Gutpela Taim Bilong Ol Samting i Kamap Gut Long Ekwatorial Gini

TAIM ol man i go raun long Ekwatorial Gini, namba wan samting ol i amamas long lukim taim ol i pundaun long bikpela ples balus, em ol gutpela diwai na bus samting. Long hap bilong ples balus i gat ol naispela diwai i bikpela tru, winim ol haus long ples balus. Ol gutpela bus na diwai samting i kamap long nambis na i go olgeta long het bilong ol maunten na ol i kamap gut tru, long wanem, planti taim ren i pundaun na ples i hat long olgeta taim, inap long mak olsem 85 digri.

Long Ekwatorial Gini narapela samting i kamap bikpela olsem ol dispela diwai samting i kamap gut tru, em ol samting i “kamap bikpela long strong bilong God.” (Kolosi 2:19) Olsem wanpela bikman bilong Itiopia i kisim helpim long Filip, planti long Ekwatorial Gini i laik tru long kisim save long ol tok bilong Baibel. (Aposel 8:​26-39) Taim ol Witnes i sanap long rot, planti taim ol man i save kam na askim ol long stadi long Baibel wantaim ol. Long Ekwatorial Gini i gat olsem 325 Witnes Bilong Jehova na ol i mekim olsem 1,000 Baibel-stadi wantaim ol man.

Planim Pikinini Kaikai Long Pastaim

Ekwatorial Gini em liklik kantri tru long Afrika na em i stap long hap saut bilong Naijiria na Kamarun. (Lukim mep.) Ol Witnes bilong Naijiria i bin kisim gutnius i kam long dispela ples taim ol i kam painim wok long ol plantesen kakau. Ol i bin kirapim sampela kongrigesen long tok Inglis, tasol bihain ol i pasim taim ol dispela brata i mas go bek long Naijiria. Bihain long taim Ekwatorial Gini i kisim independens long 1968, tripela marit em ol misineri bilong Sosaiti Wastaua, ol i kisim wok bilong autim tok long dispela hap. Ol i no inap stap longtaim long dispela hap, long wanem, i gat hevi bilong wok politik, tasol wok ol i mekim long autim tok i bin kamapim gutpela kaikai tru.

Wanpela misineri nem bilong em Santiago, em i bungim Buenaventura, em wanpela masolman na em i longpela bun tru na ol man bilong ples i save kolim em supaman. Em i man bilong tingim lotu na Baibel, tasol em i man bilong belhat kwik na liklik samting tasol inap mekim em i belhat na em bai paitim ol man. Taim em i belhat insait long ba, olgeta man i stap insait i ranawe o sampela i kalap long windo na ranawe, nogut em i paitim ol. Taim em i harim toktok bilong Santiago, em i tingting long paitim em sapos em i no kamapim gut ol tok bilong Baibel bilong strongim ol tok em i mekim. Buenaventura i tingting, ‘I no gat wanpela man inap trikim supaman.’ Em i kirap nogut long ol tok em i harim, na em i amamas moa yet long harim olsem em inap long i stap oltaim long Paradais long graun, olsem na em i orait long stadi long Baibel.

Taim ol i stadi i go, laik bilong Buenaventura long i stap oltaim long Paradais i kamap strong, na em i kisim save olsem em i mas stretim ol pasin bilong em inap wantaim mak God i laikim bilong kisim prais olsem. Em i kisim save tu olsem Kristen tru i no ken “bekim pasin nogut” long ol man i mekim nogut long em, olsem na em i kirap wok strong long daunim pasin bilong em long belhat.​—⁠Rom 12:​17.

Wanpela taim em i no lukluk gut na em i bamim glas i gat dring long en bilong wanpela man i kam dring long ba. Dispela man i belhat na kirap tromoi han long Buenaventura. Man! Bikpela traim tru i painim em. Ol man i stap long ba i lukim dispela samting na kwiktaim ol i ranawe​—⁠ol i ting bikpela pait tru bai kamap. Tasol Buenaventura i mekim pasin daun na baim glas i bruk, na em i baim nupela dring bilong dispela man na em i tok sori long samting em i mekim. Taim ol narapela i lukim pasin em i mekim, ol i save, long rot bilong Baibel-stadi em i bin senisim pasin bilong em, olsem na sampela i laik bai em i stadi wantaim ol. Long taim Buenaventura i kisim baptais, em i gat 5-pela Baibel-stadi pinis. Nau em i winim pinis 5-pela yia long wok elda, na long nau ol man i save tok pilai na kolim yet Buenaventura olsem supaman.

