Husat Bai Lukautim Ol Pikinini Bilong Yumi?
LONG nau ol man i tokaut olsem pasin bilong mekim pasin sem long ol pikinini em i wanpela hevi bilong olgeta hap, na i gutpela ol i bin tokaut olsem. Ol i bin mekim ol samting bilong skelim dispela hevi. Wanpela samting em olsem: Ol i mekim wanpela bung (Stockholm Congress Against Commercial Sexual Exploitation of Children), na ol mausman bilong 130 kantri i kam long en.
Na tu, long nau sampela kantri i kamapim ol lo i tambuim ol turis long raun bilong mekim pasin pamuk, na tambuim ol piksa bilong ol pikinini i stap skin nating o mekim pasin sem. Long sampela kantri ol man i mekim pasin sem long ol pikinini, ol i save raitim nem bilong ol dispela man long wanpela buk bilong kot samting, na dispela i pasim rot bilong ol long painim ol pikinini.
Na long sampela kantri, ol i laik mekim ol samting na bai i stap bilong ol pikinini i kamap gutpela, olsem na ol i kamapim ol lo bilong lukautim ol. Na sampela kantri na sampela manmeri ol i no laik baim ol samting em ol pikinini i wok long ol faktori ol i bin wokim.
Tru, yumi olgeta i amamas long wok ol man i mekim bilong pinisim pasin sem ol man i save mekim long ol pikinini, tasol yumi mas save olsem dispela pasin nogut i bin i stap inap longpela taim. Yumi no gat stretpela tingting sapos yumi ting olsem pasin bilong kamapim ol lo bai lukautim gut ol pikinini bilong yumi. Ol i bin kamapim planti lo pinis, tasol dispela hevi i stap yet. Pasin bikhet bilong ol man i stap ples klia, long wanem, i mas i gat planti lo bilong lukautim ol pikinini bambai ol i ken i stap gut.
Ol lo i no rot tru bilong lukautim ol pikinini. Yumi ken tingim ol samting i kamap long wanpela lo em planti kantri i bin sainim (UN Convention on the Rights of the Child), na yumi ken save olsem ol lo i no inap pinisim dispela hevi. Ol ripot i kamapim klia olsem planti gavman em ol i bin sainim dispela lo, ol i gat hevi long mani, olsem na ol i no mekim bikpela wok bilong pinisim pasin sem ol man i save mekim long ol pikinini. Pasin bilong bagarapim ol pikinini i stap yet olsem wanpela bikpela hevi long olgeta hap.
Papamama Inap Mekim Ol Samting Bilong Helpim Ol
Em i bikpela wok long mekim gut wok papamama. Tru, papamama i mas daunim laik bilong ol yet. Tasol ol papamama i save tingim gut pikinini bilong ol, ol i mas mekim ol samting bambai pikinini i no ken kisim bagarap. Nius Maclean’s i tok, planti man ‘i ting wok papamama em i wanpela samting man i ken mekim taim em i gat laik long mekim.’ Tru, yumi inap tromoi nating wanpela samting yumi bin pilai long en, o yumi inap lusim wok yumi save amamas long mekim, tasol wok papamama em i wanpela wok God i bin givim long yumi bilong mekim.
Taim yu mekim gut wok papa o mama, em i wanpela gutpela presen yu inap givim long pikinini bilong yu bilong helpim em long i stap amamas na bel isi. Maski yumi gat namba o nogat, o yumi gat mani o nogat, yumi olgeta inap helpim pikinini long i stap bel isi. Yu mas stap wantaim pikinini bilong yu, na laikim em tru na mekim gut long em, na yu mas strongim bel bilong em long taim em i pret, na yu mas givim taim bilong yu long em. Pikinini bilong yu i laik bai yu stori long em, na em i laik bai yu stap olsem gutpela piksa bilong em i ken bihainim, na em i laik bai yu stretim em long pasin sori.
Yupela ol papamama, insait long famili yupela i mas bihainim klinpela pasin na tingim gut tingting na skin bilong pikinini bilong yupela. Ol pikinini i kisim save hariap long ol pasin i no stret wantaim ol lo em papamama i bin givim long ol. Ol i mas kisim save long ol pasin i stret ol i ken mekim taim ol i stap long haus na long taim ol i stap long ol narapela hap. Sapos yu no lainim ol long ol dispela samting, narapela man bai mekim dispela wok, na ating bai yu no amamas long ol samting wok bilong em bai kamapim. Skulim ol pikinini long ol samting ol i mas mekim sapos wanpela man i laik mekim pasin sem long ol. Tokim ol long wok bilong sem bilong ol, na skulim ol olsem wanpela man i no ken mekim pasin i no stret long ol dispela hap skin bilong ol. Tokim ol tu long ol samting ol i mas mekim sapos wanpela man i kamap long ol na i laik giamanim ol long mekim pasin nogut.
