Taim Bilong Hevi Bilong Ol Lapun

MAMA ONIYAN, em i gat 68 krismas, na em i sindaun long wanpela biktaun long hap bilong Wes Afrika. Taim em i yangpela em i ting olsem taim em i lapun pinis, em bai sindaun wantaim ol pikinini na bubu bilong em, na malolo. Tasol nogat​—⁠long olgeta de em i wok long bikpela san na salim kolwara bilong dring. Liklik mani em i kisim i helpim em long i stap laip. Tupela pikinini man bilong em ol i sindaun long wanpela longwe kantri. Inap longtaim pinis ol i no bin salim sampela mani i kam long em.

Bipo long Afrika ol man i save givim biknem long ol lapun. Ol man i save tingim gut ol, long wanem, ol lapun i stap longtaim na ol i gat planti save na gutpela tingting. Ol lapun i save mekim sampela wok bilong mekim bikpela long ol bubu. Ol yangpela i save go askim ol long sampela tok bilong helpim ol, na ol i laik bai ol i ken orait long ol. Ol man i save bihainim dispela tok bilong Baibel: “Yupela i mas aninit long ol lapun na mekim gut long ol.”​—⁠Wok Pris 19:⁠32.

Tasol nau ol samting i narapela kain. Pasin bilong i stap rabis, mani i lusim strong bilong en, i no gat wok, na pasin bilong lusim ples na go stap long biktaun, ol dispela samting i mekim na planti lapun i mas lukautim ol yet. Dairekta bilong wanpela lain bilong lukautim ol lapun long Kenya, em Camillus Were, em i tok: “Ol man i wok long lusim pasin bilong helpim na lukautim ol lapun.”

Tasol i no long ol kantri long Afrika tasol ol famili i no stap strong moa. Nius Guardian Weekly i stori long kantri Japan olsem: “Lotu Konfusas i bin skulim ol Japan long pasin bilong laikim tru famili bilong ol, tasol nau dispela pasin i wok long bagarap, long wanem, ol man i save lusim ples na go sindaun long biktaun, na famili i no pas strong moa wantaim: long nau, planti Japan, olsem 85 pesen, ol i dai long haus sik o long haus bilong lukautim ol lapun.”

Tasol maski ol man i stap olsem wanem, sapos ol i laik tru long mekim ol pasin God i laikim, ol bai wok strong long givim biknem long papamama bilong ol. Ol bai bihainim dispela tok bilong Baibel: “Yu mas aninit long papamama bilong yu . . . Sapos yu mekim olsem, orait olgeta wok samting yu mekim i ken kamap gutpela, na bai yu stap longpela taim long dispela graun.” (Efesus 6:⁠2, 3) Sampela taim i hatwok long lukautim lapun papamama na givim biknem long ol, tasol dispela wok i gat gutpela pe bilong en.