Lukim! Wanpela Haus Kingdom Long Nue
NUE em wanpela liklik ailan rip long solwara Saut Pasifik, em i stap long hap not-is inap 2,160 kilomita longwe long Nu Silan. Wanpela liklik buk bilong ol turis i stori long dispela ailan na i tok, ol i kamapim dispela nem Nue long tupela tok, em Nu, i makim “diwai kokonas,” na e, i makim “lukim.” Buk i tok: “Stori bilong ol tumbuna i tok, taim ol namba wan lain bilong Polinisia i kam bilong sindaun long dispela ailan na ol i lukim ol kokonas bilong ailan, ol i mekim dispela tok.”
Long nau, ol Witnes Bilong Jehova long Nue i amamas long tokim ol man i kam long ples, “E! Fale he Kautu ha mautolu!” olsem, “Lukim! Haus Kingdom bilong mipela!” Bilong wanem ol i amamas olsem long dispela haus? Ol Witnes Bilong Jehova long olgeta hap i amamas long Haus Kingdom bilong ol—na ol i amamas moa yet sapos ol yet i bin wokim. Tasol dispela Haus Kingdom ol i wokim long wanpela liklik longwe ailan long bikpela hap bilong Saut Pasifik, em i gat as tru bilong ol i ken amamas long en. Nue i no bikpela ples, em inap olsem 260 skwea kilomita tasol, na i gat 2,300 manmeri tasol i stap long ailan olgeta.
Pastaim ol i no save husat bai wokim Haus Kingdom. Wanpela kongrigesen tasol i stap long Nue na i gat 32 Witnes tasol long en. Ol i mas kisim ol bikpela masin olsem trak, buldosa, krein; tasol gavman i bosim ol dispela masin. Na tu, olgeta bikpela samting bilong wokim haus, olsem: ain, ol brik, ol samting bilong rup, ol waia bilong paua, ol paip bilong wara, ol masin bikmaus samting, ol sia—olgeta dispela samting Nu Silan i mas salim i kam long wanpela sip i save kam raun wanpela taim tasol long olgeta faipela faipela wik. Na tu, graun bilong ailan em ston na i hatwok long wokim haus long en, na ol i mas wokim na haus i no ken pundaun long taim bilong ol bikpela raunwin. Tru tumas, em wanpela bikpela wok long mekim!
Tasol dispela wok i no olsem ol narapela wok. Long tingting bilong ol Witnes Bilong Jehova, Haus Kingdom em ples tru bilong lotuim Jehova long hap ol Witnes Bilong Jehova i stap long en, na taim ol i laik wokim, ol i save wetim God Jehova long stiaim tingting bilong ol na helpim ol. (Song 56:11; 127:1) Ol brata Kristen bilong ol long Nu Silan, na ol brata bilong wanpela kongrigesen Nue long Oklan, ol i bin givim bikpela helpim long dispela liklik lain Witnes bilong Nue long wokim Haus Kingdom.
Ol i Pasim Tok Long Wokim
Long Jun 1994, ol i wokim wanpela Haus Kingdom long Rotorua, Nu Silan, na long dispela taim ol i singautim husat ol Witnes i laik helpim wok bilong sanapim Haus Kingdom long Nue. Ol i kirap nogut long 200 brata na sista Kristen i putim nem. Long dispela lain ol i makim 80 bilong mekim wok, olsem ol kamda, ol man bilong wok long ain, ol plama, ol man bilong wok long rup, na banis, na penim haus, na wok long paua, na wok long ol masin bikmaus samting, na wokim simen, na lainim ol brik, na ol man bilong wok leba.
Ol brata i wokim piksa bilong haus na ol i kirap long mekim ol samting, long wanem, ol i bilip tru long Jehova. Kongrigesen Nue i gat tupela elda, na wanpela—em bisnisman—em i kirap stretim rot bilong sip i ken kisim ol samting i kam bilong wokim haus. Ol i stretim tok wantaim ol lain bilong balus na ol lain bilong haus pasindia long ol Witnes i kam long longwe hap, ol inap baim long liklik pe—em ol i bin volantia long baim rot bilong ol yet. Ol i stretim pinis ol dispela samting na makim de bilong kirap wokim haus. Ol i mas pinisim dispela wok insait long 20 de, kirap long Mas 4 i go inap long Mas 23, 1995, na long dispela de ol bai dediketim Haus Kingdom.
