Pasin Ol Man i Mekim Taim Man i Dai—Yu Ting Olsem Wanem Long Ol Dispela Pasin?

LONG bipo yet na i kam inap long nau i dai i bin painim ol man. Ol man i save pinis long dispela samting, tasol taim wanpela man i dai, ol man i stap laip yet ol i save bel hevi tru. Taim wanpela famili bilong yumi i dai, wanpela man o meri yumi laikim tumas em, yumi save pilim bikpela hevi.

Lotu i mas helpim yumi long karim dispela hevi, tasol planti taim i no mekim olsem. Long sampela ples, taim wanpela man i dai, ol i save pretim nogut ol famili bilong em—ol i save tok, tewel bilong dispela man bai kam mekim nogut long ol na ol i mas mekim sampela pasin bilong mekim isi bel bilong em bambai em i no ken mekim olsem. Na sapos wanpela long famili Kristen i dai, ating ol wanples bilong ol bai putim hevi long ol, long wanem ol i laik bai famili i mas mekim ol pasin ol man bilong ples i save mekim taim man i dai, olsem pasim narapela kain laplap o bilas samting.

God Jehova i tok promis olsem: Bihain bai em i pinisim i dai na bai yumi no ken i dai moa. (Revelesen 21:4) Na nau em i givim Baibel long yumi, em Tok bilong em, bilong ‘soim rot long yumi.’ (Sam 119:105) Sapos yumi no save wanem pasin i stret yumi mas mekim, Baibel i soim rot long yumi. Baibel i tokim yumi long ol pasin Jehova i laik bai yumi bihainim. (Aisaia 30:21) Orait nau yumi ken skelim sampela tok bilong Baibel i soim rot long yumi long ol samting yumi mas mekim taim wanpela famili bilong yumi i dai.

I Stret Yumi Bel Hevi

Taim wanpela man o meri yumi laikim tumas em em i dai, yumi save bel hevi. I stret yumi bel hevi olsem. Tasol ol Kristen i save, ol man i dai pinis bihain bai ol i kirap bek. Olsem na taim wanpela famili bilong ol i dai, ol i no krai na hevi na longlong nabaut olsem ol narapela man i no bilip long God. (1 Tesalonaika 4:13) Ol i bel hevi, tasol ol i save ol inap lukim em gen long bihain.

Taim meri bilong Ebraham, em Sera, em i dai, Ebraham “i krai long em.” (Jenesis 23:2) Na taim mama bilong Aisak i dai, Aisak i “bel hevi.” (Jenesis 24:67) Taim Lasaras i dai, ol pren na wanlain bilong em ol i bel hevi tru na taim Jisas i lukim dispela samting em tu “em i krai.” (Jon 11:35) Taim wanpela long famili i dai, sapos ol pren bilong ol i kam lukim famili na wok long mekim gut bel bilong ol, ol i mekim gutpela pasin bilong sori.—Jon 11:31.

Baibel i stori long ol man i krai long man i dai, tasol Baibel i no tok ol i mekim sampela pasin bilong mekim isi bel bilong man i dai bambai em i no ken i kam bek na mekim nogut long ol. Nogat tru. Ol wokboi bilong God i save, man i dai em i dai tru na em i no gat tingting o save moa; em i slip tasol long matmat. (Jon 11:11-14; Eklisiastis 9:5, 10) Ol man i dai pinis, bihain long dai bilong ol ol i no karim pen long wanpela ples, na ol i no kamap spirit bilong bekim nogut long ol man. Nogat tru. (Sam 146:3, 4) Olsem na Jehova i tambuim lain bilong em long bihainim pasin ol lain klostu long ol i save mekim taim man i dai, long wanem tingting kranki i as bilong ol dispela pasin.—Diuteronomi 14:1; 18:10-12.

Long nau tu yumi mas skelim gut ol pasin ol man i mekim taim man i dai na ol i pilim olsem i stret ol i mas mekim. Yumi mas tingting olsem: Dispela pasin ol i mekim long nau em i gat wanem as bilong en? Ating wanpela bilip giaman o tingting kranki i as bilong en? Sapos olsem, orait i stret ol Kristen i ken bihainim dispela pasin o nogat?—Rom 13:12-14.

