Sakim Ol Pasin Tumbuna God i No Laikim!
JISAS i tok: “Tok tru bai i mekim yupela i kamap fri.” (Jon 8:32) Tru tumas, lotu Kristen i mekim ol man i kamap fri—ol i lusim pinis ol samting i bin kalabusim ol, olsem ol bilip giaman, na ol tok na tingting kranki bilong lotu, na ol pasin sem nogut.
Long bipo na long nau tu i gat planti samting i laik pulim ol Kristen na bai ol i kalabus gen long ol lo na pasin bilong ol tumbuna, em ol i lusim pinis. (Galesia 4:9, 10) I no olsem olgeta pasin tumbuna na pasin bilong ples i nogut. Kristen i ken skelim na bihainim pasin i gutpela bilong helpim em. Tasol ol Kristen i no save bihainim ol pasin i no stret wantaim tok bilong Baibel, em Tok Bilong God. Ol i no lusim lo bilong God liklik. Planti man i save ol Witnes Bilong Jehova i sakim pasin bilong mekim Krismas, na betde, na ol narapela pasin i no stret wantaim Baibel.
Ol i sanap strong olsem, na planti taim ol pren, na ol wantok, na ol famili i no bilip, ol i tok bilas long ol na birua long ol. Dispela i kamap planti taim long sampela kantri bilong Afrika, em ol i gat kain kain pasin bilong ol tumbuna ol i save mekim long taim bilong planim man i dai pinis, na long taim bilong marit, na long taim nupela pikinini i kamap. I hatwok tru long sanap strong na sakim ol dispela samting ol man i wok long subim ol long mekim—planti taim ol man i tok nogut long ol na sampela taim ol i paitim ol. Olsem wanem ol dispela Kristen inap sanap strong long kain taim olsem? Olsem wanem? I gat rot bilong ol i ken abrusim hevi, tasol ol i no lusim lo bilong God liklik? Orait, yumi ken skelim sampela samting ol gutpela Kristen i bin mekim bilong sakim ol pasin tumbuna i no stret long Baibel.
Long Taim Bilong Planim Man
Long hap saut bilong Afrika i gat kain kain pasin bilong ol tumbuna ol man i save bihainim taim ol i laik planim man i dai pinis. Ol manmeri i krai sori long em ol i save go long haus bilong man i dai na ol i stap long nait olgeta—o sampela nait—na ol i wokim paia na ol i no larim paia i dai. Ol i tambuim lain bilong em long kukim kaikai, na long katim gras, na long waswas; ol i mas planim em pastaim. Bihain ol i mas waswas long wara ol i bin putim sampela kain lip bilong diwai long en. Yu ting i orait sapos ol Kristen i bihainim ol dispela kain pasin na lo? Nogat. Long wanem, as bilong en em olsem ol man i ting yumi gat tewel i no inap i dai na ol i pret long ol man i dai pinis.
Long Saveman 9:5, Baibel i tok: “Ol [man i gat laip] i save bai ol i dai. Tasol ol man i dai pinis, ol i no inap save long wanpela samting.” Taim yumi save long dispela tok i tru, yumi no pret moa long ‘spirit bilong ol man i dai pinis.’ Tasol Kristen i mas mekim wanem sapos ol famili bilong em i ting ol i mekim gutpela pasin na ol i laik subim em long bihainim ol dispela kain pasin?
Orait, tingim ol samting i bin painim wanpela Witnes long Afrika, nem bilong em Jane, em papa bilong em i dai. Em i go kamap long haus bilong redim bodi bilong planim, na ol i tok, em wantaim ol narapela famili bilong em ol i mas singsing raunim bodi long nait olgeta bilong mekim gut spirit bilong papa. Jane i stori olsem: “Mi tokim ol, mi wanpela Witnes Bilong Jehova na mi no ken insait long kain pasin olsem. Ol i planim papa pinis na long de bihain ol i tok ol bai wasim olgeta famili bilong papa bilong lukautim ol bambai spirit bilong em i no ken mekim nogut long ol. Mi tokim ol mi no ken insait long dispela pasin tu. Ol i pasim mama i stap insait long wanpela haus. Man o meri i laik i go lukim em, ol i mas dring wanpela kain strongpela dring pastaim, em ol i redim bilong kain taim olsem.
