Ripot Long Wok Bilong Kingdom

Helpim Kain Kain Man Long Harim Tok i Tru

APOSEL Pol i man bilong givim bel long autim tok bilong Kingdom bilong God. Em i no larim ol birua i pasim em long mekim wok bilong em long autim “gutnius.” (1 Korin 9:16; Aposel 13:50-52) Pol i kirapim ol narapela long bihainim pasin bilong em.​—⁠1 Korin 11:⁠1.

Long olgeta hap ol man i save ol Witnes Bilong Jehova i wok strong long autim tok. Tru tumas, ol i save toktok wantaim ol man long taim ol i “redi long harim tok” na tu long taim “ol i no redi.” Ol Witnes i mekim olsem bilong inapim wok God i givim long ol bilong ‘kamapim disaipel.’ (2 Timoti 4:2; Matyu 28:​19, 20) Maski long sampela kantri ol man i pasim wok bilong ol, ol Witnes i helpim ol man i gat gutpela bel long kisim save long dispela bikpela tok bilong Kingdom bilong God, olsem ol ekspiriens i stap daunbilo i kamapim.

◻ Long wanpela ailan long hap bilong westen Pasifik ol i putim tambu long wok bilong ol Witnes Bilong Jehova. Long dispela ailan wanpela pikinini i gat 12-pela krismas i luksave olsem em i skul namel long ol manki i gat pasin nogut. Planti wanklas bilong em i save smok, na kaunim ol buk bilong ol manmeri i mekim pasin sem, na ol i save mekim nogut long ol tisa, na ol i insait long pait. Ol dispela pasin i go moa nogut, olsem na pikinini i askim papa bilong em olsem em inap i go long narapela skul. Papa i toktok wantaim pikinini bilong em na em i kamapim ol tok i makim olsem em i no wanbel long dispela tingting, long wanem, em i pilim olsem ol skulmanki long ol narapela skul i stap klostu bai i gat wankain pasin tasol. Tasol em bai helpim pikinini bilong em olsem wanem?

Papa i tingim wanpela buk i stap long haus i gat stori bilong ol yangpela. Dispela buk em presen wanpela wanblut Witnes i bin givim long em. Em i kirap painim dispela buk na taim em i painim pinis, em i givim long pikinini bilong em. Nem bilong dispela buk em Sampela Askim Bilong Ol Yangpela​—⁠Ol Gutpela Bekim.a Pikinini i lukim sapta i gat het-tok “Mi Ken Mekim Wanem na Bai Ol Wanlain i No Ken Pulim Mi?” na dispela sapta i helpim em tru. Dispela sapta i helpim em long save em i bikpela samting long mekim ol samting na bai em i ken amamas long em yet, na tu em i helpim em long bihainim gutpela tingting taim em i sakim ol narapela i laik subim em long bihainim ol pasin i no stret. Taim em i bihainim ol lo bilong Baibel i stap long dispela buk, em i lain long ol samting em i ken mekim taim ol wanlain i laik pulim em.

Taim papa i lukim dispela samting na ol narapela senis nau pikinini i bin mekim​—⁠em i kirap kaunim dispela buk. Papa i pilim tru ol gutpela tok i stap long dispela buk na em i askim ol Witnes Bilong Jehova long stadi long Baibel wantaim em. Bihain, ol narapela long famili bilong em tu i kirap stadi. Wanem samting i bin kamap? Dispela pikinini, liklik brata bilong em, papa, na tupela tumbuna bilong dispela pikinini, olgeta i kamap Witnes Bilong Jehova.

◻ Long dispela ailan yet, tupela Witnes Bilong Jehova i kalabus, long wanem, ol i strong long bihainim ol lo bilong Baibel. Maski dispela samting i kamap, ol i no larim dispela hevi i pasim ol long tokaut long Kingdom bilong God. Ol i toktok wantaim wanpela bos bilong haus kalabus na ol i kisim tok orait long mekim Memorial insait long haus kalabus bilong tingim indai bilong Krais Jisas. Ol i amamas tru taim 14 kalabusman i tok olsem ol i laik save long Baibel na ol i bung wantaim ol Witnes long dispela bikpela bung! Taim ol i pinis long kalabus, sampela i bin stadi yet long Baibel na bung wantaim ol Witnes Bilong Jehova.

Long 25 samting kantri, ol Witnes Bilong Jehova i kisim nogut, long wanem, ol i tambuim wok bilong ol o ol i birua long ol long kain kain rot. Olsem ol aposel, “ol i no lusim wok bilong autim gutnius. Nogat. Ol i tokaut klia olsem, Jisas em i dispela man God i bin promis long salim i kam bilong kisim bek ol manmeri.”​—⁠Aposel 5:42.

[Futnot]