Bilong Wanem Jehova i Bin Kamapim Nem Bilong Em?

Wanpela buk i stori long Olpela Testamen, em ol i bin wokim long Polan long 1964, i bekim dispela askim long pasin i kirapim tru tingting bilong yumi. Misin Katolik i orait long dispela buk, na long dispela buk wanpela profesa bilong Yunivesiti Lublin (em Dr. Stanisław Łach) em i tok:

“Ol man God i bin baim bek ol, ol i gat wok long kamapim nem bilong God long ol narapela man.” Ol Israel long bipo i gat wok long mekim ol samting bambai “ol narapela lain i mekim gut nem bilong Yawe (Jehova) na ol i no ken tok bilas” long en. “Dispela nem Yawe i gat as bilong en. . . . God bai skelim olgeta manmeri bilong graun long ol samting ol i mekim long ol man i kamapim dispela nem.” Dispela profesa i tok: “Ol manmeri bilong olgeta kantri bai litimapim dispela nem Yawe . . . Dispela nem bai go kamap long olgeta hap bilong graun. . . . Moses i save, dispela samting i mas painim dispela nem.”

Tru tumas, Malakai 1:11 i kolim tok profet bilong God Jehova, olsem “Ol manmeri bilong olgeta kantri (bai) givim biknem long mi.” Orait, husat long nau ol i autim dispela nem long olgeta hap bilong graun bambai “olgeta manmeri i singaut long (nem bilong) Bikpela long helpim ol” ol i ken kisim laip? Em ol Witnes Bilong Jehova tasol! Dispela lain ol i holim nem bilong Jehova, ol i “lain bilong em yet,” na ol samting ol man i mekim long ol dispela manmeri “i kamapim dispela nem” bai makim ol i bilong kisim laip o bagarap. Yu yet yu ting olsem wanem long Jehova na long ol man i autim nem bilong em, olsem ol Witnes bilong em?​—⁠Aposel 2:21; 15:14; lukim tu Malakai 3:​16-18.