Ol i Pilim Olsem Ol i Sot Long Ol Samting Bilong Spirit

Long ol yia namel long 1970 na 1979, sampela Witnes bilong dispela hap i wok strong yet inap long strong bilong ol long autim tok na bung wantaim. Bihain sampela marit misineri bilong Spen i kam bilong helpim ol. Andres Botella em i bin mekim wok long Ekwatorial Gini inap 12-pela yia na em i tingim yet taim em i kam nupela, em i kirap nogut tru long lukim ol manmeri i pilim tru olsem “ol i stap rabis tru long ol samting bilong God.” (Matyu 5:⁠3) Em i tok: “Mi amamas tru long stadi wantaim ol man i gat laik tru long kisim save long Baibel.”

Wanpela sista bilong Spen, em Mary, em i bin stadi long Baibel wantaim wanpela yangpela meri nem bilong en Maria. Maria i tokim Mary long papamama bilong em, Francisco na Fausta, ol tu i gat laik tru long stadi. Tasol Mary i gat 15-pela stadi na papamama bilong Maria i stap longwe, olsem na sampela wik i lus na bihain em i go lukim ol.

Bihain Mary na man bilong em Serafin i bungim papamama bilong Maria na long dispela taim ol i kisim pinis buk Yu Inap i Stap Oltaim Long Paradais Long Grauna na wanpela Baibel, na ol i laik tru long kirap stadi. Olsem na long dispela taim yet ol i kirapim stadi. Serafin i luksave olsem papamama bilong Maria i save pinis long planti tok i stap long dispela buk. Taim ol i kam gen, wankain samting i kamap taim ol i stadi long namba tu sapta. Serafin i tok: “I olsem mipela i stadi wantaim tupela Witnes i baptais pinis.” Taim ol i kam namba tri taim, tupela i save pinis long olgeta tok i stap long sapta, olsem na Serafin i pasim tok long ol i mas mekim askim na bekim tasol bilong save olsem ol i bin kisim gut ol dispela tok o nogat. Em i kisim save olsem Francisco na Fausta yet i bin stadi long olgeta sapta bilong buk!

Nupela save ol i kisim i bin mekim wanem long ol? Ol i bihainim ol tok ol i lainim, na ol i kirap lusim pasin bilong bung wantaim ol man i mekim wok bilong ol spirit nogut na ol i no bung moa wantaim lotu Katolik. Na tu Francisco i lusim smok, na ol i no moa kaikai ol mit i gat blut long en. Ol samting ol i mekim i kamapim klia olsem ol i bihainim olgeta tok ol i lainim, olsem na Serafin na meri bilong em i kirapim ol long tokim ol narapela man long ol save ol i kisim pinis. I no longtaim na ol i kirap long autim tok long ol man i stap klostu long ol. Insait long 3-pela mun tasol ol i winim mak bilong kisim baptais. Nau Francisco i kamap wokman bilong kongrigesen. Tupela i stap olsem gutpela piksa na ol i givim bel long autim tok, olsem na 3-pela pikinini meri bilong ol i kamap Witnes, na tupela pikinini man i save kam long ol miting na 6-pela wanblut bilong ol i wok long stadi yet.

I no longtaim bihain long Francisco i baptais em i bungim Pablo, em wanpela man i givim bel long lotu Katolik na em i save lukautim ol samting bilong mekim lotu long haus lotu bilong em. Pablo i save mekim tok long lotu taim pris i no stap. Na taim wanpela long lotu bilong em i sik, em i save go lukim em; o sapos wanpela i no kam long lotu, em i save go lukim em na givim sampela tok long em bilong helpim em; na sapos wanpela i dai em i save givim sampela tok bilong strongim famili bilong em. Long kain pasin bilong em, olgeta man long lotu bilong em long dispela hap ol i laikim em.

Pablo i save tingim tru Baibel, olsem na taim Francisco i askim em long stadi, em i orait long dispela. Wantu em i lukim olsem ol tok bilong Baibel i gat as bilong en, na taim em i stadi inap sotpela taim tasol, em i tingting long mekim wok long ol tok bilong Baibel em i lainim bilong helpim wanpela wanlotu i gat sik. I no longtaim bihain, long wanpela tok bilong Pablo long Sande, em i kamapim klia olsem em i bikpela samting long kamapim nem bilong God, em Jehova, na bilong wanem ol i no ken mekim wok long ol imis.

Pablo i amamas long kisim tok i tru, olsem na em i ting ol narapela long lotu bilong em tu bai amamas long ol dispela tok. Tasol taim em i mekim 3-pela o 4-pela tok long lotu, em i save ol i no amamas long ol tok em i givim long ol. Olsem na em i kirap lusim dispela lotu na em i bung oltaim wantaim ol Witnes Bilong Jehova. Insait long sampela mun tasol em i winim mak bilong kisim baptais, na nau em i save givim bel tru long autim tok. Maski em i no inap long autim tok long olgeta de, nau em i mekim 10-pela Baibel-stadi.

