Tingim Laip Tru i Gutpela Samting Moa
YU TING yumi stap laip long nau na em tasol? Baibel i tokim yumi long tingting strong long “kisim dispela laip em i laip tru.” Em nau, Baibel i makim olsem i no laip bilong nau tasol yumi mas tingim. (1 Timoti 6:17-19) Orait, wanem laip em i laip tru?
Ol tok i stap klostu long dispela skripsa i soim yumi, ol man i pret long God ol i mas wok strong long kisim “laip i stap gut oltaim oltaim.” (1 Timoti 6:12) Planti man ol inap kisim laip i stap oltaim long graun. Adam, em namba wan man, em inap i stap oltaim long gutpela paradais long graun. (Stat 1:26, 27) Tasol sapos em i kaikai pikinini bilong ‘diwai bilong givim save long wanem samting i gutpela na wanem samting i nogut,’ em bai i dai. (Stat 2:17) Tasol Adam na meri bilong em Iv i bikhet na ol i kaikai pikinini bilong dispela diwai, olsem na God i tok ol i mas i dai. Long de ol i kisim dispela kaikai, long ai bilong God i olsem ol i dai, na skin bilong ol i kirap long bagarap na ol i stap long rot bilong i dai. I stap bilong ol i no gutpela moa olsem bilong pastaim.
Rot i Go Long “Laip Tru”
Bilong yumi ken kisim dispela “laip tru,” God Jehova i stretim rot bilong kisim bek ol man. Bilong save gut long dispela samting em i mekim, yumi ken tok piksa long wanpela liklik haus faktori. Olgeta masin long en i bagarap liklik na ol wokman i gat hatwok tru, long wanem, namba wan wokman long bipo tru i no bihainim toksave long buk i stori long wok bilong ol dispela masin. Olsem na olgeta masin i no wok gut. Ol wokman bilong nau i mas mekim wok long ol dispela masin—i no gat narapela. Papa bilong faktori i laik helpim ol wokman na em i tingting long stretim gut ol masin, na em i wok long putim sampela mani bilong mekim dispela wok.
Orait, namba wan ‘man bilong mekim wok long masin,’ em Adam, em i no ting dispela laip God i bin givim long em i gutpela samting tru. Olsem na laip em i givim long ol pikinini bilong em i no gutpela; em i olsem ol dispela masin i no wok gut. (Rom 5:12) Ol wokman bilong bihain i no inap stretim ol dispela masin, na olsem tasol ol pikinini bilong Adam i no bin inap long kisim dispela laip tru. (Song 49:7) Bilong stretim dispela hevi i olsem i no gat rot long stretim, Jehova i salim dispela wanpela Pikinini bilong em i kam long graun bilong baim bek laip oltaim bilong givim long ol man. (Luk 1:35; 1 Pita 1:18, 19) Krais Jisas, em dispela wanpela Pikinini bilong God, em i dai na givim skin bilong em olsem ofa bilong helpim ol man, na dispela i olsem pe—em laip i wankain stret olsem laip bilong Adam i bin lus. (Matyu 20:28; 1 Pita 2:22) Dispela gutpela ofa i mekim na nau Jehova inap givim laip tru long ol man.
Ofa bilong Jisas i mekim na ol man i bihainim tok bilong God ol inap kisim laip i stap oltaim long Paradais long graun. (Song 37:29) Olgeta manmeri i abrusim bagarap long “pait long dispela bikpela de bilong God I Gat Olgeta Strong,” em Baibel i kolim Armagedon, ol inap kisim dispela gutpela samting. (KTH 16:14-16) Dispela pait bai pinisim olgeta pasin nogut bilong graun. (Song 37:9-11) Ol manmeri i dai paslain long Armagedon na ol i stap long tingting bilong God, ol bai kirap bek long Paradais taim em i kamap pinis long graun, na bai ol i gat rot long kisim dispela laip tru em i bilong olgeta man i bihainim tok bilong God.—Jon 5:28, 29.
Laip Bilong Nau i Gutpela Samting
Tasol dispela i no as na yumi ken ting laip bilong yumi long nau i samting nating, nogat. Sapos wokman i no lukautim gut masin, yu ting papa bilong faktori bai lusim bikpela taim na mani long stretim gut dispela masin? Nogat, a? Taim em i stretim gut em bai givim long wokman i bin wok strong long lukautim olpela masin.
Laip em i gutpela presen Jehova i givim long yumi. Olsem na em i laik bai yumi tingim dispela laip i gutpela samting tru. (Song 36:9; Jems 1:17) Jisas i soim yumi, Jehova i save tingim ol man bilong graun, na Jisas i tok: “God i kaunim pinis olgeta gras long het bilong yupela.” (Luk 12:7) Jehova i tokim ol Israel, ol i no ken kilim man i dai, olsem na yumi save, man i no ken kilim i dai em yet. (Kisim Bek 20:13) Dispela i helpim yumi long abrusim tingting olsem yumi inap kilim i dai skin bilong yumi sapos yumi laik mekim.
