Ripot Long Wok Bilong Kingdom

Lain Bilong God i Amamas Long Mekim Wok

NEM bilong em Josep, na em i man bilong ailan Saiprus. Em i wanpela bilong ol Kristen long taim bilong ol aposel na em i baim graun na haus i go long ol man na givim mani em i kisim olsem kontribusen bilong helpim wok Kristen i go bikpela. Em i gat pasin sori na em i save mekim gut tru long ol man, olsem na ol i givim nem Barnabas long em. Insait bilong dispela nem i olsem “Man bilong strongim bel.”​—⁠Aposel 4:​34-37.

Long bipo yet i kam inap long nau pasin bilong tingim tru narapela man i olsem mak bilong ol manmeri i lotuim Jehova. Long nau ol Witnes Bilong Jehova i mekim wankain pasin. Dispela samting i kamap ples klia taim yumi tingim dispela ekspiriens bilong ol ailan Solomon.

Winim 60 Witnes bilong Ostrelia na Nu Silan i bin kam long Honiara, em biktaun bilong ol ailan Solomon, em i stap long ailan Guadalkanal. Ol i kam bilong helpim ol brata long wokim wanpela Haus Kibung bilong mekim ol bikpela bung Kristen. Insait long tupela wik tasol ol i bin wokim wanpela haus bung bilong 1,200 man i ken sindaun long en!

Long dispela taim, kaunsil bilong liklik taun Munda, long ailan Nu Jojia, i givim long ol Witnes Bilong Jehova wanpela hap graun namel long taun. Ol i laik wokim wanpela Haus Kingdom, em wanpela haus bilong lotu. Na ol i sot tru long wanpela haus olsem. Ol i bin bung long rum bilong wanpela liklik haus morota, tasol ol i no gat mani bilong wokim wanpela Haus Kingdom.a Klostu olgeta brata sista long kongrigesen i lapun na sampela i sik na sampela i pikinini, na i no gat wanpela i gat save long wokim haus.

Inap 380 kilomita longwe long Munda, long ailan Guadalkanal, ol Witnes long taun Honiara i amamas long kam na helpim ol brata sista long Munda long wokim Haus Kingdom. (Song 110:⁠3) Ol i ting: “Sapos ol brata bilong ol narapela kantri i amamas long wokim wanpela Haus Kibung bilong mipela insait long tupela wik, ating mipela tu i ken helpim ol brata bilong mipela long Munda long wokim wanpela Haus Kingdom insait long tupela wik.”

Na tru tumas ol i wokim wanpela Haus Kingdom. Wanpela taim wanpela bot i kam long Munda na i bringim ol Witnes i amamas na redi long mekim wok. Man na meri, lapun na yangpela, olgeta i bin wok strong long rausim kago bilong ol. Na tu, ol i redi long wokim haus long ol plang, simen, kapa, na ol narapela samting i bin kam long Munda paslain long ol.

Ol i kirap mekim wok, tasol liklik taim bihain klaut i pairap na bikpela win i mekim na ol i no gat wara. Tasol dispela hevi i no pasim ol long mekim yet wok. Ol Witnes i digim wanpela hul wara na long taim bilong wokim Haus Kingdom ol i kisim wara long en. Tasol olsem wanem long kaikai bilong ol man i mekim wok? Dispela tu i no givim hevi long ol. Ol kongrigesen bilong Honiara i givim planti kaikai long ol brata i kam long Munda. Na ol brata bilong kukim kaikai ol tu i kam!

Ol man i sindaun klostu i kirap nogut taim ol i lukim gutpela wok ol brata i mekim. Wanpela man i tok: “Long ples bilong mipela, mipela i no save wokim ol samting insait long sampela de, mipela i save wokim insait long sampela yia.” Na narapela man i sindaun klostu, em i wanpela man i go pas long lotu, em i tok, inap 20 yia ol man i mekim wok long haus lotu bilong em, tasol wok i no pinis yet. Tasol ol i wokim nupela Haus Kingdom bilong ol Witnes Bilong Jehova long Munda insait long 10-pela de tasol!

[Ol Futnot]

[Ol Mep long pes 24]

(Bilong save ol dispela rait i stap we long pes, lukim buk o magasin)

Solwara Saut Pasifik

OL AILAN SOLOMON

Munda

GUADALKANAL

Honiara

[Mep]

OSTRELIA

NU SILAN