Olsem Wanem Yu Inap Lukautim Ol Pikinini Bilong Yu?

BIHAIN long Wernera i skul sampela yia long wanpela skul i stap long hap bilong em, em i kirap kisim sampela skul moa wantaim narapela 3,000 yangpela long Sau Paulo, Brasil. Em namba wan taim Werner i lukim ol wanskul i salim na kisim ol drak. Em sotpela man, olsem na i no longtaim na ol sumatin i bikpela long em, ol i mekim sampela pasin nogut long Werner em inap bagarapim skin bilong em.

Susa bilong Werner, em Eva, em tu i gat ol hevi. Em i laik mekim gutpela wok, olsem na em i stadi stadi, tasol dispela i pinisim strong bilong em na tingting bilong em i paul. Olsem ol narapela yangpela, Werner na Eva i mas i gat man i lukautim ol long ol samting bilong skin na bel na tingting. Yu inap mekim wanem bilong lukautim ol pikinini bilong yu? Yu inap mekim wanem bilong helpim ol long redi long taim ol i bikpela pinis? Yu laik ol pikinini bilong yu bai stap olsem wanem long bihain?

Samting Bilong Skin Tasol i No Inap

Tingim bikpela wok papamama i mas mekim bilong lukautim ol pikinini bilong ol long nau. I stap bilong ol famili i wok long go nogut na planti man moa i stap rabis, olsem na long planti kantri namba bilong ol pikinini i slip long rot i go bikpela moa. Ol pikinini i mekim wok mani, long wanem, i no gat man i lukautim ol bambai ol man i no inap subim ol long mekim wok. Pasin bilong mekim nabaut long ol drak, dispela tu i save bagarapim planti yangpela. Olsem: Taim wanpela yangpela bilong Brasil i kirap kisim ol drak, bel isi i pinis long famili bilong em. Papamama bilong em i bel hevi tru, na ol i hatwok long baim haus sik samting bilong helpim yangpela hia long orait gen. Na ol man bilong maketim ol drak, ol i no sori liklik. Ol i kam long haus bilong dispela famili na ol i tok strong long ol i mas bekim pe bilong ol drak.

Tasol maski ol hevi i painim ol, planti papamama i hatwok yet long lukautim ol pikinini bilong ol long kaikai, klos, na haus. Na tu, ol i lukautim ol bambai ol man i no ken mekim nogut long ol, o ol i no ken kisim drak, o ol narapela hevi i no ken painim ol. Ol i mekim gutpela wok. Tasol olsem wanem? Em inap o i gat sampela samting moa ol i mas mekim? Ol papamama i gat wok long lukautim ol pikinini long ol samting bilong bel na tingting na spirit tu. Planti papamama i save, bilong mekim gut wok bilong ol, ol i mas karim ol hevi i save kamap taim pikinini i makim ol pren em i laik raun wantaim ol, na amamas em i laik kisim. Tasol ol papamama inap mekim wanem na ol i no tingting tumas long lukautim ol pikinini bilong ol, o ol i no isi tumas long ol? Mipela i laik yu skelim ol bekim long narapela stori i kamap bihain long dispela.

[Futnot]