Ripot long Wok Bilong Kingdom
‘Gutpela Ripot i Kam Long Ol Longwe Ples’
◻ KANTRI Grinlan em i ples ais na wanpela taim ol pablisa i raun autim tok na ol i bungim wanpela yangpela man bilong Nowe. Em i kisim wanpela buk (Life—How Did It Get Here? By Evolution or by Creation?) long ol, tasol em i no givim bel tumas long harim tok. Taim ol i go bek gen long dispela hap i stap longwe, em i tokim ol em i bin kaunim dispela buk tupela o tripela taim na em i laik kisim sampela buk moa. Ol i givim sampela buk moa long em na sampela buklet tu. Taim em i harim tok olsem ol pablisa i no inap kam bek kwik na lukim em gen na em i mas wet wanpela yia pastaim, em i bel hevi na em i tokim ol long givim atres bilong ol long em. Wanpela mun bihain ol i kirap nogut, long wanem dispela yangpela man i kam paitim dua long haus bilong ol. Em i tokim ol, em i kisim motobaik bilong em bilong raun long ais na em i laik i go kalap long bot bilong em na i kam lukim ol, tasol em i bin pundaun insait long ais; bihain em i kalap long bot bilong em na bot i ran inap 6-pela aua na nau em i kamkamap long ol. Em i laik kisim sampela buk na nius moa na em i laik toktok wantaim ol long ol tok i tru. Long apinun em i go wantaim ol long miting, na em i stretim rot bambai em inap i kam long miting wanpela taim long olgeta mun. Taim wasman sekit i kam lukim kongrigesen, dispela yangpela man i kam harim tok bilong wasman sekit na dispela i strongim em. Em i lusim pinis misin bilong em na nau em i autim gutpela tok bilong Kingdom long hap em i stap long en. Long taim bilong kol tru, em taim i gat bikpela ais, em i no inap i kam long ol miting long bot. Olsem na em i save baim helikopta inap K150 na i go long miting.
Hamas brata sista long lain bilong yumi i mas wok strong olsem bilong kamap strong long wok bilong God?
◻ Planti manmeri long Ailan Madagaskar ol i bilipim gutpela tok bilong Kingdom. I gat inap olsem 3,200 pablisa i autim tok bilong Kingdom na 16,205 i bin bung long taim bilong tingim i dai bilong Krais. Ol brata sista i wok strong bambai ol inap autim tok long olgeta manmeri i stap long dispela ailan.
Olsem: Long kongrigesen Isaonjo i gat 30 pablisa na inap olsem 17 ol i pasim tok long i go autim tok long wanpela ples i stap longwe inap 50 kilomita. Ol i lusim ples long biknait na inap tupela aua ol i wokabaut long lek na bihainim ol liklik rot i go antap long maunten na i brukim ol ples tais. Long 2:30 samting long moningtaim ol i go insait long bikpela bus. Insait long bus i tudak tru na ol i no inap lukim gut rot, olsem na sampela brata i bamim bikpela ston na i pundaun. Na sampela i pundaun insait long wara i pulap long hul long ston. Ol liklik snek i save pas long skin bilong man na pulim blut ol i pulap long bus na planti binatang tu. Planti sista i karim pen long ol dispela samting. Sampela taim lek bilong ol pablisa i go daun insait long graun malumalum na graun malumalum i kam antap inap long skru bilong lek. Ol narapela narapela kain bagarap i painim olgeta dispela 17 pablisa. Tasol long 6:30 long moningtaim ol i lusim bus—ol i kamap pinis long dispela ples!
Long 6:45 ol i kirap long autim tok. Planti manmeri bilong dispela ples ol i mekim gut long ol pablisa na harim tok bilong ol. Tasol meri bilong wanpela bikman bilong lotu Talatala, pastaim em i no laik harim tok: “Mi gat lotu. Em inap long mi. Mi save long olgeta tok bilong Baibel.” Taim pablisa i kamautim wanpela nius Wastaua, meri i mekim pasin antap na em i no laik kisim, em i tok: “Mi gat planti buk na nius bilong kaunim.” Tasol em i kirap givim sampela askim long ol pablisa, olsem: “Yupela i husat? Yupela i kam we? Husat i salim yupela i kam?” Ol i bekim tok long pasin isi na ol i tokim em long bikpela hatwok ol i bin mekim bambai ol inap i kam autim tok long ples bilong em. Ol i stori pinis na nau dispela meri i kisim Wastaua em i tok: “Bai mi kisim. Nogut God i bin salim yupela i kam.”
Belo i pinis na long 1:30 long apinun ol dispela 17 pablisa i lusim dispela ples na kirap long wokabaut i go bek long ples bilong ol. Ol i wokabaut inap 4-pela aua tasol, long wanem san i stap yet. Skin bilong ol i les, tasol ol i kamap gut long ples, na pes bilong ol i lait. Ol i tok: “Mipela ol 17 pablisa bilong kongrigesen Isaonjo i no inap lusim tingting long dispela gutpela taim.”
Tru tumas, spirit bilong Jehova i kirapim ol wokboi bilong em, em ol i dediket long em, na ol i wok strong long autim gutpela tok bilong Kingdom “i go inap long olgeta hap bilong graun,” na planti man i harim tok bilong ol dispela Witnes na ol i bilip.—Aposel 1:8.
[Piksa long pes 9]
Pasis Umanak, long Grinlan