Yu Tingim Yet?
Olsem wanem? Yu pilim ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim long en, yu tingim yet o nogat:
▫ Bilong wanem ol Witnes Bilong Jehova i wok long kam yet long haus bilong ol man?
Ol Witnes Bilong Jehova i laik bai God i mekim gut long ol yet long rot bilong Kingdom, na ol i laik bai God i mekim olsem long ol narapela man tu, long wanem, ol i laikim tru ol. Olsem na pasin sori i mekim na ol i strong long i go long haus bilong ol man. (Matyu 6:9, 10; 22:37-39)—8/15, pes 8, 9.
▫ Ol man i bilip long tok bilong evolusen, bilong wanem ol i bilip nating?
Ol saientis i no bin lukim ol bikpela senis ol i tok i kamap long ol jin na dispela i mekim na ol nupela nupela kain samting i kamap. Tasol ol i ting, long dispela rot yet ol nupela kain samting i gat laip i bin kamap. Ol i strong long tok, long pastaim tru wanpela liklik samting i no gat laip em i bin kamap laip, tasol ol i no bin lukim kain samting olsem i kamap.—9/1, pes 5.
▫ Sapos samting i pasim yumi na yumi bel hevi long dispela, yumi ken mekim wanem bilong daunim dispela bel hevi?
Maski yumi gat wanem kain sindaun, yumi mas tingim ol samting yumi inap mekim; yumi no ken bel hevi long ol samting yumi no inap mekim. Olsem bai yumi stap belgut, na amamas long mekim wok bilong Jehova. (Song 126:5, 6)—9/1, pes 28.
▫ Pasin bilong lusim rong bilong man i helpim yumi olsem wanem?
Em inap helpim yumi long i stap gut wantaim ol narapela (Efesus 4:32); em inap helpim yumi long i stap wanbel wantaim ol, na helpim yumi yet long i stap bel isi (Rom 14:19; Kolosi 3:13-15); sapos yumi lusim sin bilong ol narapela bai God inap lusim sin bilong yumi (Matyu 6:14); em inap helpim yumi long tingim olsem yumi tu i gat sin na God i mas lusim. (Rom 3:23)—9/15, pes 7.
▫ Olsem wanem pasin bilong profet Amos i helpim yumi long mekim wok bilong autim tok?
Olsem Amos, yumi tu i bihainim tok na autim stret ol tok bilong God maski ol man i ting olsem wanem long en.—9/15, pes 17.
▫ Kolim sampela pasin bilong God yumi mas bihainim?
Tupela pasin bilong Jehova em pasin bilong stretim gut ol wok na pasin bilong amamas. (1 Korin 14:33; 1 Timoti 1:11) Dispela tupela pasin i stret wantaim; God i no strong moa long wanpela, winim narapela.—10/1, pes 10.
▫ Sampela papamama i bin mekim wanem ol gutpela samting bilong helpim ol pikinini bilong ol long lotuim Jehova?
Yu mas kirap long helpim pikinini long taim em i liklik yet. Ol samting pikinini i lain long en taim em i liklik yet, em i no save lusim long taim em i bikpela pinis. (Sindaun 22:6) Na yu mas skulim em long bihainim tok bilong Jehova na tingim em gut na laikim lotu bilong em long taim em i stap long ol miting. Ol papamama i lainim gut pikinini ol i save long ol liklik pasin kranki sin i kamapim long pikinini na ol i helpim em long stretim. (Sindaun 22:15) Las tru, taim pikinini i liklik yet yu mas putim sampela mak em inap winim long mekim wok bilong God.—10/1, pes 27-28.
▫ Yumi mas wok long bihainim wanem pasin bilong Jehova long lusim rong bilong man na i narapela kain?
Jehova i save lusim rong bilong man na lusim tingting long en tu. (Jeremaia 31:34) Yumi ol man i hatwok long mekim kain pasin olsem. Long Matyu 6:14, 15 Jisas i kamapim klia, em bikpela samting long yumi mas mekim olsem.—10/15, pes 25-26.
▫ Wanem tripela samting i pasim rot bilong yumi long mekim pasin sori?
Sin i stap long yumi, olsem na pasin bilong bel nogut long narapela inap kamap. Sapos yumi bel nogut long narapela, olsem wanem yumi inap mekim pasin sori long em? Sapos yumi lukim ol piksa o spot i gat pait na bagarapim man, dispela tu bai pasim pasin sori. Dispela inap pinisim pasin bilong yumi long sori long man i karim pen. Na man i tingim em yet tasol, ating em i no gat pasin sori. (1 Jon 3:17)—11/1, pes 19, 20.
▫ Stori bilong Jop long Baibel i lainim yumi long wanem samting?
Stori bilong Jop i kirapim yumi long tingim ol pasin hait bilong Satan, na yumi ken save tu, pasin bilong i stap gut long Jehova i insait long dispela bikpela tok long husat i mas i stap King bilong heven na graun. Traim bai painim olgeta man i laikim tru Jehova, olsem i bin painim Jop. Yumi inap i stap strong olsem Jop, na kamapim ples klia olsem Satan i giaman, na kisim ol blesing bilong Kingdom.—11/15, pes 20.
▫ Siaman bilong lain elda i ken mekim wanem bilong tingim ol elda wan wan?
Siaman i ken wokim sedyul paslain long miting na bai ol narapela elda i gat taim bilong beten na tingim gut olgeta tok bilong sedyul. Taim ol elda i bung, bai em i no strong long ol narapela elda i mas bihainim tingting bilong em, tasol em bai kirapim ol long “tokaut” long tingting bilong ol long ol samting ol i toktok long en. (1 Timoti 3:13)—12/1, pes 30.