Bung Wantaim na Bai Wok i Go Bikpela

Ol Witnes long Ekwatorial Gini i tingim tru tok bilong Baibel long ol i no ken lusim pasin bilong bung wantaim. (Hibru 10:25) Kirap long 1994 taim gavman i givim tok orait gen long wok bilong ol Witnes, ol brata i gat bikpela tingting long wokim ol gutpela Haus Kingdom. Olsem na planti kongrigesen i wokim pinis Haus Kingdom bilong ol na sampela i wok long wokim yet.

Long Mongomo, namba bilong ol man i kam long miting long Sande i go antap tru, winim namba bilong ol pablisa long kongrigesen olsem 2 na hap taim, olsem na kongrigesen i wok strong long wokim bikpela haus bilong miting. Ol narapela lotu long Mongomo i save baim ol wokman long wokim haus lotu bilong ol, olsem na taim ol Witnes bilong dispela hap i mekim ol dispela wok, planti man i lukim wok ol i mekim. Long wanpela de pasto bilong lotu Iglesia Nueva Apostolica (New Apostolic Church) i kam long ples ol brata i wok long en na em i askim wanpela elda, hamas pe em i save givim long ol man i mekim dispela wok. Pasto i tok, maski em i bin baim ol man long lotu bilong em, em ol i save long wokim haus long brik, tasol wok i no pinis hariap. Em i tingting long kisim ol dispela man i wokim Haus Kingdom long wokim haus lotu bilong em. Elda i tokim em olsem ol man i wok hia em ol Witnes na ol i no kisim pe long dispela wok. Man! Em i kirap nogut na em i wokabaut i go.

Ol man i stap longwe long Haus Kingdom i mas lusim strong na taim bilong ol na givim bel long kam long ol miting. Dispela samting i bin painim Juan, em wanpela yangpela man i bin kisim baptais long 1994. Em i harim tok i tru long Gabon. Long dispela hap em i stadi long namba wan hap bilong buk Stap Oltaim na bihain em i go bek long as ples bilong em long Ekwatorial Gini, em i stap longwe long Mongoma inap olsem 100 kilomita. Dispela i givim hatwok long em long stadi yet. Tasol em i no lusim stadi. Long olgeta mun em i save lusim 8-pela aua long ran long wilwil i go long Mongomo na stadi wantaim Santiago, em wanpela elda bilong dispela hap. Em i stap sampela de long Mongoma na em i stadi 3-pela o 4-pela taim long dispela hap taim. Long dispela rot em i pinisim stadi bilong em hariap na em i winim mak bilong kisim baptais.

Olsem wanem Juan i stap strong long ol samting bilong spirit, maski em i bung wantaim ol narapela Kristen long wan wan taim tasol? Em i save wok strong long autim gutnius. Em i bin autim tok long olgeta manmeri long ples bilong em, na taim em i kisim baptais em i gat 13-pela Baibel-stadi pinis. Sikspela sumatin bilong em i bin kam wantaim em long Bikpela De kibung long Mongomo bilong lukim em i kisim baptais. Long nau em i save mekim stadi Wastaua long olgeta wik wantaim ol man long dispela hap em ol i gat laik long kisim save, na inap olsem 20 manmeri i save bung.

Givim Wara Long Pikinini Kaikai na No Ken Les

I no olgeta pikinini kaikai bilong spirit bai kamap hariap. Sampela taim yumi mas wet longtaim liklik long lukim ol pikinini kaikai i kamap na karim kaikai. Dispela samting i bin painim Paca. Em i bin harim gutnius namba wan taim long 1984 taim Edita, wanpela sista painia, i autim tok long em long maket. Taim Edita i go lukim Paca long haus bilong em long wik bihain, Paca i orait long stadi long Baibel. Maski em i no wok long kamap strong, Edita i no lusim em, long wanem, em i lukim olsem Paca i gat gutpela pasin. Edita i tok: “Em i gat pasin olsem bilong sipsip na mi beten askim Jehova long helpim Paca na bai tok i tru i ken i go daun long bel bilong em.”

Maski Paca i stadi sampela taim na sampela taim nogat, em i stadi yet inap long 4-pela yia na hap, tasol em i no kamap strong liklik. Olsem na taim ol i pinisim buk Stap Oltaim, Edita i mekim tok bilong helpim Paca long save, em i bikpela samting long em i pilim gut tok i tru. Aiwara bilong Edita i pundaun taim em i mekim ol tok bambai Paca i ken pilim tru.

