“Tok Tru, Em Wanem Samting Tru?”

TUPELA man i sanap na narapela i givim pes long narapela, na tupela i narapela narapela kain tru. Wanpela em i man bilong politik; em i no save bilip long wanpela man, na em i strong long kisim bikpela namba moa, na em i maniman, na em i redi long mekim olgeta samting bambai em i ken kisim bikpela namba moa yet. Tasol dispela narapela man em i wanpela tisa na em i no gat laik long kisim bikpela mani o bikpela nem; em i redi long i dai bilong helpim ol narapela man long i stap laip. Olsem na tingting bilong tupela i no wankain liklik! Na i gat wanpela samting tupela i no wanbel liklik long en, olsem: Tok tru, em i wanem samting tru?

Wanpela man em Pontius Pailat, na wanpela em Krais Jisas. Jisas i sanap long ai bilong Pailat olsem wanpela man nogut em kot i makim bilong i dai. Bilong wanem Jisas i kot? Em yet i kamapim as bilong dispela. I gat wanpela bikpela as na em i bin i kam long graun na mekim wok bilong autim tok​—⁠dispela as, em tok i tru. Em i tok: “Mama i karim mi na mi kam long dispela graun bilong mekim wanpela wok tasol, em bilong autim tok tru.”​—⁠Jon 18:⁠37.

Orait nau Pailat i mekim wanpela bikpela askim: “Tok tru, em wanem samting tru?” (Jon 18:38) Olsem wanem? Em i laik bai Jisas i bekim dispela askim? Ating nogat. Sapos man i gat gutpela bel, Jisas inap bekim olgeta askim bilong em. Tasol Jisas i no bekim askim bilong Pailat. Na Baibel i tok, taim Pailat i mekim dispela askim, kwiktaim em i go ausait. Ating dispela nambawan gavman bilong Rom i no laik save tru long bekim bilong dispela askim. I olsem em i tok, “Wanem dispela tok tru? I no gat wanpela tok i tru!”a

Long nau planti man i gat wankain tingting olsem bilong Pailat long tok i tru. Ol i bilip olsem i no gat wanpela tok i tru​—⁠wanpela man i gat narapela kain tingting long wanem tok i tru na wanem tok i no tru, na narapela man i gat narapela kain tingting long en, olsem na tingting bilong tupela wantaim i “stret.” Planti man ol i bilip olsem. Olsem wanem long yu? Yu gat wankain tingting long tok i tru? Sapos olsem, ating yu bin kisim dispela kain tingting na yu no bin skelim gut pastaim, a? Na sapos yu no gat dispela kain tingting long tok i tru, ating dispela kain tingting bilong dispela graun em inap stiaim tingting bilong yu, a?

Ol i Laik Daunim Tok i Tru

Pontius Pailat i no namba wan man i bilip olsem i no gat wanpela tok i tru olgeta. Sampela saveman bilong ol Grik bipo ol i gat wok long skulim ol man olsem i no gat wanpela tok i tru olgeta. Inap 500 yia samting paslain long taim bilong Pailat, Parmenidis i bilip olsem i no gat wanpela man inap painim save i tru olgeta. Demokritus, ol i bin tok em i nambawan man i gat save bilong dispela graun, em i tok: “Tok i tru em i stap hait tru. . . . I no gat wanpela samting yumi inap save tru long en.” Na wanpela man i gat nem moa yet olsem saveman, em Sokratis, em i tok, i gat wanpela samting tasol em i save gut long en, olsem: Em i no save tru long wanpela samting.

Dispela pasin bilong daunim tok i tru, ol man i mekim i kam inap long nau, olsem: Sampela saveman bilong graun i tok, yumi kisim save long rot bilong sampela hap bilong skin, olsem yau samting, na dispela inap giamanim yumi, olsem na i no gat wanpela save em i tru olgeta. Wanpela saveman bilong Frans, em Rene Dekart, em i kirap skelim olgeta samting em i ting em i save tru long en. Orait, em i sakim olgeta samting em i bin ting i tru, na em i holimpas wanpela tingting tasol em i ting i tru olgeta, olsem: “Cogito ergo sum,” o, “Mi save tingting, olsem na mi stap.”

Planti Ol i Gat Dispela Tingting

I no ol saveman bilong graun tasol i gat dispela kain tingting. Ol bikman bilong lotu tu i ting olsem, na ol tisa i skulim ol pikinini long en long ol skul, na ol i kamapim long ol nius samting. Sampela yia bipo liklik, wanpela bisop bilong misin Episkopal, em John S. Spong, em i tok: “Yumi no ken . . . tingting moa olsem yumi holim tok i tru na ol narapela lotu i mas bihainim tingting bilong yumi​—⁠yumi mas save, i no gat wanpela man em inap save wanem tok i tru olgeta.” Dispela bilip bilong Spong i wankain olsem bilip bilong planti pris pasto long nau​—⁠ol i laik lusim ol tok bilong Baibel long wanem pasin i stret na wanem pasin i no stret, na ol i bihainim tingting bilong graun, olsem “tingting bilong wan wan yet.” Spong i laik bai ol man bilong mekim pasin sodom i ken i stap “bel isi” insait long misin Episkopal, olsem na em i raitim wanpela buk i tok, aposel Pol em i man bilong mekim pasin sodom.

Long planti kantri, i olsem ol skul i wok long givim dispela kain tingting long ol sumatin. Allan Bloom i raitim wanpela buk (The Closing of the American Mind) i tok: “Ol profesa inap save tru long wanpela samting, olsem: Klostu olgeta sumatin i save go long yunivesiti ol i bilip, o ol i tok ol i bilip, olsem i no gat wanpela tok yumi ken tok em i tru.” Bloom i tok, taim em i laik skelim bilip bilong ol sumatin bilong em long dispela samting, ol i save kirap nogut​—⁠“i olsem em i laik tok, sapos yumi bungim 2 na 2, em i no kamap olsem 4.”

Na ol i kamapim dispela kain tingting long planti ol narapela rot tu, olsem: Ol ripota bilong televisen na ol nius, i olsem ol i tingting tasol long amamasim ol man i lukim ol dispela samting long televisen, na ol i no tingting tumas olsem dispela stori i tru o nogat. Na ol i bin senisim sampela tok bilong nius i kamap long televisen o putim sampela tok giaman long en na bai ol man i amamas long lukim ol dispela stori. Na long ol samting ol i mekim bilong kisim amamas, ol i daunim moa yet tok i tru. Ol lo na tok i tru bilong stretpela pasin em ol papamama na tumbuna bilong yumi i bin bihainim, planti man bilong nau i ting ol dispela lo na pasin i bilong bipo tasol na i no bilong nau, na planti ol i tok bilas long en.

Ating sampela bai tok, dispela kain tingting i mekim na ol man i no ting, tingting bilong ol tasol i stret na tingting bilong ol narapela i kranki, olsem na dispela i save helpim ol man long sindaun gut wantaim. Tasol yu ting em i save helpim ol man olsem? Dispela kain tingting i mekim wanem long yu? Yu bilip olsem i no gat wanpela tok em tok i tru? Sapos olsem, ating yu ting, sapos man i wok long painim tok i tru, em i lusim nating taim bilong em. Tasol dispela tingting bai mekim wanpela samting long i stap bilong yu long bihain.

[Ol Futnot]