Yumi Mas i Gat Man Bilong Harim

YUMI ol manmeri i save wok strong bambai yumi inap i stap belgut na amamas. Tasol taim hevi i painim yumi, sapos i gat wanpela man yumi ken toktok wantaim em na kamapim hevi bilong yumi long em, dispela inap mekim gut bel bilong yumi!

Wanpela dokta i tok: “Sapos i gat wanpela man yu inap toktok wantaim em long ol hevi bilong yu, dispela inap mekim isi tingting bilong yu, na helpim yu long kisim stretpela tingting long hevi bilong yu, na planti taim dispela i helpim yu long save long rot bilong stretim hevi.” Narapela dokta i tok: “Yumi olgeta mas kamapim hevi bilong yumi long narapela. Yumi olgeta yumi laik bai i gat wanpela man long dispela graun, em i redi long harim na em inap pilim hevi bilong yumi.”

Tru tumas, i no gat wanpela man long dispela graun i ken inapim tru dispela laik bilong yumi. Taim yumi gat hevi na yumi laik tru long wanpela i helpim yumi, ating ol i no gat taim o narapela samting i mekim na ol i no inap helpim yumi, o ating yumi gat tupela tingting long kamapim sampela hevi bilong yumi long ol narapela, maski ol i pren tru bilong yumi.

Tasol long olgeta taim ol Kristen tru i gat man bilong harim, long wanem, long olgeta taim ol inap beten. Planti taim Baibel i strongim yumi long beten long God, em Man bilong wokim yumi, nem bilong em Jehova. Baibel i tok, yumi mas givim bel long beten, na beten long nem bilong Jisas, na beten bilong yumi i mas stret wantaim laik bilong God. I stret yumi ken beten askim God long ol samting bilong yumi yet, na ol samting ol narapela i no ken save long en. Long Filipai 4:​6, Baibel i tok: “Yupela i mas tokim God long olgeta hevi bilong yupela.” Dispela em i olsem wanpela gutpela presen tru God i givim long yumi! Ol wokboi bilong Nambawan Bikpela bilong heven na graun, em ol i gat pasin daun, taim ol i laik toktok wantaim em long rot bilong beten, em i save amamas long harim beten bilong ol.​—⁠Buk Song 83:18; Matyu 6:​9-15; Jon 14:​13, 14; 1 Jon 5:14.

Tasol tru God i save harim beten bilong yumi na helpim yumi? Ating sampela man i ting olsem taim man i beten, em i helpim em yet, long wanem, em i skelim gut tingting bilong em na tokim God long en na dispela i helpim em long save long as tru bilong hevi bilong em, na em i wok long tingim rot bilong stretim, na em i was long olgeta samting em inap helpim em long stretim. Taim em i stretim pinis hevi, ating bai em i litimapim nem bilong God na tok, God i bin harim beten bilong em na helpim em, tasol tingting bilong em yet na ol wok em yet i bin mekim i bin stretim dispela hevi.

Long nau planti man i ting, long dispela rot tasol pasin bilong beten i save helpim yumi. Yu ting olsem tu? Yu ting long dispela rot tasol beten i gat strong bilong helpim yumi? Tru, man yet i mas wokim tingting na mekim sampela wok i stret wantaim beten bilong em, dispela em bikpela samting bambai samting bilong helpim em i ken kamap olsem em i bin beten askim God long en. Tasol God i mekim wanem wok? Taim yu beten, God i save harim? Em i tingim beten bilong yu i bikpela samting? Yu ting em i tingim gut ol samting yu beten long en, na em i helpim yu?

Bekim bilong ol dispela askim em bikpela samting. Sapos God i no harim ol beten bilong yumi, i no gat wok long beten, long wanem, beten i no helpim tru yumi, em i mekim isi bel na tingting tasol. Tasol sapos God i harim ol beten bilong yumi na tingim gut, yumi mas tenkyu tru long em long dispela samting em i givim long yumi bilong helpim yumi, em pasin bilong beten! Dispela i mas kirapim yumi long beten long olgeta de.

Mipela laik bai yu ken kaunim stori i kamap bihain long dispela, em dispela stori bai bekim ol dispela askim.