Olgeta Man Ol i Laik i Stap Fri

“Olgeta man, taim mama i karim ol, ol i stap fri, tasol long olgeta hap ol man i stap olsem kalabus.” Wanpela saveman bilong Frans, em Jon-Jak Ruso, i raitim dispela tok long yia 1762. Stap fri! Dispela em i wanpela gutpela samting tru! Tasol olsem Ruso i tok pinis, planti milion manmeri, kirap long bipo yet na i kam inap long nau, ol i no bin i stap fri. Ol i stap “olsem kalabus” na ol i no gat amamas liklik long i stap bilong ol.

PLANTI milion manmeri long nau ol i pilim pinis dispela tok, “[ol] bikman i wok long daunim ol arapela manmeri na mekim nogut long ol.” (Saveman 8:⁠9) Ol man na meri i gat laik long kisim bikpela namba, ol i pasim rot bilong ol man long i stap fri na ol i no tingim dispela samting ol i mekim. Wanpela ripot i tok: “Sampela lain bilong kilim i dai man ol i raun na kilim i dai 21 manmeri.” Narapela ripot i tok, ol soldia ‘i kilim nating ol meri, ol pikinini, na ol lapun, na katim nek bilong sampela, na kisim gan na sutim long het ol man ol i bin holim ol. Ol i bagarapim ol liklik ples na tromoi ol bom.’

Olsem na i gat as na ol man i gat strongpela laik long i stap fri na ol i redi tu long pait bambai ol i no ken i stap aninit long ol man i daunim ol! Tasol sori tru! Taim ol man i pait bambai ol i ken i stap fri, planti taim samting ol i mekim i save daunim ol narapela na i pasim ol long mekim samting i stret ol i ken mekim. Bilong helpim wok bilong ol, sampela taim ol i kilim i dai ol man meri pikinini i no gat asua, tasol long kain taim olsem, ol i tokaut olsem dispela wok bilong ol em i gutpela na i stret, olsem na i dai bilong ol dispela man meri pikinini “i stret.” Olsem: Long yia i go pinis long Aialan, long liklik ples Oma, “ol lain i pait bilong helpim ol man long i stap fri” ol i putim bom long wanpela ka na bom i kilim i dai 29 manmeri i no gat asua na i bagarapim planti handet moa.

Ol i Stap “Kalabus” Yet

Taim pait i pinis, dispela i helpim ol olsem wanem? “Ol lain i pait bilong helpim ol man long i stap fri,” taim ol i winim ol pait, ating dispela i mekim na ol i kamap fri liklik. Tasol olsem wanem? Ol i stap fri tru? Maski ol i sindaun long ol kantri i stap fri, ol manmeri i stap “kalabus” yet long ol hatpela bos​—⁠olsem pasin bilong i stap rabis, ol pasin kranki bilong ol yet, sik, na dai. Ol dispela samting i wok yet long kalabusim ol, olsem na ol i no inap tok ol i stap fri tru, a?

Moses, em wanpela man bilong bipo i bin raitim Baibel, em i mekim wanpela tok i stret long i stap bilong man long bipo yet na long nau tu. Em i tok yumi inap stap olsem 70 o 80 yia, “tasol long dispela olgeta yia mipela i stap, mipela i save hatwok na painim hevi tasol.” (Song 90:​10) Yu ting dispela samting inap senis? Yu ting wanpela taim bai kamap na yumi olgeta inap stap belgut, na i no gat dispela pen na pret i save painim planti manmeri long nau?

Baibel i tok yumi inap! Em i tok, bihain, ol manmeri bai “stap gutpela tru” olsem “ol pikinini bilong God.” (Rom 8:​21) Orait nau yumi ken skelim gut dispela pasin bilong i stap fri em aposel Pol i toktok long en long pas em i raitim long ol Kristen long Rom. Long dispela pas, Pol i kamapim klia olsem wanem yumi olgeta wan wan inap kamap “gutpela tru,” olsem stap fri tru i go inap long olgeta taim bihain.

[Piksa Kredit Lain long pes 3]

Mipela kisim long buk Beacon Lights of History, Volyum XIII