Ol man i pret long God ol i save Jehova i tingim yumi, olsem na ol i skelim ol lo bilong Baibel wantaim ol samting ol man i mekim long nau. Olsem: Jehova i tok long ol Kristen tru i mas ‘rausim olgeta doti bilong bodi na bilong spirit, na ol i mas kamap klin olgeta long ai bilong em,’ olsem na ol i klia long smok na ol drak i save paulim tingting bilong man na kalabusim em.—2 Korin 7:1.
Na God i tok yumi mas “i stap bel isi” na abrusim pasin pamuk. (Sindaun 14:30; Galesia 5:19-21) Sapos yumi bihainim ol dispela lo, ol samting nogut em belhat i save mekim long skin bilong man, na ol sik bilong pamuk, i no inap painim yumi.
Na Jehova i tok, yumi no ken kaikai na dring planti tumas na winim skel. Dispela tu i makim olsem em i tingim yumi. (Lo 21:18-21; Sindaun 23:20, 21) Baibel i toksave olsem, ol man bilong mangal (long planti kaikai tu) na ol man bilong dring longlong ol i no inap i go insait long Kingdom bilong God—olsem ol i no inap kisim laip tru. (1 Korin 6:9, 10; 1 Pita 4:3) Jehova i laik kirapim yumi long mekim ol samting long skel, na long dispela rot em i lainim yumi long pasin bilong helpim skin bilong yumi bambai yumi ken i stap gutpela.—Aisaia 48:17.
Taim yumi bihainim ol lo bilong God, dispela i makim olsem yumi ting laip bilong yumi bilong nau i gutpela samting tru. Tasol “laip tru” i bikpela samting moa. Em laip i stap oltaim oltaim, olsem na em i bikpela samting moa long ol Kristen tru, winim laip bilong nau. Taim Krais Jisas i dai olsem ofa, em i daun long laik bilong Jehova. Pasin bilong bihainim tok bilong Papa i bikpela samting tru long em, winim laip bilong em hia long graun. Olsem na Jehova i kirapim em bek na givim em laip i stap oltaim long heven na em i no inap i dai moa. (Rom 6:9) Na indai bilong em i opim rot bambai ol man i bihainim tok bilong God na bilip long ofa bilong Jisas ol inap kisim laip i stap oltaim.—Hibru 5:8, 9; 12:2.
Bikpela Lo Bilong Blut
Lain bilong Jisas i gat wankain tingting olsem bilong em. Ol i laik mekim olgeta samting God i save laikim. Long dispela as ol i save sakim blut, em sampela dokta i tok em i helpim man long i stap laip. Orait, nau yumi ken stori long olsem wanem pasin bilong sakim blut i makim olsem man i tingim dispela “laip tru” i gutpela samting moa.
Ol Kristen tru i gat wankain tingting olsem bilong Krais Jisas—ol i laik i stap laip long ai bilong God, na bilong mekim olsem ol i mas bihainim olgeta tok bilong Em. Baibel i tokim lain bilong Krais: “Yupela i no ken kaikai abus ol i bin kilim bilong mekim ofa long ol giaman god. Na yupela i no ken kaikai abus i gat blut i stap yet long en, . . . na yupela i mas abrusim olkain pasin pamuk.” (Aposel 15:28, 29) Bilong wanem dispela lo bilong blut em i wanpela lo ol Kristen i mas bihainim?
Lo God i bin givim long ol Israel i tok ol i no ken kaikai blut. (Wok Pris 17:13, 14) Tru, ol Kristen i no aninit long Lo Bilong Moses. Tasol ol i save, dispela tambu long kaikai blut em i bin i stap paslain long taim Moses i kisim Lo; God i bin givim long Noa bihain long Tait Wara. (Stat 9:3, 4; Kolosi 2:13, 14) Dispela lo i bilong olgeta pikinini bilong Noa, em olgeta lain bilong graun i bin kamap long ol. (Stat 10:32) Na tu, Lo Bilong Moses i helpim yumi long save, i gat wanem as na God i tambuim blut. Taim God i tambuim ol Israel long kaikai blut, maski em i wanem kain blut, bihain em i tok: “Blut i save givim laip long olgeta man na animal. Olsem na . . . pris i mas kapsaitim blut bilong ofa long alta, bilong tekewe ol sin bilong yupela.” (Wok Pris 17:11) God i makim wanpela wok tasol bilong blut, em bilong kapsaitim long alta. Lo bilong God long blut i kamapim klia olsem em yet i bosim olgeta samting i gat laip long graun. (Esekiel 18:4; KTH 4:11) Taim yumi kisim tingting bilong Jehova long laip bilong yumi, yumi save dispela laip i no bilong yumi yet—God yet i givim long yumi olsem wanpela samting bilong lukautim.
