Askim

Sapos man i kilim i dai em yet, i orait long brata Kristen i ken mekim tok bilong planim em?

Brata Kristen yet i mas skelim olsem bai em inap stap stret long ai bilong God sapos em i mekim tok bilong planim man i bin kilim i dai em yet o nogat. Taim em i skelim dispela, i gutpela sapos em i tingim ol dispela askim: Jehova i ting olsem wanem long pasin bilong man long kilim i dai em yet? Taim dispela man i kilim i dai em yet, em i gat laik tru long mekim? Sik bilong tingting o bikpela bel hevi i bin kirapim em na em i mekim? Ol man bilong ples i gat wanem tingting long dispela pasin?

Yumi ol Kristen i laik save long tingting bilong Jehova long dispela pasin. Long ai bilong Jehova, laip bilong man em i wanpela gutpela samting tru na i samting holi. (Stat 9:5; Song 36:⁠9) Sapos man i tingting pastaim na em i kilim i dai em yet, God i nolaik tru long dispela pasin. (Kisim Bek 20:13; 1 Jon 3:​15) Orait olsem wanem? Dispela i makim olsem Kristen i no ken mekim tok bilong planim man i bin kilim i dai em yet?

Tingim samting i bin painim King Sol bilong Israel. Taim Sol i save pinis em i no inap abrusim bagarap long laspela pait em i mekim wantaim ol Filistia, em i no laik bai ol dispela birua i kam na mekim nogut long em, olsem na em “i holim bainat bilong em yet na pundaun antap long sap bilong [en].” Taim ol Filistia i painim pinis bodi bilong em, ol i nilim long banis bilong taun Betsan. Orait taim ol Jabes i harim tok long dispela samting ol Filistia i bin mekim, ol i kisim bodi bilong Sol na kukim long paia. Mekim pinis, orait nau ol i kisim ol bun bilong em na planim. Na ol i tambu long kaikai inap 7-pela de​—⁠em wanpela pasin tumbuna ol Israel i save mekim bilong krai sori long man i dai pinis. (1 Samuel 31:​4, 8-​13; Stat 50:10) Taim Devit, em man Jehova i bin makim bilong kamap king, em i kisim save long dispela samting ol Jabes i bin mekim, em i tok: “Bikpela i ken mekim gut long yupela, long wanem, yupela i bin mekim gutpela pasin long Sol, king bilong yupela, na yupela i planim bodi bilong en. Na nau Bikpela i ken lukautim yupela gut na stap wantaim yupela oltaim.” (2 Samuel 2:​5, 6) Baibel i no tok olsem samting ol Jabes i bin mekim long King Sol em i wanpela rong, nogat. Yumi ken skelim dispela samting wantaim stori bilong ol man i bin mekim pasin nogut na ol i no bin planim ol. (Jeremaia 25:​32, 33) Taim wanpela man i kilim i dai em yet na brata i mas skelim olsem em bai mekim tok bilong planim dispela man o nogat, em i ken tingim dispela stori bilong Sol.

Na ating brata i ken tingim as bilong mekim tok bilong planim man. Ol Witnes Bilong Jehova i no save bilip olsem man i gat wanpela spirit i no save dai, olsem na taim ol i mekim tok bilong planim man, ol i no kamapim dispela tingting kranki olsem dispela man i bin go long wanpela ples spirit, nogat. Tok bilong planim man i no bilong helpim dispela man i dai pinis, nogat. Namba wan as na ol i mekim dispela tok, em bilong mekim gut bel bilong ol man i krai sori na bilong helpim ol man i kam long dispela bung long save long wanem samting tru i painim man i dai pinis. (Saveman 9:​5, 10; 2 Korin 1:​3-5) Narapela as bilong mekim tok bilong planim man, em bilong helpim ol man i kam bung long tingim olsem yumi ol man i save stap sotpela taim tasol. (Saveman 7:⁠2) Orait sapos brata i mekim tok bilong planim man i bin kilim i dai em yet, dispela tok bai inapim ol dispela samting o nogat?

Tru, ating sampela bai pilim olsem dispela man i bin bagarapim laip bilong em long laik bilong em yet, na taim em i mekim olsem, em i save pinis em i mekim rong long Jehova. Tasol planti taim yumi no inap save tru tru long dispela samting, a? Nogut em i kirap wantu tasol na mekim, a? Sampela i traim long kilim i dai ol yet, tasol ol i no inap, na bihain tingting bilong ol i senis na ol i no tingting moa long mekim. Tasol taim man i dai pinis, em i no inap hevi long rong bilong em na tanim bel.

Narapela bikpela samting bilong tingim i olsem: Planti man i kilim i dai ol yet ol i gat bikpela bel hevi o sik bilong tingting na ol i mekim. I no olsem ol i bin tingting gut pastaim na ol i mekim, nogat. Sampela ripot i tok, 90 pesen bilong ol man i kilim i dai ol yet, ol i gat bikpela sik bilong tingting o bikpela bel hevi o ol drak i bosim ol. Orait sapos tingting bilong man i bagarap na em i kilim i dai em yet, olsem wanem? Bai Jehova i lusim tingting long dispela rong? Dispela man i bin mekim wanpela rong Jehova i no inap lusim tingting long en o nogat, em yumi no save. Taim brata Kristen i tingting olsem em bai mekim tok bilong planim man i bin kilim i dai em yet o nogat, ating em i ken tingim i stap bilong dispela man na em i gat sampela sik o nogat.

I gat wanpela samting moa bilong tingim: Ol man bilong ples i gat wanem tingting long pasin bilong man long kilim i dai em yet na long i dai bilong dispela man? Ol elda i tingim gutnem bilong kongrigesen bilong ol Witnes Bilong Jehova long dispela hap ol i laik save long dispela samting. Taim ol elda i save pinis olsem ol man bilong ples i gat wanem tingting long dispela pasin na long i dai bilong dispela man, ating bai ol i no laik insait long dispela samting o larim tok bilong planim dispela man i kamap insait long Haus Kingdom.

Tasol sapos famili yet i stretim ol samting na ol i askim wanpela brata Kristen long mekim tok, orait em samting em yet i mas tingim. Sapos em i orait long mekim olsem, em i mas bihainim gutpela tingting na no ken tokaut stret olsem dispela man bai kirap bek o nogat. Man i dai pinis, Jehova tasol inap givim laip gen long em long bihain. I no gat wanpela man inap tok olsem dispela man bai kirap bek o nogat. Brata i ken kamapim ol tok i tru bilong Baibel long ol samting bilong i dai na sampela tok bilong mekim gut bel bilong ol man i krai sori.