Nupela Taim i Klostu!
OL MAN i tingim kain kain rot bilong pinisim ol hevi bilong graun. Planti ol i tok, ol manmeri i mas tingim gut ol narapela man na ol i mas wok gut wantaim, na ol i tok, ol gavman long olgeta hap ol i mas wok strong long i stap wanbel na wok gut wantaim. Ol i pilim olsem taim ol samting i wok long i go nogut, dispela bai subim ol lain man long tingim gut ol samting i bikpela samting tru, na bai ol i wok gut wantaim long kamapim nupela taim long graun, na bai ol inap lukautim gut ol samting long graun na dispela gutpela taim i no ken pinis. Ol man i ting ol gavman i no ken lusim bikpela mani moa long baim ami na ol samting bilong pait olsem nau ol i save mekim, na dispela ripot (State of the World 1990) i tok moa olsem, ‘bai ol gavman i no gat ami bilong ol yet, bai ami bilong Yunaitet Nesen i kisim strong na i kamap bikpela, na sapos ol birua i kam kirapim pait long wanpela lain bilong Yunaitet Nesen, dispela ami bilong Yunaitet Nesen yet bai helpim ol long sakim birua.’
Tasol ol dispela samting ol i tingting long mekim i no inap kamapim gutpela taim olsem yumi bin stori long en long pastaim na yumi laik tru bai em i kamap. Ol samting ol man i tingting long mekim long rot bilong ami samting, dispela i no inap pinisim sin na pasin bilong aigris; na ol dispela samting i no inap kirapim olgeta man long laikim tru ol narapela man, na i no gat strong inap long pinisim olgeta kain sik na i dai. Ol samting ol man i tingting long mekim i no soim rot long ol bilong pinisim pasin raskol, o helpim ol long painim rot bilong pinisim pasin bilong bel nogut long man bilong narapela lotu na pinisim ol narapela pasin birua. Na ol i no inap tru long pinisim ol samting bilong graun i gat strong inap long bagarapim planti man, olsem bikpela win o tait wara samting. Ol i larim pasin bilong litimapim kantri i stap yet, na dispela pasin i as bilong planti hevi. Sori tru, ol manmeri bilong graun i no bin tingim wanpela gutpela rot bilong stretim ol hevi.
Tasol i gat rot bilong stretim! God i tok promis pinis long kamapim olgeta gutpela samting ol man i laik tru bai i kamap, na dispela promis i no inap lus nating, long wanem God “em i no save giaman.” (Taitus 1:2) Em i save tru long ol samting em i mas mekim bilong stretim ol hevi, na em i gat bikpela save na strong inap long mekim ol samting em i bin tok long mekim.—Kamapim Tok Hait 7:12; 19:1.
God i tok promis olsem: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.”—Buk Song 37:10, 11.
Dispela gutpela samting bai kamap olsem wanem? Aisaia 11:9 i tok: “Long olgeta ples antap long maunten bilong Bikpela, olgeta samting bai stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” Em nau, bai olgeta manmeri i skul na bai ol i “save tru long Bikpela [Jehova].” Na ol manmeri i bikhet na sakim tok bilong em bai ol i no inap i stap moa na bagarapim bel isi bilong ol narapela man. Dispela gutpela graun yumi stap long en i no ken bagarap moa.
Long Buk Song 46:8, 9 Baibel i tok: “Kaman! Yupela lukim wok Bikpela i mekim. . . . Em i save mekim i dai pait long olgeta hap graun.” (Lukim tu Maika 4:3, 4.) Wanpela bikpela samting bilong kamapim gutpela taim long olgeta hap bilong graun, em olsem: Narapela lain i no ken birua moa long narapela lain. Bai i gat wanpela gavman tasol i bosim olgeta hap bilong graun—em gavman bilong God—olsem na olgeta man bai sindaun gut wantaim na wok gut wantaim. Na gavman bilong God em i wanpela Kingdom em “bai i stap oltaim oltaim.” (Daniel 2:44) Na tu, King bilong dispela Kingdom em Krais Jisas, em i kirap bek pinis na em i no inap i dai moa. Em bai mekim stretpela kot, na em bai bihainim stretpela pasin tasol na bosim gut ol manmeri.—Aisaia 9:6, 7; 32:1.
Tasol olsem wanem? Sin yumi kisim long Adam, na pen, na sik, na bel hevi, na i dai bai i stap yet na bagarapim sindaun bilong ol man? Nogat. Ol dispela samting bai pinis na kamap olsem ‘ol samting bilong bipo.’ Tok bilong Kamapim Tok Hait 21:4 i gat gutpela tok promis olsem: “Em bai i mekim drai wara i stap long ai . . . bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Long rot bilong ofa bilong Jisas bai God i tekewe sin ol man i kisim long Adam na bai ol i kamap stretpela olgeta. (Rom 6:23; Efesus 1:7) Na Man bilong wokim olgeta samting em inap bosim win na ren samting, na bai ol dispela samting i no ken bagarapim ol man, a?—Buk Song 148:5-8; Aisaia 30:30.
Ol gutpela samting ol man i laik tru bai i kamap, em bai God i kamapim. Tasol em bai mekim long wanem taim? Ol tok profet bilong Baibel i makim olsem em bai mekim long wanpela taim ol lain long graun i “belhat tru” na “ol man i bin bagarapim graun.” (Kamapim Tok Hait 11:18) Long las taim bilong olpela pasin bai “planti hevi nogut tru” i kamap—na yumi lukim ol dispela hevi i kamap long nau. (2 Timoti 3:1-5, 13) Na Jisas i tok profet olsem ol manmeri i stap long taim ol dispela samting i kamap, bai ol i lukim God i truim ol tok promis bilong em.—Matyu 24:3-14, 32-34.
Gutpela sapos yu makim taim bilong skelim ol dispela tok promis i stap long Baibel. Long wanem ol man i gat save na God yet ol i gat wankain tingting olsem: Nau em i taim bilong nupela taim i mas kamap long graun!