Olsem dispela masin bos i givim long wokman na em i mas lukautim gut, olsem tasol God i givim laip long yumi bilong lukautim gut. Sapos masin bilong yu i bagarap liklik na wanpela mekenik i tok long senisim sampela hap na putim ol nupela hap em buk i tok i tambu long putim, bai yu mekim wanem? Bai yu go askim ol narapela mekenik long tokim yu long rot bilong stretim olsem dispela buk i makim, a? Tasol laip bilong man i bikpela samting moa na i winim tru wanpela masin. Long Baibel, em buk i stori long rot bilong helpim ol man long i stap laip, Man bilong wokim yumi em i tambuim ol man long mekim wok long blut bilong helpim ol long i stap laip. (Lo 32:46, 47; Filipai 2:16) Orait, i gutpela yumi bihainim tok bilong dispela buk, a?
Taim ol sikman Kristen i askim dokta long givim sampela samting long ol i no gat blut long en, i no olsem ol i sakim olgeta marasin samting bilong dokta, nogat. Ol i laik bai ol samting dokta i mekim long ol i soim olsem ol i tingim laip bilong ol bilong nau na bilong bihain tu i bikpela samting. Ol dokta i strongim bel na mekim ol samting ol sikman Kristen i orait long en, ol i tokaut olsem dispela samting i bin helpim ol dispela Kristen. Wanpela dokta bilong katim man pastaim em i save mekim bikpela wok long blut, em i tok: ‘Taim mi bungim ol Witnes Bilong Jehova, nau mi kisim tingting long wanem samting i bikpela samting.’ Nau taim em i katim ol man i no Witnes tu, em i save wok strong na bai em i no mekim wok long blut.
Tingim Dispela Laip Tru
Taim dispela dokta i katim ol Witnes Bilong Jehova, em i kisim wanem nupela tingting? Nau em i save, taim em i laik helpim sikman, em i no ken tingim dispela hap bilong skin i gat sik long en—em i mas tingim dispela man yet. I stret sikman i ken makim wanem samting i gutpela bilong helpim em long skin na long spirit na long i stap bel isi tu.
Kumiko i gat 15 krismas na em i gat sik long blut (lukimia) em inap bagarapim man, tasol em i strong long sakim blut. Em i no laik traim long skruim sampela wik o mun o yia long laip bilong em bilong nau na bihain bai em i lus long kisim laip i stap oltaim. Em i bin dediketim laip bilong em bilong nau long God Jehova olsem wanpela Witnes bilong em, olsem na em i daun long lo bilong God long laip na blut. Papa na sampela wanblut moa bilong em i strong long em i mas kisim blut, tasol em i sanap strong. Wanpela taim dokta i askim Kumiko: “Sapos God bilong yu i save lusim ol rong bilong yu, orait sapos yu kisim blut, em bai lusim dispela rong tu, a?” Tasol Kumiko i no pundaun na lusim bilip bilong em. Em i “holimpas tok i gat laip,” na em i sanap strong. (Filipai 2:16) Bubu meri bilong em i no bilip, tasol em i tok, “Kumiko i no inap lusim bilip bilong em.” I no longtaim na tingting bilong papa na bubu meri na ol dokta i senis.
Bel bilong planti manmeri i pilim tru strongpela bilip bilong Kumiko long God Jehova, em inap kirapim bek Kumiko long matmat. Taim em i stap laip yet, em i tokim papa bilong em: “Maski sapos mi dai, God bai kirapim mi bek long Paradais. Tasol sapos yu bagarap long Armagedon, bai mi no inap lukim yu. Olsem na plis yu mas stadi long Baibel.” Oltaim papa i tokim em: “Taim yu orait pinis, bai mi mekim.” Tasol taim Kumiko i dai, papa i putim wanpela liklik pas insait long bokis bilong em, i tok: “Kumiko, bai mi lukim yu long Paradais.” Taim ol i mekim pinis bung bilong planim em, papa i tokim sampela i bin kam long bung: “Mi tok promis long Kumiko, bai mi lukim em long Paradais. Tru mi no bilip yet long dispela, long wanem, mi no stadi gut yet, tasol mi tingting pinis long skelim gut dispela tok. Yupela i mas helpim mi.” Sampela moa long famili bilong em ol tu i kirap stadi long Baibel.
Laip i bikpela samting long Kumiko na em i laik i stap laip. Na em i pilim tru ol samting ol dokta i bin mekim bilong lukautim laip bilong em bilong nau. Tasol em i bihainim tok i stap long buk bilong dispela Man bilong wokim yumi, na em i kamapim klia olsem em i tingim “laip tru” i gutpela samting moa. Planti milion manmeri bai kisim dispela laip tru, olsem laip i stap oltaim long Paradais long graun. Bai yu insait long dispela lain?