Tingting Bilong Ol Kristen Long Ol Pasin Bilong Planim Man

TAIM wanpela man yu laikim em tru na i olsem em i no gat sik em i dai wantu, dispela em i bikpela hevi tru. Bai yu kirap nogut na bel bilong yu bai bagarap stret. Taim man yu laikim em tru i sik na karim pen inap longpela taim na bihain em i dai, ating yu no kirap nogut long dispela, tasol bai yu bel hevi yet.

Maski man i bin dai wantu o nogat, yumi mas helpim na mekim gut bel bilong famili bilong dispela man i dai pinis. Na wanpela Kristen i krai sori inap kisim sampela hevi tu long ol man i strong long bihainim sampela pasin bilong planim man i no stret wantaim tok bilong Baibel. Dispela i save kamap long planti kantri long Afrika na long sampela narapela hap bilong graun.

Wanem samting bai helpim Kristen em wanpela long famili bilong em i dai pinis, long abrusim ol pasin bilong planim man i no stret wantaim tok bilong Baibel? Olsem wanem ol wanbilip inap helpim em long kain taim nogut olsem? Ol man i laik mekim pasin Jehova i laikim, ol i mas tingim bekim bilong ol dispela askim, long wanem, “pasin bilong Kristen i stap stret olgeta na i no gat asua long ai bilong God Papa bilong yumi, em i olsem: Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol. Narapela samting tu, yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.”​—⁠Jems 1:⁠27.

Wanpela Bilip i As Bilong Dispela Pasin

Wanpela samting i as bilong planti pasin bilong planim man, em ol man i save bilip olsem ol man i dai pinis, ol i stap laip yet long wanpela hap bilong ol tumbuna yumi no inap lukim. Bilong mekim gut long ol dispela man i dai pinis, planti man i krai sori i ting ol i mas mekim sampela pasin bilong ol tumbuna. O ol i pret, nogut ol man bilong ples i kros long ol, long wanem, ol i bilip sampela hevi bai painim ples sapos ol i no bihainim ol pasin bilong tumbuna.

Trupela Kristen i no ken pret long ol man na insait long sampela pasin God i no laikim. (Sindaun 29:25; Matyu 10:28) Baibel i soim olsem, ol man i dai pinis ol i no save long wanpela samting, em i tok: “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting. . . . Bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” (Saveman 9:​5, 10) Olsem na God Jehova i bin tokim lain bilong em bilong bipo, ol i no ken mekim sampela pasin bilong mekim gut long ol man i dai pinis o toktok wantaim ol. (Lo 14:1; 18:​10-12; Aisaia 8:​19, 20) Ol tok i tru bilong Baibel i pait wantaim planti pasin bilong planim man.

Olsem Wanem Long “Maritpasin Bilong Kamap Klin”?

Long sampela kantri long sentral Afrika, man o meri i krai, long wanem, poroman marit i dai, ol i mas mekim maritpasin wantaim wanpela wanblut bilong poroman i dai pinis. Sapos em i no mekim olsem, ol man i bilip olsem man o meri i dai pinis bai bagarapim famili i stap laip. Ol i kolim dispela pasin olsem “maritpasin bilong kamap klin.” Tasol Baibel i tok, man i slip wantaim meri i no poroman marit bilong em, em i mekim pasin “pamuk.” Ol Kristen i mas “stap longwe long pasin pamuk,” olsem na ol i strong long sakim dispela pasin i no stret wantaim tok bilong Baibel.​—⁠1 Korin 6:⁠18.

Tingim wanpela meri wanpis, nem bilong em Mercy.a Taim man bilong em i dai long 1989, ol wanblut i laik Mercy i mas mekim maritpasin bilong kamap klin wantaim wanpela man wanblut. Em i no laik mekim olsem, na em i tokim ol dispela pasin i no stret long lo bilong God. Ol wanblut i bel nogut long em, na bihain long ol i toknogutim em, ol i lusim em. Wanpela mun bihain ol i go insait long haus bilong em na tromoi nabaut ol samting na rausim kapa long rup. Ol i tok: “Misin bilong yu i ken lukautim yu.”

Kongrigesen i mekim gut bel bilong Mercy, na ol i wokim nupela haus bilong em. Ol man i stap klostu ol i kirap nogut long dispela, na ol i laik helpim dispela wok. Meri bilong bikman bilong ples​—⁠em i wanpela Katolik​—⁠em i namba wan long bringim kunai bilong wokim rup. Gutpela pasin bilong Mercy i strongim bel bilong ol pikinini bilong em. Fopela bilong ol i dediket pinis long God Jehova, na i no longtaim na wanpela i bin go long Skul Bilong Lainim Wok Bilong Lukautim Kongrigesen.