Paca i tok: “Mi pilim tru ol gutpela tok bilong helpim mi. Na long dispela taim mi kirap long senisim ol pasin bilong mi, na mi putim nem bilong mi long Skul Bilong Autim Tok, na long dispela yia yet mi kamap pablisa i no baptais. Dispela de mi kisim baptais em i wanpela de mi bin amamas tru winim ol narapela de long laip bilong mi!” Bipo Paca i no pilim tumas tok i tru, tasol nau em i givim bel tru. Long nau em i gat 13-pela Baibel-stadi na em i isi long ol stadi i no senisim ol pasin bilong ol hariap.

Helpim Ol Long Kisim Gutpela Sindaun

Ol Witnes Bilong Jehova long Ekwatorial Gini i bihainim tok bilong Baibel na ol i kisim gutpela nem namel long ol narapela man long tok tru na stap gut na bihainim stretpela pasin. Wanpela man i bin kirap nogut long pasin bilong ol na em i kam bungim wanpela elda bilong kongrigesen Bata na i askim em olsem: “Yu gat buk Toktok Gut Wantaim Ol Man Long Baibel?b Mi les pinis long i stap olsem man bilong dispela graun. Mi laik kamap wanpela Witnes Bilong Jehova!”

Antonio em wanpela wokman long kongrigesen long Malabo, na em i wankain olsem ol narapela man i stap olsem man bilong dispela graun na bihain ol i kamap Witnes. Taim em i no stadi yet long Baibel em i man bilong bihainim ol laik nogut bilong skin. Ol mani em i kisim long wok bilong stretim ol klok, em i tromoi nabaut long dring, na tu em i bin mekim pasin pamuk. Wanem samting i bin helpim em long senisim sindaun bilong em? Em i pilim tru ol strongpela tok i stap long 1 Korin 6:​9, 10, i tok: “Nogut yupela i giamanim bel bilong yupela yet. Ol man i save mekim pasin pamuk, . . . na ol man i save spak, . . . bai i no inap i go insait long kingdom bilong God.” Em i kisim save olsem, bilong God i ken orait long em, em i mas senisim pasin bilong em. Olsem na em i was long pasin bilong em long bung wantaim ol narapela. (Sindaun 13:​20) Taim ol poroman bilong em long bipo i askim em long i go dring wantaim ol, em i tok em i no laik i go, na em i kirap autim tok long ol. I no longtaim na ol i no wok moa long pulim em long go dring wantaim ol.

Antonio i gat wanem tingting long hatwok bilong em long lusim pasin nogut? Antonio i tok: “Mi amamas tru long senisim pasin bilong mi, na skin bilong mi i stap gutpela yet, maski mi winim pinis 60 krismas, tasol ol poroman bilong mi long bipo, sampela i dai pinis na sampela em skin bilong ol i bagarap. Nau mi gat ol gutpela poroman, winim ol dispela poroman em ol i giaman tasol na ol i laik bai ol narapela i baim dring bilong ol. Na bikpela samting moa, em mi stap gut long God. Mi mekim wok painia long nau na mi save stadi long Baibel wantaim wanpela man em tu i gat hevi long dring, na mi inap mekim wok long ekspiriens bilong mi long helpim em.”

Kamap Wokboi Bilong God

Long 200 yia samting bipo, ol i kalabusim ol manmeri bilong nambis bilong Ekwatorial Gini na kisim ol i go olsem wokboi nating long hap bilong Not na Sentral na Saut Amerika. Long nau, planti long laik bilong ol yet ol i kamap wokboi​—⁠olsem wokboi bilong God. Dispela kain pasin bilong wok kalabus i helpim ol long kamap fri tru​—⁠em i mekim ol i lusim ol bilip giaman bilong ol Babilon na wok bilong ol spirit nogut. Em i lainim ol tu long kisim gutpela sindaun na i stap amamas. Nau ol i kisim save long samting Jisas i tok promis long en, olsem: “Yupela bai i save long tok tru, na tok tru bai i mekim yupela i kamap fri.”​—⁠Jon 8:32.

Long Memorial long 1995, inap olsem 1,937 i bung​—⁠namba i go antap tru, winim namba bilong ol pablisa long dispela kantri inap olsem 6-pela taim. Olsem na rot i op yet long bikpela wok moa bilong spirit bai kamap. Ol Witnes long Ekwatorial Gini i wok strong tru long planim na givim wara long pikinini kaikai bilong tok i tru na ol i save, ‘God bai mekim kaikai i kamap.’ (1 Korin 3:⁠6) Tru tumas, long Ekwatorial Gini i gat gutpela taim bilong ol samting bilong spirit i ken kamap bikpela!

[Ol Futnot]