap wokabaut i go long tupela, tasol wanpela samting i tromoi mi i go daun long graun. Mina i kam hariap long mi na i tok: “Dispela spirit nogut i no ken lusim yu nating. Jehova tasol inap helpim yu, no gat narapela.” Nau Mina i kirap beten wantaim mi long God Jehova, na bihain em i wok long i kam lukim mi long olgeta taim. Tasol spirit i strong moa long mekim nogut long mi. Long nait skin bilong mi i save guria na i mekim haus i seksek na ol wanhaus i no inap slip. Mi lusim kaikai, na sampela taim tingting bilong mi i paul.
Sik i go bikpela tru. Ol pikinini man bilong mi i kam bilong kisim mi i go bek long ples; ol i no laik bai mi dai long biktaun. Tasol mi no gat strong inap mi ken i go long ples, na mi tokim ol olsem. Mi pilim mi laik dai na mi singautim Witnes i kam na bai mi ken Gutbai long em. Mina i kam, na em i kamapim tok bilong Baibel i tok, sapos mi dai, inap mi ken kirap bek gen.
Mi askim em: “Kirap bek? Olsem wanem?” Mina i tok: “God inap kirapim bek yu long dai na yu ken i stap laip long Paradais.” Mi amamas long harim dispela tok!
Tasol long nait spirit nogut i holim mi. Mi driman long wanpela kunu i wokabaut na bikpela lain i bihainim em. Em i tok bilas na i tok: “Em i ting em bai kirap bek long dai.” Ol man i lap i lap. Mi kirap na mekim wanpela samting bipo mi no bin mekim. Mi singautim Jehova, olsem: “Jehova! Jehova!” Mi no inap mekim narapela tok−em dispela tok tasol. Taim mi singaut olsem, spirit nogut i go pinis!
Ol pikinini i kam gen na i tok: “Mama, mipela no laik bai yu dai hia long biktaun. Mipela laik kisim yu i go long ples.” Tasol mi no laik i go long ples. Mi laik i stap na lanim sampela tok moa bilong Jehova. Mi tokim ol: “Tru ating bai mi dai, tasol mi laik mekim wok bilong Jehova pastaim na bihain mi ken i dai.”
Olsem Strongpela Haus
Mina na sampela Witnes moa i save kam oltaim na lukim mi. Ol i lainim mi long beten long Jehova. Ol i lainim mi long dispela tok i bin kamap namel long Jehova na Seten, na long Seten i bin putim hevi long Jop bambai Jop i mas lusim Jehova. Ol dispela save i strongim mi na nau mi no laik tru long lotuim spirit nogut. Ol Witnes i kaunim wanpela tok bilong Baibel long mi na mi laikim tumas dispela tok, em i tok: “[Nem bilong Jehova] i olsem wanpela strongpela haus. Ol stretpela man i ken ran i go [insait] long en na stap gut.”−Provep 18:10.
Isi isi mi kisim bek strong. Pikinini man bilong mi i kam gen bilong lukim mi. Mi tokim em long wet ausait long haus pastaim. Mi kirap pasim gut dres bilong mi. Mi pasim klos blaus i go insait gut long sket na sapos ol man i lukim mi ol i ken save bel bilong mi i slek na nau i no solap tumas. Mi mekim olsem, na nau mi wokabaut i go ausait.
Pikinini i lukim mi na i kirap nogut na i tok: “Olsem wanem? Yu Mama Lintina?”
Mi bekim tok olsem: “Yu tok stret. Mi Mama Lintina. Mi tenkyu long Jehova, em God bilong mi!”
Mi Laik Kamap Strong
Taim mi inap wokabaut, mi go long Haus Kingdom bilong ol Witnes Bilong Jehova. Long Haus Kingdom ol i mekim gut long mi, olsem pren gut, na dispela i strongim bel bilong mi, olsem na mi go oltaim na mi no lusim miting bilong ol. Bihain mi go wantaim ol Witnes long autim tok long haus bilong ol man. Bihain mi kisim baptais na mi kamap wanpela wokmeri bilong Jehova, em i Man bilong kisim bek mi. Long dispela taim mi gat 58 krismas.