Dispela pasin bilong mekim maritpasin bilong kamap klin i mekim, na sampela Kristen i larim ol narapela i subim ol long maritim man o meri i no wanbilip. Olsem: Wanpela man i gat 70 krismas samting na meri bilong em i dai pinis, kwiktaim em i maritim wanpela yangpela meri i wanblut bilong meri bilong em i dai pinis. Taim em i mekim olsem, em inap tok olsem em i mekim maritpasin bilong kamap klin. Tasol dispela pasin i pait wantaim tok bilong Baibel i tok, ol Kristen i mas maritim “man i bilip long Bikpela.”​—⁠1 Korin 7:⁠39.

Pasin Bilong Was Long Bodi Long Nait Olgeta

Long planti kantri, ol man i krai sori ol i bung long haus bilong man i dai pinis na was long bodi long nait olgeta. Long planti bung olsem, ol man i save mekim bikpela kaikai na musik i pairap strong. Ol i bilip olsem dispela bai mekim gut long man i dai pinis na lukautim famili long pasin bilong posin samting. Na ol inap mekim tok gris bambai man i dai pinis bai i orait long ol. Bihain long dispela tok, ol man i krai sori ol bai mekim wanpela singsing bilong lotu, na bihain narapela man bai kirap na toktok. Ol inap mekim olsem i go inap long tulait.b

Trupela Kristen i no insait long ol pasin bilong bung na was long bodi long nait olgeta, long wanem, Baibel i tok ol man i dai pinis i no inap helpim o bagarapim ol man i stap laip. (Stat 3:19; Song 146:​3, 4; Jon 11:​11-14) Baibel i tambuim olkain wok bilong ol spirit nogut. (KTH 9:21; 22:15) Tasol wanpela meri Kristen, man bilong em i dai pinis, em inap hatwok long pasim ol narapela long mekim ol wok bilong ol spirit nogut. Ol inap strong long mekim bung bilong was long bodi long nait olgeta long haus bilong em. Ol wanbilip inap mekim wanem bilong helpim ol Kristen i krai sori na i karim dispela narapela hevi tu?

Planti taim ol elda bilong kongrigesen inap helpim famili Kristen i krai sori taim ol i toktok gut wantaim ol wanblut na ol man i stap klostu. Taim ol i toktok pinis wantaim ol, ating ol man bai orait long lusim haus na bung gen long narapela de bilong planim man. Tasol olsem wanem sapos sampela i kros? Sapos yu toktok i go, dispela inap kirapim ol long pait. ‘Wokman bilong Bikpela i no ken tok pait na tok kros, em i mas daunim belhat.’ (2 Timoti 2:24) Olsem na sapos ol wanblut i no laik wok gut wantaim famili na ol i strong long bosim ol samting, ating wanpela meri Kristen, man bilong em i dai pinis na ol pikinini bilong em, ol i no inap pasim dispela samting. Tasol ol i no insait long sampela pasin bilong lotu ol narapela i mekim long haus bilong ol, long wanem, ol i bihainim tok bilong Baibel i tok: “Ol haiden ol i narakain, olsem na yupela i no ken pas wantaim ol na wok bung wantaim ol.”​—⁠2 Korin 6:⁠14.

Dispela lo i stret tu long taim bilong planim man. Ol Witnes Bilong Jehova i no insait long singsing, beten, na sampela pasin pris bilong lotu giaman i bosim. Sapos ol Kristen i famili tru bilong man i dai pinis na ol i ting ol i mas i go long bung bilong planim em, ol i no save insait long samting ol narapela i mekim.​—⁠2 Korin 6:17; KTH 18:⁠4.

Gutpela Pasin Long Bung Bilong Planim Man

Taim ol Witnes Bilong Jehova i bosim bung bilong planim man, ol i no mekim ol pasin bilong mekim gut long man i dai pinis. Ol i mekim wanpela tok bilong Baibel long Haus Kingdom, o long haus bilong redim bodi bilong planim em, o long haus bilong man i dai pinis, o long ples matmat. Dispela tok i bilong mekim gut bel bilong famili bilong man i dai pinis, na kamapim tok bilong Baibel long indai na kirap bek. (Jon 11:25; Rom 5:12; 2 Pita 3:13) Ol inap mekim wanpela singsing bilong Baibel na pinisim bung long rot bilong beten bilong mekim gut bel bilong ol man.

I no longtaim i go pinis, na ol i bin mekim kain bung olsem bilong planim wanpela Witnes Bilong Jehova, em liklik susa bilong Nelson Mandela, presiden bilong Saut Afrika. Bihain long dispela bung, presiden i tok tenkyu long man i mekim tok. Planti man i gat namba i kam long dispela bung. Wanpela minista bilong gavman i tok: “I no gat wanpela bung bilong planim man mi bin go long en na em i gutpela olsem dispela bung.”