“Mi sakim olgeta dispela pasin, na mi go long haus bilong mipela na redim kaikai na karim i go long haus em mama i stap long en. Famili bilong mi i bel hevi tru long dispela. Ol wanblut i ting mi longlong.” Na ol i tok bilas long Jane na singaut long ol spirit i mas mekim nogut long em. Ol i tok: “Yu bihainim lotu bilong yu na sakim pasin bilong ol tumbuna, olsem na spirit bilong papa bilong yu bai mekim nogut long yu. Na ating bai yu no inap karim pikinini.” Tasol Jane i sanap strong na em i no pret. Orait, wanem samting i kamap? Em i tok: “Long taim bilong planim papa, mi gat tupela pikinini, nau mi gat 6-pela! Dispela i semim tru ol man i tok bai mi no inap karim pikinini gen.”
Mekim Maritpasin Bilong “Kamap Klin”
Narapela pasin bilong ol tumbuna em pasin bilong mekim man o meri marit i kamap klin taim poroman bilong em i dai. Sapos meri i dai, famili bilong em bai kisim wanpela sista o kasen bilong meri i kam long man bilong em, na em i mas slip wantaim dispela meri. Taim em i mekim pinis, nau em i ken maritim wanem meri em i laikim. Na ol i save mekim wankain pasin long meri taim man bilong em i dai. Ol i ting dispela pasin i rausim “spirit” bilong poroman i dai pinis na nau man o meri i kamap klin.
Sapos man o meri i sakim dispela pasin bilong “kamap klin,” bai ol wanblut i kros nogut tru. Bai ol i givim baksait long em, na mekim ol tok bilas long em, na kolim ol samting nogut i mas painim em. Tasol ol Kristen i save sakim dispela pasin. Ol i save sapos man i slip wantaim meri na tupela i no marit tru, dispela i no mekim em i “kamap klin”; dispela i mekim em i kamap doti long ai bilong God. (1 Korin 6:18-20) Na ol Kristen i save ol i mas maritim man o meri “i bilip long Bikpela.”—1 Korin 7:39.
Man bilong wanpela meri Kristen bilong Sambia em i dai. Nem bilong dispela meri em Violet. Bihain ol wanblut bilong man i kisim wanpela man i kam long Violet na ol i strong long em i mas slip wantaim dispela man. Violet i sakim ol, na bilong givim strafe long em ol i tambuim em long kisim wara long hulwara bilong ples. Na ol i tok em i no ken wokabaut long bikrot, nogut samting nogut i kamap long em. Tasol em i no pret long ol wanblut na ol wanples.
Bihain ol i singautim em i go long kot bilong ples, na em i sanap long kot na kamapim klia ol tok bilong Baibel i as bilong bilip bilong em na em i sakim dispela pasin i olsem pasin pamuk. Em i winim kot. Kot i tok ol i no ken subim em long bihainim pasin bilong ples o pasin bilong ol tumbuna i no stret long bilip bilong em. Violet i sanap strong na dispela i helpim ol narapela Witnes bilong dispela ples, em wankain hevi i painim ol long bihain.
Narapela Witnes meri bilong Afrika, nem bilong em Monika, em i sakim wankain pasin taim man bilong em i dai. Famili bilong man i strong long em i mas maritim wanpela man. Monika i tok: “Mi sakim ol, long wanem, mi tingting strong long bihainim lo bilong 1 Korin 7:39.” Tasol ol i strong strong. Monika i tok: “Ol i tok samting nogut bai painim mi. Ol i tok, ‘Sapos yu no maritim dispela man, bai yu no inap marit gen.’ Na ol i giaman na tok sampela wanlotu bilong mi i bin hait na mekim dispela pasin bambai ol i kamap klin.” Tasol Monika i sanap strong. Em i tok: “Mi stap singel inap tupela yia, na bihain mi marit gen long pasin Kristen.” Nau Monika i mekim wok painia oltaim.
Pikinini i Lus Long Bel o Dai Insait Long Bel
Ol Kristen long hap saut bilong Afrika i mas sanap strong na sakim ol pasin tumbuna ol man bilong ples i save bihainim long taim pikinini i lus long bel o em i dai insait long bel na mama i karim. Ol samting sin i kamapim long yumi i as bilong ol dispela hevi—i no olsem God i givim strafe. (Rom 3:23) Tasol sapos meri i gat bel na pikinini i lus long bel, lo bilong ol tumbuna i tok ol manmeri i mas givim baksait long dispela meri inap liklik taim.
