Yu Inap Save Wanem Samting i Stret o i No Stret?
“Mi yet mi bin kilim i dai olsem 25 manmeri. . . . Long olgeta nait na long olgeta de mi save lukim dispela samting long tingting bilong mi. Taim mi slip, mi save kisim driman nogut long en. . . . Taim mi raun, sampela taim mi save lukim pes bilong wanpela man na dispela i kirapim tingting bilong mi na mi tingim ol dispela manmeri mi bin kilim ol i dai. Mi inap lukim klia tru long tingting bilong mi, i olsem em i bin kamap nau tasol, long dispela de stret. . . . Mi no inap lusim tingting long dispela rong mi bin mekim.”—V.S. “Mi kisim tok olsem mi mas go insait long dispela ples na bagarapim ol birua. . . . Mi no bin tingim ol dispela birua i olsem ol man, meri, pikinini. . . . Long dispela taim bipo na long nau tu, mi pilim olsem mi bin mekim ol samting ol i bin tokim mi long mekim, na mi bihainim ol tok mi bin kisim, na mi no pilim olsem mi gat rong long mekim olsem.”—W.C.
LONG Mas 16, 1968, dispela tupela man i insait long wanpela samting bihain kot i tok em i wanpela pasin nogut tru bilong bagarapim man long taim bilong pait. Tupela soldia hia wantaim sampela soldia moa ol i bin go insait long wanpela liklik ples long Vietnam na ol i mekim save kilim i dai planti handet man, meri, pikinini, na ol lapun man bilong dispela ples. Tasol dispela tupela soldia ol i gat narapela narapela tingting long dispela samting i bin kamap. Namba wan soldia hia, bel na tingting bilong em i bagarap stret long dispela samting em i bin mekim. Namba tu soldia i pilim olsem i stret em i bin mekim olsem. Orait, olsem wanem tupela man i gat narapela narapela tingting long wankain samting i bin painim tupela?
Bilong bekim dispela askim, yumi mas tingim maus bilong bel—em wanpela samting God i bin givim long yumi na i helpim yumi long skelim yumi yet na skelim pasin na tingting bilong yumi. Maus bilong bel i save tokim yumi long wanem samting i stret na wanem samting i no stret.
Sampela man, taim ol i mas skelim samting ol bai mekim, ol i save bihainim wanpela tok bilong ol man olsem, “Larim maus bilong bel i stiaim yu.” Tasol sori tru, sampela taim yumi no inap bilip long maus bilong bel. Planti man ol i bin orait long ol pasin nogut tru bilong bagarapim man, na ol yet i bin mekim dispela samting nogut, na bel bilong ol i no kotim ol liklik. (Jon 16:2; Aposel 8:1) Wanpela man bilong Inglan i save raitim buk, em Samuel Butler, em i bin tok, kwiktaim maus bilong bel ‘i save pasim maus na i no givim tok long ol man i no laik harim.’
Olsem wanem? Yu inap bilip long maus bilong bel bilong yu? Bilong save long dispela, yu mas skelim samting olsem: Yu bin skulim gut maus bilong bel o nogat? Stori i kamap bihain long dispela bai kamapim klia dispela samting.
[Piksa Kredit Lain long pes 3]
Piksa bilong pait: U.S. Signal Corps photo