I Stret Long Pasim Ol Klos Bilong Sori?

Ol Witnes Bilong Jehova i save bel hevi taim wanpela ol i laikim em tru i dai. Olsem Jisas, ol i save krai. (Jon 11:​35, 36) Tasol ol i no ting ol i mas kamapim bel hevi bilong ol long rot bilong pasim wanpela samting i makim olsem ol i bel hevi tru. (Skelim wantaim Matyu 6:​16-18.) Long planti kantri, ol meri, man bilong ol i dai pinis, ol i mas pasim narapela kain klos bilong mekim gut long man i dai pinis. Taim ol i planim man pinis, ol i mas pasim dispela kain klos inap sampela mun o wanpela yia, na taim ol i rausim dispela kain klos ol i mekim narapela bikpela kaikai.

Sapos wanpela i no mekim sampela samting i makim olsem em i bel hevi, ol narapela i ting em i rongim man i dai pinis. Long dispela as, long sampela hap bilong Swasilan, ol bikman bilong ples i bin rausim ol Witnes Bilong Jehova long haus na graun bilong ol. Tasol ol brata bilong spirit i stap long narapela hap ol i bin lukautim ol gutpela Kristen olsem.

Nambawan Kot Bilong Swasilan i tok, ol Witnes Bilong Jehova i winim kot na ol man i mas larim ol Witnes i go bek long haus na graun bilong ol. Na wanpela meri, man bilong em i dai pinis, ol i larim em i stap long hap graun bilong em taim em i soim wanpela pas na kaset i gat toktok long man i dai pinis long en, na man i tokaut klia olsem meri bilong em i no ken pasim ol klos bilong sori. Olsem na dispela meri inap kamapim klia olsem, em i daun tru long man bilong em.

Em i gutpela tru sapos paslain long taim man i dai, em i kamapim klia ol samting em i laik ol man i mekim na ol samting ol i no ken mekim long taim bilong planim em. Na dispela i bikpela samting tru long ol hap ol man i save bihainim ol pasin i no stret wantaim tok bilong Baibel. Tingim Victor, em wanpela man i stap long Kamarun. Em i raitim long wanpela pepa ol samting ol man i mas mekim long bung bilong planim em. Long famili bilong em i gat planti man i gat nem, na ol i bilong wanpela lain i strong long bihainim ol pasin tumbuna bilong tingim ol man i dai pinis, na wanpela pasin ol i save mekim em long lotuim bun bilong het bilong man. Ol narapela long famili i save givim biknem long Victor, olsem na em i save ol bai mekim dispela pasin long bun bilong het bilong em. Olsem na em i tokaut klia long ol samting ol Witnes Bilong Jehova i mas mekim long bung bilong planim em. Dispela i mekim na meri pikinini bilong em ol i no kisim hevi, na long dispela rot ol inap autim tok long ol man bilong ples.

No Ken Bihainim Pasin i No Stret

Sampela i save long tok bilong Baibel, tasol ol i pret long stap narapela kain. Bilong abrusim pasin birua, ol i laik amamasim ol man i stap klostu, olsem na long ai bilong ol man ol i mekim ol samting i olsem ol i mekim bung bilong was long bodi bilong man i dai pinis. Tru, i gutpela long i go lukim man i krai sori bilong mekim gut bel bilong em, tasol i no olsem ol i mas mekim liklik bung bilong planim man long olgeta nait long haus bilong em taim ol i no planim yet dispela man i dai pinis. Dispela inap pundaunim ol narapela i lukim dispela samting, long wanem, ol inap ting ol man i mekim dispela pasin, ol i no bilip tru long tok bilong Baibel long i stap bilong ol man i dai pinis.​—⁠1 Korin 10:⁠32.

Baibel i strongim ol Kristen long putim wok bilong lotuim God olsem namba wan samting long ol, na long mekim gutpela wok long taim bilong ol. (Matyu 6:33; Efesus 5:​15, 16) Tasol long sampela hap, ol i no bin mekim ol wok bilong kongrigesen inap wanpela wik samting, long wanem, ol i mekim ol samting bilong planim man. Dispela hevi i no save kamap long Afrika tasol, nogat. Wanpela ripot i stori long wanpela bung bilong planim man long Saut Amerika olsem: “Wan wan man tasol i kam long 3-pela miting Kristen. Ol i no go autim tok inap 10-pela de. Ol manmeri ausait long kongrigesen na ol Baibel-stadi tu, ol i kirap nogut na ol i no amamas long lukim sampela brata sista bilong yumi i insait long ol dispela pasin.”