Brata bilong bosim wok, em i kam long Nu Silan wanpela wik paslain bilong stretim gut ol samting. Em i tok: “Taim mi lukim ples bilong wokim Haus Kingdom, mi tingting planti tru. Graun em ston olgeta. Bai mipela i mas lusim tupela wik long digim graun bilong putim as tasol bilong haus.” Tasol bihain em i tok, em i no bin save gut long ol Witnes bilong dispela hap. Em i tok: “Ol brata Nue inap skelim gut ol ston. Ol i save long ples stret bilong paitim wanpela ston bambai ol bikpela hap bilong en i bruk.” Em nau, ol i bin pinisim dispela wok insait long tupela de!
Long Mas 4 namba wan lain Witnes bilong Nu Silan i kam long balus, na ol i mekim olgeta wok simen. Olgeta wan wan lain wokman i kam bihain, ol i mekim narapela narapela hap bilong wok long Haus Kingdom i go inap long ol i pinisim. Long olgeta de bilong wok, ol i bung long 7 klok moningtaim na stori liklik long wanpela tok bilong Baibel. Sampela brata i bin wok inap 12-pela aua long ol wan wan de long bikpela san tru (36 digri Selsias). Taim Mas 23 i kamap, ol i stretim pinis graun na planim pinis ol plaua. Long diwai mango ol i wokim wanpela naispela sain bilong toksave olsem dispela haus em “Haus Kingdom Bilong Ol Witnes Bilong Jehova.”
Ol i Wok Gut Wantaim na Mekim Gut Long Narapela
Wanpela bikpela samting i bin helpim dispela wok long kamap gutpela i olsem: Ol manmeri bilong Nue i wok gut wantaim ol Witnes. Amamas bilong ol Witnes i kirapim ol asples long givim kaikai na mani long ol. Planti i tingim wok bilong sanapim dispela haus i olsem wok bilong ol yet. Ol bikman bilong gavman na ol bisnisman i mekim sampela wok bilong helpim ol Witnes—winim ol wok ol i mas mekim. Ol i givim ol masin samting long ol Witnes i ken mekim wok long en, na tu, ol i tok ol Witnes inap mekim wok long wanpela faktori i gat ol masin bilong wokim ol plang samting. Lain bilong bosim sip i senisim raun bilong sip bambai ol samting ol i mas kisim inap kamap long taim stret.
Ol Witnes bilong ol narapela hap i pilim tru pasin bilong ol Witnes bilong Nue, em ol i wok strong na mekim gut long ol, olsem kisim ol i kam long haus bilong ol na givim kaikai samting long ol. Wanpela wokman bilong konstraksen i tok: “Ol sista Nue i nambawan tru.” Ol i save kukim kaikai bilong belo long olgeta de, na tu, ol i kukim kaikai bilong moningtaim long 6:30. Sampela i kirap long 4:30 long moningtaim bilong redim kaikai. Wanpela wokman bilong konstraksen i tok: “Mi ting i stap bilong mipela hia long Nue i winim i stap bilong mipela long haus bilong mipela yet.”
Long Mas 10 wanpela nius (Niue Star) i stori long dispela wok long namba wan pes bilong en, na het-tok i olsem: “Namba Wan Haus Kingdom Long Nue,” na ol i putim piksa bilong ol Witnes Nu Silan na Nue i wok wantaim long sanapim Haus Kingdom. Nius i stori olsem dispela haus i bikpela inap 280 skwea mita na 70 i go inap 100 manmeri inap sindaun long en. Nius i tok moa: “Ol inap pinisim dispela wok insait long 2-pela wik, tasol ol bai skruim taim i go liklik long dispela haus. Nau 2-pela de bilong wok i go pinis, tasol ol i wokim pinis as bilong haus, bun bilong en, ol sparen na rup, na ol i wokim pinis paslain long taim em sedyul i makim.”
Wanpela bisnisman bilong Nue i tok, em i laik bai olgeta manmeri bilong ailan Nue i ken kam lukim dispela wok ol Witnes i mekim na kisim sampela save long en. Em i tok, gutpela sapos olgeta i lukim dispela Haus Kingdom ol i ken save olsem, gutpela samting inap kamap taim ol man i wok gut wantaim na mekim pasin sori.
Bikpela lain olsem 204 i kam long taim ol i opim dispela nupela Haus Kingdom. Taim ol brata sista Nue wantaim ol pikinini i singsing na danis wantaim bilong makim ol man i wokim Haus Kingdom, olgeta manmeri i lukim ol i amamas na ol i pilim tru. Ol i tok tenkyu long lain i bin wokim haus na long Jehova, em spirit bilong em i bin kirapim tingting, na bel, na han bilong ol man long mekim dispela wok.—Aisaia 40:28-31.