Ol i Mas Klia long Wanem Ol Pasin Ol Man i Mekim Taim Man i Dai?

Sampela lain i putim lo long man o meri, em poroman bilong em i dai pinis, na ol i tok dispela man o meri i mas pasim narapela kain klos, olsem blakpela laplap samting, o em i mas pasim narapela kain bilas. Ol i save putim kain kain tambu long ol na ol i mas bihainim ol dispela tambu inap wanpela yia bilong makim ol i hevi long man i dai pinis. Olsem wanem? I stret ol Kristen i ken bihainim dispela pasin o nogat?

Sapos wanpela famili samting bilong Kristen em i dai, orait bai Kristen i pasim gutpela klos na mekim gutpela pasin i soim bel hevi na sori bilong em. (Lukim 2 Samuel 13:19 na 2 King 6:30.) Tasol bai em i no pasim sampela bilas o klos i makim em i bihainim sampela bilip giaman long man i dai pinis na ol man bilong ples i save pasim inap planti mun o yia. Ol meri Kristen, taim man bilong ol i dai pinis, ol i no bihainim ol dispela pasin bilong ples, em ol bilip giaman i as bilong en, na dispela samting i kirapim ol wanples na wanblut long givim hevi long ol. Ol i ting sapos meri i no mekim ol dispela pasin bilong makim em i hevi long man i dai pinis, bai “spirit” bilong man i dai pinis i kros na bai em i kam mekim nogut long ol, olsem pasim ren na bai kaikai i no ken kamap long gaden. Ol i bihainim bilip giaman na ol i pret long man i dai pinis.

Man bilong wanpela meri i dai pinis na meri i no bihainim ol pasin ol wanples i mekim taim man i dai. Olsem na pikinini bilong em i tokim em: ‘Nau spirit bilong papa bilong mi i no inap i stap isi.’ Na long wanpela hap, hetman bilong ples i kros nogut taim wanpela meri olsem i no bihainim ol pasin ol i mekim taim man i dai, na em i tok long rausim olgeta wokboi bilong Jehova long dispela ples! Sampela manmeri bilong dispela ples ol i kros na ol i kisim ol kroba na tamiok na i go bagarapim haus bung bilong ol Kristen long dispela ples. Na long narapela hap, man bilong wanpela meri Kristen i dai pinis na meri i no laik bihainim ol pasin ol man bilong ples i mekim taim man i dai, olsem na ol polis bilong ples i holim em na rausim olgeta klos long skin bilong em na paitim em nogut long wanpela kain wip ol i kolim sjambok.

Bilong wanem ol dispela meri Kristen i no laik bihainim ol pasin ol man bilong ples i mekim taim man i dai? Ating yu yet yu pilim olsem i no gat rong long bihainim ol dispela pasin ol man bilong ples i ting ‘i stret’ ol i mas mekim. Tru, i gat sampela pasin ol man i mekim taim man i dai na i no gat rong long en. Tasol yu ting i stret sapos Kristen i bihainim sampela pasin em i bilong mekim isi bel bilong “spirit bilong ol tumbuna”? Ol man i mekim kain pasin olsem, lo bilong God i tok long rausim ol long lain Isrel bilong bipo na long lain Kristen bilong pastaim.—Diuteronomi 13:12-15; 18:9-13; 2 Korin 6:14-18; 2 Jon 9, 10.

Bilong wanem ol i mas mekim olsem? Long wanem man o meri i bihainim ol dispela pasin em i helpim lotu haiden. Em i kamapim long ples klia olsem em i no lusim yet lotu giaman.—Revelesen 18:4.

