Ripot Long Wok Bilong Kingdom

“Ol i No Lusim Wok”

KIRAP long taim bilong Krais Jisas na ol aposel bilong em, ol bikman bilong lotu i bin mekim bikpela wok long pasim wok bilong autim gutnius bilong Kingdom bilong God. Planti taim gavman long Jerusalem i bin “tambuim” ol aposel long ol i “no ken autim tok moa long nem bilong Jisas.” (Aposel 5:​27, 28, 40) Tasol Baibel i tok, “tok bilong God i go nabaut long olgeta hap. Na planti manmeri moa i kamap disaipel long Jerusalem.”​—⁠Aposel 6:⁠7.

Tu tausen yia bihain, em long taim bilong yumi nau, sampela bikman bilong lotu long kantri Israel ol i wok yet long kirapim gavman long pasim wok bilong ol Kristen tru long dispela kantri. Sampela lain bilong lotu ol i subim gavman, na long Novemba 1987, gavman i tambuim ol Witnes long ol i no ken mekim ol miting Kristen long Haus Kingdom long brens-ofis bilong Sosaiti Was Taua. Gavman i makim Oktoba 1989 bilong ol Witnes i mas kirap bihainim dispela tambu. Olsem na ol Witnes i rentim wanpela haus, na inap 3-pela yia ol i mekim ol miting long en​—⁠ol i no mekim wok long Haus Kingdom bilong ol.

Ol Witnes i kisim dispela samting i go long Bikpela Kot Bilong Israel. Ol loya i tingim ol tok ol Witnes i mekim na ol i tokaut olsem ol Witnes bai winim kot, long wanem, pasin bilong birua long ol narapela lotu em i as bilong dispela tambu. Dispela i mekim na gavman i senisim tok bilong ol long tambuim ol Witnes long bung long Haus Kingdom, na ol Witnes i amamas long bung gen long Haus Kingdom bilong ol.

Insait long dispela 3-pela yia, yu ting dispela wok bilong autim ol tok i tru bilong Baibel i bin go slek? Nogat tru! Taim ol i pasim Haus Kingdom, i gat tupela kongrigesen tasol long biktaun Tel Aviv, na long taun Lod i stap klostu i gat wanpela grup bilong stadi long Baibel. Tripela yia bihain, taim ol i opim gen Haus Kingdom, i gat 4-pela kongrigesen bilong ol Witnes Bilong Jehova, na wanpela nupela grup bilong stadi long Baibel long taun Berseba.

Long kantri Israel, i no ol man bilong tok ples Arap na tok ples Hibru tasol i kamap Witnes, nogat. Planti man i bin lusim ol hap bipo Rasia i bosim na ol i kam sindaun long hap bilong Israel, olsem na ol Witnes Bilong Jehova i save tok Rasia ol i wok strong long autim tok long ol. Long 3-pela kongrigesen, ol i wokim sampela miting long tok ples Rasia; na i no longtaim i go pinis na winim 100 manmeri i kam long wanpela kibung long tok ples Rasia.

Ol man i birua long ol narapela lotu bai ol i wok yet long pasim wok bilong lotu i tru. Tasol ol man bilong autim tok bilong Kingdom ol i wok long bihainim pasin bilong ol Kristen bilong pastaim em ol man i bin birua long ol tasol “ol i no lusim wok bilong autim gutnius. . . . Ol i tokaut klia olsem, Jisas em i dispela man God i bin promis long salim i kam bilong kisim bek ol manmeri.”​—⁠Aposel 5:⁠42.