Yu Ting Laip i Gutpela Samting?
WANPELA manki i stap long namba 8 plua bilong wanpela bikpela haus na em i kalap i go daun na i bagarap. Em i bin kaunim wanpela buk i tok, sapos man i stap antap tru na kalap i go daun, “em i no inap pilim pen o bel i guria o pret, nogat; em bai pilim gutpela.” Man bilong raitim dispela buk ol i bin wokim long Japan, em i tok, em i laik helpim ol man na bai ol yet i ken tingim samting ol i laik mekim long laip bilong ol.
Ol man i save bagarapim skin bilong ol yet, i no ol tasol i ting laip em i samting nating. Ol man i mekim nabaut long draivim ka ol tu i mekim olsem laip bilong man i samting nating. Sampela man i save dring na draivim ka, na i olsem ol i spit i go long rot bilong bagarap.
Sampela i tingting oltaim long painim amamas, na dispela i kamapim tingting bilong ol, ol i ting laip bilong ol i samting nating. Ol man bilong smok i no laik lusim smok, maski em inap bagarapim ol na em i gat nem olsem samting bilong kilim man i dai isi isi. Na long nau tingting bilong maritpasin i kamap strong tru long graun, na planti man ol i no laik bihainim stretpela pasin; ol i tingting tasol long mekim pasin pamuk samting, na dispela i save bagarapim planti man na ol i dai.
Na sampela i save kaikai na dring planti, na ol i no mekim planti eksasais, na ol i tingting oltaim long painim amamas, na dispela i sotim laip bilong ol. Shinya Nishimaru bilong Japan, em man bilong raitim buk, em i tokaut olsem: ‘Sapos man i kaikai planti oltaim, skin i no inap mekim gut wok bilong en; na pasin bilong mekim ol samting i no gat hatwok, na painim amamas oltaim, dispela i pinisim strong bilong man.’ Sampela i bihainim tingting bilong ol man bilong bipo em ol i bin tok: “Kam, yumi kaikai na dring, long wanem, tumora bai yumi dai.”—Aisaia 22:13; 1 Korin 15:32.
Tru tumas, long nau planti man i ting laip em i samting nating. Olsem na i gutpela yumi askim olsem: Yu ting laip i gutpela samting? Yumi mas lukautim gut laip bilong yumi, maski yumi mas mekim wanem samting? I gat wanpela samting i winim tru laip bilong yumi bilong nau?