Ripot Long Wok Bilong Kingdom

Lusim Wok Bilong Ol Spirit Nogut

WOK bilong ol spirit nogut i bosim strong sindaun bilong planti milion manmeri. Tasol ol inap long lusim dispela pasin! Kain samting olsem i bin kamap long planti manmeri long wanpela taun bilong bipo, em Efesus. Olsem Baibel i tok, “planti manmeri i bin wokim posin na marila samting, ol i bungim ol buk bilong ol i gat tok long pasin bilong wokim ol dispela samting, na ol i kukim long paia . . . Long dispela pasin tok bilong Bikpela i wok strong long ol manmeri, na i kamap strong long laip bilong ol.”​—⁠Aposel 19:​19, 20.

Olsem tasol, kongrigesen Kristen long nau tu i wok long i go bikpela. Na namel long ol dispela man i bilip, sampela i bin mekim wok bilong ol spirit nogut long bipo, olsem sampela i bin mekim long Efesus. Ekspiriens i kam long Simbabwe na i stap daunbilo i kamapim klia dispela samting.

Gogo Mthupha em wanpela lapun meri, na planti manmeri i save long narapela kain strong em i holim bilong mekim wok bilong ol spirit nogut. Ol manmeri i stap long ol longwe hap olsem Sambia, Botswana, na Saut Afrika ol i save kam long em bilong em i ken oraitim ol long ol marasin bilong bus em i save wokim. Gogo Mthupha i save lainim ol narapela tu long kamap wanpela n’anga, o dokta bilong ples. Na sampela taim em i save wokim marila!

Long wanpela Sande long moningtaim, ol Witnes Bilong Jehova i bungim Gogo Mthupha taim ol i autim tok long ol haus. Em i amamas tru long toktok wantaim ol Witnes long tok promis bilong Baibel long nupela graun i gat stretpela pasin, na i no gat pasin nogut long en. Em i kisim buk Yu Inap i Stap Oltaim Long Paradais Long Grauna na em i orait long stadi long Baibel. Bihain long 3-pela stadi tasol, em i kirap i go long ol miting.

Taim em i stadi long Baibel i go, Gogo Mthupha i kisim save olsem ol narapela kain strong em i holim, ol i kam long ol spirit nogut em ol i bin bikhet long wok bos bilong Jehova. (2 Pita 2:4; Jut 6) Em i kisim save tu olsem ol dispela spirit nogut i strong long pulim olgeta man na bai ol i lusim Jehova na trupela lotu. Tasol em i save mekim dispela wok bilong ol spirit nogut bilong lukautim em yet long ol samting bilong skin, olsem na nau em bai mekim wanem?

Gogo Mthupha i tokaut olsem em i laik rausim olgeta paspas na ol samting bilong ol spirit nogut. Em i laik rausim tu narapela kain hat olsem bilas bilong het, na “kom bilong bulmakau i save toktok” em i bin holim bilong mekim wok n’anga (dokta bilong ples) bilong oraitim ol man. Gogo Mthupha i laik rausim olgeta dispela samting bilong ol spirit nogut na bai em i ken mekim wok bilong trupela God, na God bilong i stap laip, em Jehova.

Tasol sampela wanfamili bilong em i no amamas long dispela, long wanem, em i save lukautim ol long mani samting. Ol i tokim em long givim ol dispela samting na ol narakain strong bilong em long ol na bai ol i ken wok yet long kisim mani. Gogo Mthuphu i no laik givim long ol.

Kongrigesen bilong ol Witnes Bilong Jehova long dispela hap ol i helpim em na em i pulimapim ol samting bilong ol spirit nogut long 3-pela traipela bek na em i kukim olgeta long paia. Taim paia i kukim ol samting bilong em bilong lotuim ol spirit nogut, Gogo Mthuphu i tok: “Lukim! Dispela kom bilong bulmakau i no inap helpim em yet.”

Bihain, Gogo Mthuphu i amamas tru long kisim baptais long wara bilong makim dediket bilong em. Long nau em i save mekim wanem long kisim mani bilong lukautim em yet? Em i save salim ol kaikai bilong gaden. Yes, long strong bilong Tok Bilong God, ol man inap lusim wok bilong lotuim ol spirit nogut. Gogo Mthuphu i tok: “Bipo mi no bin stap fri olsem.”

[Futnot]