Long olgeta hap bilong graun ol man i save, ol Witnes Bilong Jehova i save lainim ol man long ol tok bilong Baibel. Wanpela tok i tru bilong Baibel ol i save tokaut klia long en, em olsem: Ol man i dai pinis ol i no gat tingting o save moa; ol i no karim pen long bikpaia na ol i no raun long graun mekim nogut long lain bilong ol. Nogat. Baibel i tok: “Ol man i dai pinis ol i no save long wanpela samting.” (Eklisiastis 9:5, NW) Dispela tok i bin mekim gut bel bilong planti handet tausen manmeri. Olsem na ol manmeri bilong ol dispela ples ol i save ol dispela Kristen i no save bihainim ol bilip giaman na mekim ol pasin bilong mekim isi bel bilong spirit bilong ol man i dai pinis.

Orait, olsem wanem sapos ol wanples o wanblut i putim hevi long ol Kristen tru na ol i bihainim ol dispela pasin i no Kristen, em ol man i save mekim taim man i dai? Sapos ol Kristen i bihainim ol dispela pasin, ol narapela man bai ting ol i no bilip tru long ol tok ol i lainim ol man long en, a? Na ating bai ol i ting ol inap kirapim ol dispela Kristen long lusim bilip bilong ol long ol narapela samting tu, a? Tru tumas. Olsem na sapos ol Kristen i bihainim ol dispela pasin i no stret wantaim bilip Kristen, dispela samting bai bagarapim gutpela wok ol i bin mekim bilong lainim ol man long tok i tru bilong Baibel. Ating bai ol i pundaunim sampela man.—Matyu 18:6; 2 Korin 6:3.

Olsem na ol elda na ol narapela brata sista long ol kongrigesen bilong ol Witnes Bilong Jehova ol i save wok long strongim ol wanlotu bilong ol taim wanpela famili bilong ol em i dai pinis. Ol i helpim ol bambai ol inap sanap strong long bilip na bihainim tok i tru, na ol i no ken pundaun na bihainim ol dispela pasin i no stret wantaim bilip Kristen.—Lukim 2 Korin 1:3, 4.

Tasol olsem wanem sapos ol i wok long strongim wanpela Kristen i gat hevi long man i dai pinis, tasol dispela Kristen i kirap bihainim sampela pasin ol man i save mekim taim man i dai na i no stret wantaim bilip Kristen? Ol elda i mas mekim gutpela pasin sori. Aposel Pol i tok: “Ol brata, sapos yupela i lukim wanpela man i mekim wanpela sin, orait yupela man i bihainim Holi Spirit yupela i mas stretim bek isi isi bel bilong dispela man.” (Galesia 6:1) Na disaipel Jems i tok: “Ol brata bilong mi, sapos wanpela brata namel long yupela em i lusim tok tru bilong God, na wanpela brata bai i bringim em i kam bek gen, orait dispela brata i ken save olsem: Sapos wanpela man i helpim sinman na sinman i lusim rot nogut na i kam bek long God, orait bai dispela man i kisim bek spirit bilong sinman, na bai em i no i dai. Long dispela pasin bai God i tekewe planti sin.”—Jems 5:19, 20.

Yumi no ken lusim tingting olsem God yet “i no laikim wanpela man bai i lus. Em i laikim olgeta man i tanim bel.” (2 Pita 3:9) Olsem na ol elda i mas wok long stretim bek tingting bilong dispela man i bihainim pasin i no stret. Na planti taim bai ol i save, dispela hevi i pasim bel bilong dispela Kristen na em i pret long ol man na dispela tupela samting i mekim na em i pundaun olsem. Sapos ol i mekim pasin sori long em na pasin isi, sting bai em i kirap na “wokabaut stret” gen na “kamap gutpela” gen.—Hibru 12:13.

Tasol sapos wanpela Kristen i sakim tok bilong ol wanlotu bilong em na em i strong long bihainim wanpela pasin ol man i mekim taim man i dai na dispela pasin i no stret wantaim bilip Kristen, orait ol elda i mas mekim sampela samting bambai pasin bilong dispela Kristen i no ken paulim tingting bilong ol man bilong ausait na i no ken pundaunim ol narapela Kristen na bai ol tu i bihainim dispela pasin. Man i lotuim ol tumbuna bilong em, em i no i stap moa olsem wanpela Kristen tru, na ol elda i mas mekim ol samting bambai ol narapela man i ken save long dispela samting.—1 Korin 5:13.

