Askim

Sapos ol spirit nogut i mekim nogut long wanpela man, em i ken mekim wanem?

Tok Bilong God i soim olsem ol man em ol spirit nogut i save mekim nogut long ol, ol inap kamap fri long dispela kain hevi. Beten em i bikpela samting bilong helpim ol. (Mak 9:​25-29) Tasol ating man i kisim hevi long ol spirit nogut em i mas mekim sampela narapela samting tu. Ol samting i bin kamap long ol Kristen bilong bipo i helpim yumi long save long ol dispela narapela samting man i mas mekim.

Paslain long ol i kamap Kristen, sampela man long Efesus bilong bipo i insait long wok bilong ol spirit nogut. Tasol taim ol i wokim tingting long mekim wok bilong God, ‘ol i bungim ol buk bilong ol i gat tok long pasin bilong wokim marila samting, na ol i kukim long paia long ai bilong olgeta manmeri.’ (Aposel 19:19) Taim ol dispela nupela bilipman long Efesus i kukim ol buk i stori long wok marila samting, ol i stap gutpela piksa long ol man i laik bai ol spirit nogut i mas lusim ol. Em i bikpela samting tru long ol dispela man i mas rausim olgeta samting i bilong mekim wok bilong ol spirit nogut. Olsem: Ol buk, magasin, vidio, sampela stori ol man i kisim long Intenet samting, musik i stori long wok bilong ol spirit nogut, na tu, ol paspas o kawawar na gorgor samting ol man i save yusim olsem “was” bilong ol o ol i mekim sampela wok bilong ol spirit nogut long en.​—Lo 7:​25, 26; 1 Korin 10:21.

Sampela yia bihain long ol dispela Kristen long Efesus i bin kukim ol dispela buk bilong ol, aposel Pol i tok: “Yumi pait long olgeta spirit nogut.” (Efesus 6:12) Pol i tokim ol Kristen: “Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim.” (Efesus 6:11) Dispela tok i stret long nau tu. Ol Kristen i mas taitim bun bilong strongim ol yet long ol samting bilong spirit bambai ol spirit nogut i no ken mekim nogut long ol. Pol i tok: “Yupela i mas kisim tu pasin bilong bilip, na holim strong olsem hap plang, bai yupela inap long mekim i dai olgeta spia paia dispela man nogut Satan i save sutim i kam long yupela.” (Efesus 6:16) Man i save strongim bilip bilong em yet long rot bilong stadi long Baibel. (Rom 10:17; Kolosi 2:​6, 7) Olsem na pasin bilong stadi oltaim long Baibel i helpim yumi long kisim dispela kain bilip i save banisim yumi long ol wok bilong ol spirit nogut.​—Song 91:4; 1 Jon 5:5.

Ol dispela Kristen long Efesus i mas mekim narapela bikpela samting. Pol i tokim ol: “Yupela i mas prea oltaim. Yupela i mas strong long mekim ol kain kain beten na askim God long helpim yupela.” (Efesus 6:18) Em nau, ol man i laik bai ol spirit nogut i no ken mekim nogut long ol, em i bikpela samting long ol i mas beten strong na askim Jehova long lukautim ol. (Sindaun 18:10; Matyu 6:13; 1 Jon 5:​18, 19) Baibel i tok: “Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.”​—Jems 4:7.

Taim ol spirit nogut i mekim nogut long wanpela man, em i mas beten strong bambai ol spirit nogut i lusim em. Na ol narapela Kristen tru inap beten askim God long helpim man i gat bikpela laik long mekim wok bilong Jehova na i wok strong long sakim ol spirit nogut. Ol i ken askim God long helpim man em ol spirit nogut i mekim nogut long em, long kisim strong long ol samting bilong spirit bilong sakim ol spirit nogut. Baibel i tok “sapos stretpela man i prea, orait prea bilong en i gat bikpela strong, na em inap tru long helpim ol arapela.” Ol dispela kain beten bilong ol wokman bilong God bai helpim tru ol man em ol spirit nogut i nogutim ol na ol i wok strong long “sakim Satan.”​—Jems 5:16.

[Piksa long pes 31]

Ol bilipman long Efesus i kukim ol buk bilong wokim marila samting