Long sampela hap, famili i krai sori inap singautim ol gutpela pren i kam long haus bilong ol bilong kisim liklik kaikai bihain long ol i planim man. Tasol long planti hap long Afrika, lanti handet man i save go long bung bilong planim man, ol i go long haus bilong man i dai pinis, na ol i ting ol i mas kisim bikpela kaikai i gat abus bilong ol animal ol i bin kilim. Sampela long kongrigesen Kristen ol i bihainim dispela pasin, na i olsem ol i bihainim pasin bilong ples na mekim bikpela kaikai bilong mekim gut long man i dai pinis.

Bung bilong planim man ol Witnes Bilong Jehova i save bosim, em i no save putim hevi long famili bilong dispela man i dai pinis. Olsem na ol man i kam long bung, ol i no gat wok long givim mani bilong baim planti samting bilong dispela bung. Sapos ol meri, man bilong ol i dai pinis, ol i no inap baim ol samting ol i mas baim, ating ol narapela long kongrigesen bai amamas long helpim ol. Tasol sapos ol i sot yet, ating ol elda bai stretim rot bambai ol gutpela meri wanpis i kisim mani samting bilong helpim ol.​—⁠1 Timoti 5:​3, 4.

I no olgeta pasin bilong planim man i pait wantaim ol lo bilong Baibel. Tasol taim ol i mekim olsem, ol Kristen i strong long bihainim tok bilong Baibel.c (Aposel 5:29) Tru, dispela inap givim sampela hevi moa, tasol planti wokman bilong God inap tokaut olsem, ol i bin winim ol dispela traim. Ol i bin mekim olsem long strong bilong Jehova, em “God bilong mekim isi bel bilong olgeta man i gat hevi,” na long rot bilong ol wanbilip i sori long ol na helpim ol na mekim gut bel bilong ol long dispela taim bilong hevi.​—⁠2 Korin 1:​3, 4.

[Ol Futnot]

[Blok long pes 23]

Ol i Sanap Strong na Kisim Blesing

Sibongili em i stap long Swasilan. Em i wanpela strongpela meri Kristen, man bilong em i dai pinis. Taim man bilong em i dai pinis, em i no laik bihainim ol pasin planti man i ting ol bai mekim gut long man i dai pinis. Olsem: Em i no sevim olgeta gras long het bilong em. (Lo 14:⁠1) Etpela long famili ol i belhat long dispela, na ol i holim em na sevim olgeta gras long het bilong em. Na ol i pasim ol Witnes Bilong Jehova long kam long haus bilong Sibongili bilong mekim gut bel bilong em. Tasol ol narapela man i laik harim tok bilong Kingdom, ol i amamas long go lukim em wantaim ol pas ol elda i bin raitim bilong strongim bel bilong Sibongili. Long de stret ol man i laik Sibongili i pasim klos bilong sori, wanpela samting i kamap. Wanpela man i gat nem long dispela famili, em i bungim ol man bilong toktok long laik bilong Sibongili long sakim ol pasin bilong ol tumbuna i makim olsem meri i sori long man i dai pinis.

Sibongili i tok: “Ol i askim mi, bilip bilong mi i orait long mi pasim ol blakpela klos bilong sori bilong kamapim bel hevi bilong mi o nogat. Taim mi stori long pasin mi laik bihainim, ol i tok bai ol i no subim mi long mekim olsem. Mi kirap nogut taim olgeta i tok sori long ol i bin sakim laik bilong mi na holim mi na sevim olgeta gras long het bilong mi. Olgeta i askim mi long lusim rong bilong ol.” Bihain, susa bilong Sibongili i tok em i bilip olsem ol Witnes Bilong Jehova i bihainim lotu i tru, na em i laik stadi long Baibel.

Tingim wanpela man: Em i bilong Saut Afrika na nem bilong em Benjamin. Em i gat 29 krismas taim em i harim tok olsem papa bilong em i dai wantu tasol. Long dispela taim, Benjamin em wanpela tasol em i Witnes long famili bilong em. Taim ol i planim papa bilong em, ol i laik olgeta i mas go klostu long matmat na tromoi hap graun antap long bokis bilong em.d Taim ol i planim em pinis, olgeta bilong famili ol i sevim olgeta gras long het bilong ol. Benjamin i no insait long ol dispela pasin, olsem na ol pren na famili i tok, tewel bilong papa bai givim strafe long em.

Benjamin i tok: “Mi bilip long Jehova, olsem na i no gat wanpela samting nogut i painim mi.” Famili i lukim dispela. Bihain sampela bilong ol i kirap stadi long Baibel wantaim ol Witnes Bilong Jehova, na ol i kisim baptais bilong makim olsem ol i dediket long God. Na olsem wanem long Benjamin? Em i kirap mekim wok painia. Na inap sampela yia nau, em i raun long ol kongrigesen bilong ol Witnes Bilong Jehova olsem wanpela wasman bilong raun.

[Futnot]