Man i Stap Gut long Lo Bilong God Em i Kisim Blesing

Planti Kristen ol i bin i stap gut long lo bilong God long dispela bikpela samting na gutpela samting i bin kamap. Wanpela meri Kristen long Surinem, nem bilong em Edwina Apason, em i stori long taim wanpela pikinini bilong em i dai. Em i tok: ‘Wanpela taim mi mekim Baibel-stadi i stap na ol i kam tokim mi namba wan pikinini man bilong mi i dai pinis. Mi bel hevi tru. Dispela pikinini em i no wanpela Witnes. Em i bung wantaim ol man i kros long gavman na em i wokabaut mats wantaim ol na ol i bin sutim em long gan na kilim em i dai. Mi pilim bikpela hevi na ol wanblut i putim narapela hevi gen long mi. Ol i tok, sapos mi no bihainim ol pasin ol i save mekim taim man i dai mi no gat sori long pikinini bilong mi, mi no olsem mama bilong em. Ol i laik bai mi mekim olsem: Mi mas katim gras long het na karamapim waitpela laplap long het, na inap planti mun mi mas pasim ol klos i makim mi hevi long man i dai pinis, na mi mas wokabaut isi isi, na toktok isi—mi mas mekim olgeta dispela samting bambai ol narapela man na “spirit bilong man i dai pinis” i ken save mi hevi tru. Tasol sapos mi bihainim ol dispela pasin bilong ol, olgeta wok mi bin mekim bilong autim tok i tru bilong God long ol bai lus nating, na bai mi no i stap stret moa long ai bilong God.’ Olsem na Edwina i no lusim lo bilong God liklik.

Smolmama o anti bilong wanpela man i dai pinis na dispela man i tok anti i save kam Lukim em long olgeta nait. Ol i tokim em: ‘Yu ting em i laikim wanem samting?’ Em i tok: ‘Em i laik bai mi mekim ofa bilong em klostu long wara.’ Na sapos em i no mekim? Em i tok, ‘Anti i tok em bai kilim mi i dai.’ Taim dispela anti bilong em i stap laip yet em i gutpela meri, em i save sori long em na mekim gut long em. Orait, olsem wanem na taim em i dai pinis pasin bilong em i senis olgeta na em i pretim dispela man na tok long kilim em i dai? Ating dispela em i anti bilong em o em narapela samting i kam lukim em long nait? Ol kain askim olsem bilong kirapim tingting bilong man na ol tok bilong Baibel i helpim dispela man na planti man moa na ol bilip giaman long man i dai pinis i no kalabusim ol moa. Ol i no pret moa long ol man i dai pinis. Ol i save ol dispela samting ol man i save lukim, olsem tewel o masalai o tambaran samting, na nek i kamap nating, ol spirit nogut i as bilong ol dispela samting.—Lukim 2 Korin 11:3, 14; Efesas 6:12.

Ol wokboi bilong Jehova i save sapos ol i stap gut long ol lo bilong Em na bihainim rot em i makim, bai ol i kisim blesing —bai ol inap kisim laip i stap oltaim oltaim. (Aisaia 30:21) Seten i wok hait na mekim kain kain pasin giaman bilong pundaunim ol bambai ol i lusim dispela rot. (1 Pita 5:8, 9) Seten i save, taim wanpela famili bilong ol i dai pinis na ol i hevi long dispela samting, long kain taim olsem i no hatwok tumas long pundaunim ol. Tasol ol Kristen i tingting strong long i stap gut long Jehova maski wanem kain hevi i painim ol. Olsem na taim wanpela man i dai na long ol narapela taim tu ol i bihainim “tok bilong God.” Ol i no bihainim “tok bilong ol man.” (Aposel 5:29) Long dispela rot ol i kamapim bel bilong ol, ol i givim bel tru long God Jehova, na ol inap wetim em i givim gutpela pe long ol olsem laip long Nupela Taim em bai kamapim. Long dispela taim bai ol man i no i dai moa na bai ol man i “no bel hevi moa, na ol i no krai.”—Revelesen 21:4.