Tasol i gat wanpela samting i stap yet na mi mas stretim. Bipo mi bin wokim wanpela alta long haus bilong mi long ples, em i bilong mekim lotu long ol tumbuna bilong mi. Nau mi laik i go rausim dispela alta bambai mi ken i stap klin long ai bilong Jehova. Mi beten askim Jehova long helpim mi, long wanem mi save, sapos mi rausim dispela alta, ol man bilong ples bai kros. Mi go long ples, na taim mi opim dua bilong haus bilong mi wanpela man i singaut: “Ol welpik!” Wanpela lain pik i go insait long wara, ol i laik brukim wara na i go long narapela hapsait. Olgeta man meri pikinini, yangpela na lapun, ol i lusim ples na ron i go bilong kisim ol pik. Mi amamas tru na mi tenkyu long Jehova long opim rot na bai mi ken mekim dispela wok bilong mi. Kwiktaim mi kisim alta na putim i go ausait, na mi kapsaitim kerosin long en na putim paia long en na em i paia. Paia pinis, na nau ol man i kam bek long ples. Bihain ol i save long samting mi bin mekim, tasol ol i no inap mekim wanpela samting. Bel na tingting bilong mi i amamas, na mi go bek gen long biktaun.
Hevi i Pinis na Amamas i Kamap
Sampela gutpela samting moa i painim mi. Pikinini man bilong mi long Holan em i harim stori long ol samting i bin painim mi na em i no bilipim ol dispela samting; em i ting ol man i giaman. Olsem na em i kisim balus na i kam long Suriname; em yet i laik lukim long ai bilong em na bai em i ken save. Em i lukim mi i strong na no gat sik samting, na em i amamas, olsem na em i baim wanpela gutpela nupela haus bilong mi long biktaun, na nau mi stap long dispela haus. Bikpela senis i bin painim mi−bipo mi rabismeri na ol spirit nogut i bosim mi, tasol long nau mi gat gutpela sindaun na mi wokmeri bilong Jehova!
Mi bin baptais na 11-pela yia i go pinis, na mi amamas long sampela gutpela samting moa i painim mi. Sampela famili bilong mi, em 3-pela pikinini na wanpela tambu, ol i lukim ol blesing mi bin kisim na ol i kirap lainim tok i tru bilong Baibel na ol i dediketim laip bilong ol long God Jehova. Na ol brata sista i save kisim mi i go wantaim ol long ol manmeri i laik lain long tok bilong Baibel, olsem Baibel-stadi. Sampela bilong ol dispela manmeri ol i gat hevi long ol spirit nogut na ol i no gat strong inap ol i ken rausim ol dispela spirit, na mi stori long ol samting mi yet mi bin mekim, na dispela i givim save long ol na ol tu i ken mekim olsem. Olsem na ol hevi i bin painim mi inap planti yia, em mi mekim wok long dispela; mi kamapim dispela stori long ol manmeri na bai ol tu i ken lusim ol spirit nogut. Olsem na ol dispela yia na hatwok na hevi i no lus nating. Nau mi mekim wok long en taim mi autim tok bilong Kingdom.
Mi laik tok tenkyu long God bilong mi, em Jehova, em i bin mekim gutpela pasin tru long mi, tasol mi sot long sampela gutpela tok na bai mi ken bekim bikpela tenkyu long em. Tru tumas, mi bin pilim strongpela han bilong Jehova i bin helpim mi. Mi ken tok tru, Jehova i bin mekim gut tru long mi!−Lukim Sam 18:17-19.
[Piksa long pes 7]
Taim Lintina van Geenen i lusim ol spirit nogut em i save pinis, Jehova “i olsem wanpela strongpela haus”
[Piksa long pes 9]
Bus bilong Suriname, em ol spirit nogut i kalabusim planti man long dispela hap