Tok Profet Long Bikpela Hangre

NAU long dispela taim ol nius i stori long ol bikpela hangre tru i bin kamap long sampela hap. Yumi bin lukim piksa bilong ol lain bilong Itiopia na sampela hap moa ol i hangre nogut tru na ol i bun nating. Long 1992 ol nius i stori long bikpela hangre i bin kamap long Somalia, em bikpela san na bikpela pait bilong dispela hap i as bilong en. Wanpela nius bilong Septemba 1992 i tok: “Yumi no save tru hamas manmeri bilong Somalia i bagarap, tasol lain Retkros i tok, em i winim 100,000. Planti handet o tausen i save dai long olgeta de.”​—⁠Nius International Herald Tribune.

Tasol maski yumi save hamas ol i bin i dai, dispela i no kamapim klia bikpela pen na hevi ol dispela lain i karim. Ol i stap tarangu tru. Wanpela meri (Yvette Pierpaoli) em i olsem maus bilong wanpela lain (Refugees International) bilong helpim ol ranaweman, olsem refyuji, em i raitim tok long wanpela nius bilong Yunaitet Nesen (Refugees) olsem: ‘Long Nu Yok o Jeniva ol i save kolim tasol ol bikpela bikpela namba. Tasol long ol longwe longwe hap, long ol kantri i gat planti pait long en, taim yumi lukim bikpela hevi bilong ol man em ol i stap tarangu tru, bel bilong yumi i pas stret na yumi laik krai.’

Dispela lain Retkros i tok, ol i bin mekim bikpela wok moa bilong givim kaikai long ol Somalia i gat bikpela hangre. Tasol planti man i tok, dispela ol kaikai i no inap, na ol i bin lusim taim long mekim dispela wok, na nau kaikai i no inap helpim ol man. Dispela meri (Yvette Pierpaoli) i tok: “Nau ol kantri i les pinis na ol i no laik helpim Afrika moa, long wanem, planti birua na pait tumas i kamap long en. . . . Ol i tok, em asua bilong ol Afrika na ol i no mekim gut ol wok bilong ol, na ol bikman bilong gavman i mangal long mani samting, na ol pait i no gat malolo bilong en.”

Baibel i tok profet long taim bilong bikpela hangre bai kamap long ol narapela narapela hap bilong graun. Olsem na dispela bikpela hangre nau i kamap, na ol bikpela pait na guria na kain kain sik, ol i makim olsem Kingdom bilong God i klostu pinis. (Luk 21:​11, 31) Na Baibel i tok tu olsem taim dispela gutpela Kingdom o gavman bilong God i bosim graun, bai i gat planti kaikai bilong olgeta man. Baibel i tok: “Planti rais na wit samting i ken kamap long ol gaden bilong ol manmeri.”​—⁠Song 72:⁠16.