Long olgeta taim yu mas save ol pikinini bilong yu ol i stap we, na husat i stap wantaim ol. Husat ol i gutpela pren bilong pikinini bilong yu? Husat ol i save lukautim pikinini bilong yu taim yu no stap wantaim em? Yu inap bilip long ol? Dispela i no makim olsem papa na mama i mas tingting nogut long olgeta man. Skelim gut ol man em pikinini i save bung wantaim ol, na no ken tingim skin tasol bilong man.
Tingim bikpela bel hevi bilong ol papamama taim ol i kisim save pinis olsem sampela pris, o tisa, o wanblut ol i bin mekim pasin sem long pikinini bilong ol. Gutpela sapos yupela ol papa na mama i askim yupela yet olsem, ‘Lotu bilong mi i save larim ol man long mekim pasin sem long ol pikinini o haitim dispela pasin? Lotu bilong mi i save holimpas ol lo bilong stretpela pasin?’ Ol bekim bilong ol dispela askim inap helpim yu long mekim ol samting bilong lukautim ol pikinini bilong yu.
Tasol bikpela samting moa, yu mas wok strong long helpim ol long save na long laikim tru ol lo bilong God dispela bai helpim ol na bagarap i no ken painim ol. Taim ol pikinini i lukim papamama bilong ol i daun long ol stretpela lo, ol pikinini bai bihainim dispela gutpela pasin bilong ol.
Rot Tru Bilong Stretim Dispela Hevi
Sapos kot i makim ol man nogut long i stap longpela taim moa long kalabus, o gavman i kamapim ol strongpela lo, ol dispela samting yet bai no inap lukautim ol pikinini bilong yumi. Long rot bilong Tok Bilong God, em Baibel, God yet inap kamapim stretpela pasin na senisim tingting bilong ol man nogut bambai ol i kamap ol man i gat stretpela pasin na pasin sori.
Ol samting i kamap pinis i soim olsem dispela samting inap kamap. I gat planti man i bin lusim pasin doti em bipo ol i bin mekim. Ol i kamapim klia olsem Tok Bilong God i gat strong. Dispela em i gutpela samting, tasol planti bilong ol man i mekim pasin nogut, ol bai no senisim pasin bilong ol. Long dispela as God Jehova i bin tok promis olsem, klostu nau em bai rausim olgeta man i save mekim pasin nogut long ol pikinini bilong yumi, na tu, em bai pinisim ol tingting nogut na pasin doti na pasin mangal bilong ol.—1 Jon 2:15-17.
Bihain, long nupela taim God bai kamapim, bai i no gat moa ol rabisman, na olgeta pikinini bai i stap gutpela na i no gat wanpela man i mekim nogut long ol. Em laik bilong God yet long ol pikinini i gat kain gutpela sindaun olsem. Dispela bai mekim na pasin sem ol man i save mekim long ol pikinini bai pinis, na i no dispela samting tasol, nogat; ol bai no ken tingim moa ol samting nogut ol man i bin mekim long ol, olsem na ol inap i stap amamas. Baibel i tok: “Ol man bai i no inap tingim moa ol samting i bin kamap bipo.”—Aisaia 65:17.
Olsem na long nupela taim bilong God, tok bilong Krais Jisas bai kamap tru. Em i tok: “Yupela larim ol pikinini i kam long mi. Yupela i no ken pasim ol. Nogat. Kingdom bilong heven [em bai bosim graun, em ples Paradais ol manmeri i ken i stap long en] em i bilong kain man olsem ol dispela pikinini.”—Matyu 19:14.
[Piksa long pes 9]
Helpim ol pikinini bilong yu long save long ol laik na lo bilong God
[Piksa long pes 9]
Long pasin isi, lainim ol pikinini bilong yu long ol samting ol i mas mekim sapos wanpela man i laik mekim pasin sem long ol
[Piksa long pes 9]
Sapos yu mekim gut wok papamama, dispela em i gutpela presen tru yu ken givim long ol pikinini bilong yu
[Ol Piksa long pes 10]
Long nupela taim God bai kamapim, olgeta pikinini bai i stap gutpela