Olsem na wanpela meri, nau tasol pikinini i lus long bel bilong em, em i kirap nogut long lukim wanpela Witnes i wokabaut i kam long haus bilong em. Taim Witnes i kam klostu pinis, meri i singaut na em i tok: “Yu no ken i kam hia! Lo bilong ol tumbuna i tok, yu no ken i kam lukim meri nau tasol pikinini i lus long bel bilong em.” Tasol Witnes i tokim em, ol Witnes Bilong Jehova i save kisim tok bilong Baibel i go long olgeta kain manmeri na ol i no save bihainim dispela pasin bilong ples. Em i opim Baibel na kaunim tok bilong Aisaia 65:20, 23, na em i stori olsem taim Kingdom bilong God i bosim graun bai ol pikinini i no lus long bel o dai insait long bel na mama i karim. Olsem na meri i kirap long stadi long Baibel.
Taim pikinini i dai insait long bel na mama i karim na ol i laik planim bodi bilong pikinini, i gat olkain pasin bilong ol tumbuna ol i save mekim. Wanpela Witnes, nem bilong em Joseph, em i go long bung bilong planim kain pikinini olsem na ol i tokim em, olgeta man i kam bung ol i mas wasim han long wara ol i bin putim sampela lip bilong diwai long en na rabim dispela marasin long bros bilong ol. Ol i tok dispela bai pasim rot bilong “spirit” bilong pikinini na em i no ken i kam bek na mekim nogut long ol. Long gutpela pasin isi, Joseph i tok em i no ken mekim dispela pasin, long wanem, em i save Baibel i tok ol man i dai pinis ol i no inap mekim nogut long ol man i stap laip yet. Tasol sampela i wok yet long subim em long rabim long bros. Joseph i sakim ol gen. Sampela moa long dispela bung, taim ol i lukim dispela Kristen i sanap strong na em i no pret, ol tu i sakim dispela pasin.
Abrusim Hevi, Tasol Sanap Strong
Sapos man i pret long ol man i stap laip yet, na em i pret, nogut ol i givim baksait long em, dispela inap pundaunim em. Sindaun 29:25 i tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet.” Ol stori hia i kamapim klia olsem tok bilong namba tu hap bilong dispela ves i tru: “Tasol sapos man i bilip strong long Bikpela, bai em i stap gut.”
Tasol i gat rot bilong abrusim hevi. Olsem: Sapos ol i singautim wanpela Kristen i go bilong planim wanpela wanblut i dai pinis, em i no ken wet inap long taim hevi i kamap pinis long em. Baibel i tok: “Man i gat gutpela tingting, em i save olsem, hevi i laik kamap long em, na em i abrusim. Tasol man i no gat tingting, em i lukim trabel i stap long rot bilong en na em i go na bungim na karim hevi.”—Sindaun 27:12.
Gutpela sapos Kristen i askim ol pastaim wanem ol pasin ol bai mekim. Sapos em i gat tok long sampela pasin, em i ken tokim ol bilong wanem em i no laik insait long en, tasol em i mas mekim “long gutpela pasin,” na mekim “tok isi.” (1 Pita 3:15) Sapos pastaim Kristen i tokim ol wanblut long bilip bilong em, em Baibel i as bilong en, bai ol inap tingim gut na ating ol i no ken kros tumas na toknogutim em o wok long pretim em.
Maski ol wanblut i kros o nogat, Kristen i no ken lusim lo bilong God liklik na bihainim pasin bilong ol tumbuna em i daunim nem bilong God. Maski ol i tok samting nogut bai painim Kristen na ol i toknogutim em, em i mas sanap strong. Yumi stap fri—yumi lusim pinis ol bilip giaman. Aposel Pol i tok: “Krais i bin mekim yumi i kamap fri, bilong yumi no ken i stap aninit long lo. Olsem na yupela i mas sanap strong. Yupela i no ken larim ol man i mekim yupela i kamap olsem ol wokboi nating gen.”—Galesia 5:1.
[Piksa long pes 29]
Planti man i bilip olsem man i dai pinis nau tasol em inap kisim tok i go long ol tumbuna i dai pinis longtaim bipo