Ol Kristen i Wok Strong Long Briten

Wanpela nius (The Economist) i tok, long olgeta 56 milion manmeri i stap long Briten, aninit long 10 pesen (olsem 5 milion 600 tausen) ol i strongpela Kristen. Long ol Sande, ol manmeri i save go long lotu ol i no winim 4 milion. Long ol dispela manmeri, wan milion tasol em ol Angliken. Tasol maski planti i no bilip tumas long lotu, Sios Bilong Inglan i stap olsem namba wan lotu bilong Briten. Na nius i tok, “Inap longtaim pinis, Briten i no kantri Kristen, tasol em i no laik tokaut olsem.” Olsem na yumi no kirap nogut long harim olsem ol man bilong politik na sampela nius tu ol i laik bai dispela lotu Sios Bilong Inglan i no ken i stap moa olsem namba wan lotu bilong Briten na insait long ol samting bilong gavman.

Wanpela edita bilong dispela nius (The Economist) long bipo, em Walter Bagehot, em i bin tok, ‘taim ol man bilong graun i givim bel long ol samting bilong graun tasol, na long maus tasol ol i tok ol i Kristen, ol i stap nogut tru.’ Bipo Jisas i bin tok, ol disaipel bilong em i “no bilong dispela graun.” (Jon 17:16) Tasol Jisas i salim ol i go namel long ol man bilong graun bilong autim tok bilong Kingdom bilong God. Long nau tu, ol Witnes Bilong Jehova i gat nem long givim bel long i go long ol haus na autim tok.​—⁠Aposel 20:⁠20.

Ol Witnes Bilong Jehova long Briten ol inap olsem 126,173, na dispela i no planti sapos yumi skelim wantaim bikpela lain Angliken ol i stap, tasol ol wan wan i lusim 20 aua samting long olgeta mun long bung long ol miting Kristen bilong ol. Na long 1992 ol wan wan Witnes i bin lusim 16 aua long olgeta mun long autim gutnius bilong Kingdom bilong God long ol man, em dispela gavman liklik taim bai kamapim nupela taim na stretpela pasin long graun. (Matyu 24:14; 2 Pita 3:⁠13) Orait, taim ol Witnes i go long haus bilong yu bihain, gutpela yu putim yau long tok ol i autim na bai yu ken save, wanem samting i kirapim ol na ol i wok strong olsem.