Ol Popaia Bilong Bipo Inap Skulim Yumi
OL LO bilong God long ol stretpela pasin yumi mas bihainim ol i bilong i stap oltaim oltaim na ol i no save senis. Long dispela as, lo yumi lukim long Galesia 6:7 em i stret long nau: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.” Maski man i tok em i no ken kot long God long samting em i bin mekim, dispela lo bilong God i stap olsem yet na i no senis liklik. Em nau, i no gat wanpela man inap abrusim ol samting i kamap long pasin em i bin mekim.
Olsem wanem long man i bihainim pasin nogut na bihain em i senisim pasin bilong em na em i kamap wanpela wokman bilong God? Ating em i mas karim yet sampela hevi i bin kamap long ol rong bipo em i bin mekim. Tasol i no olsem God i no bin lusim ol dispela rong bilong em, nogat. King Devit i pamuk wantaim Batseba na dispela i bin kamapim planti hevi long i stap bilong em. Em i no inap abrusim. Tasol em i tanim bel na God i lusim dispela rong.—2 Samuel 12:13-19; 13:1-31.
Olsem wanem? Sampela hevi i bin painim yu long ol popaia yu bin mekim bipo na yu bel hevi long dispela? Sapos yu gat stretpela tingting long dispela samting, orait taim yu hevi long rong yu bin mekim, dispela inap kirapim yu long “lukaut gut. Nogut yu pas olgeta long pasin nogut.” (Jop 36:21) Tru tumas, sapos yumi hevi long rong yumi bin mekim, dispela inap helpim yumi na bai yumi no mekim gen dispela rong. Na gutpela samting moa, Devit i bin mekim wok long samting rong bilong em i bin skulim em long en, bilong helpim em yet na ol narapela tu. Em i tok: “Bai mi lainim ol manmeri bilong sin, bai ol i ken save long pasin bilong yu, na bai ol dispela manmeri i kam bek long yu.”—Song 51:13.
[Ol Piksa long pes 7]
Sin Devit i mekim wantaim Batseba i bin skulim em