Ripot Long Wok Bilong Kingdom
Ol Yangpela i Autim Gutpela Tok Long Afrika
LIKLIK taim bihain long Jisas i kirap bek, wanpela man Afrika i kam long Jerusalem. Baibel i no kolim nem bilong em. Baibel i tok tasol, “em i wanpela bikman long gavman bilong kwin o Kandasi bilong Itiopia, na em i save bosim olgeta mani samting bilong kwin.” Bilong wanem Baibel i stori long em? Long wanem, wanpela ensel i stiaim Filip, em wanpela Kristen, long i go autim ‘tok bilong gutnius bilong Jisas’ long em. Dispela man bilong Itiopia em namba wan man Afrika em Baibel i kolim bilong kam insait long kongrigesen Kristen.—Aposel 8:26-39.
Long nau, i gat planti handet tausen Witnes Bilong Jehova long Afrika. Long olgeta taim ol i save autim gutnius bilong Jisas long ol man. Ol stori i kam bihain i soim olsem ol yangpela tu long Afrika i insait long dispela wok.
◻ Long Nairobi, Kenya, haus bilong Sandy i stap klostu long haus bilong Priya, em 2-pela meri i gat 11-pela krismas. Ol i save amamas long pilai wantaim na senisim ol buk i gat stori long en. Papamama bilong Priya i kirap stadi long Baibel wantaim ol Witnes Bilong Jehova. Nau Priya i bungim ol nupela buk wantaim ol narapela buk em i holim, na wanpela em i save laikim tumas em buk Harim Tok Bilong Bikpela Tisa, em Sosaiti Wastaua i bin wokim. Em i soim buk Bikpela Tisa long pren bilong em Sandy, na tupela i kirap stadi oltaim long en.
Tasol mama bilong Sandy, em Una, em i bilong Misin Angliken na em i no laik pikinini bilong em i kaunim ol buk bilong ol Witnes Bilong Jehova. Maski mama i birua, ol i mekim yet stadi. Wanpela taim Sandy i krai long mama i mas harim tok ol i stori long en long dispela wanpela taim tasol. Long dispela taim tupela meri i kaunim sapta i stori long “Tupela Man i Wokim Pati Bilong Betde.” Una i harim stori na em i pilim tru. Kwiktaim em i go lukim mama bilong Priya na kamapim planti askim bilong Baibel.
Mama bilong Priya i stretim rot bilong wanpela Witnes i ken stadi wantaim Una long Baibel. I no longtaim na Una i kirap stori long wanwok bilong em, Dolly, long ol samting em i wok long lainim. Long dispela taim Priya, em i gat 11-pela krismas, i wok long kamap strong na em i tingting long kisim baptais bilong kamapim dediket bilong em long Jehova long wanpela kibung distrik bilong ol Witnes Bilong Jehova. Olaman! Priya i amamas moa yet taim Una na Dolly tu i kisim baptais long dispela kibung!
◻ Long sampela kantri bilong Afrika gavman i no orait long wok bilong ol Witnes Bilong Jehova na ol i no rejistaim ol olsem wanpela lotu. Long wanpela kantri olsem, ol i larim ol Witnes i ken mekim ol wok bilong lotu na bihainim bilip bilong ol. Orait, long wanpela skul long dispela kantri, wanpela manki i gat 7-pela krismas na brata bilong em i gat 6-pela krismas—ol i pikinini bilong ol Witnes—ol i save lusim klas long taim bilong ol beten bilong lotu, na ol tisa i larim ol i mekim olsem.
Wanpela taim, wanpela nupela tisa i strong long tupela manki i mas insait long beten wantaim ol narapela pikinini. Manki i bikpela i tok nogat, na tisa i givim kanda long em. Liklik brata bilong em, em Shadrack i gat 6-pela krismas, i strong long lukim het-tisa long ofis bilong em. Het-tisa wantaim nupela tisa i askim em, wanem as na em i no laik bung na beten wantaim ol narapela. Em i pret long papamama bai givim kanda long em na long dispela as em i no mekim? Em i bekim tok long tok ples Arabik olsem: “Nogat, mi no pret. Tasol God mi lotu long en, em i no God bilong paulim nabaut ol samting, nogat; em i save mekim stret olgeta wok bilong em. Mi no inap stap olsem Witnes Bilong Jehova long haus na long skul bihainim narapela lotu!” Long dispela as, ol i tok orait long em i no ken insait long beten wantaim klas.
Taim em i kisim baptais pinis, dispela man bilong Itiopia em Buk Aposel i stori long en, em “i amamas na i bihainim rot bilong en na i go.” (Aposel 8:39) Olsem tasol long nau, ol man bilong autim tok bilong Kingdom long bikpela hap bilong Afrika i amamas long gutpela wok bilong ol long ‘autim gutnius bilong Jisas.’—Aposel 8:35.