Olsem Wanem? Yu Mas Kisim Sampela Tingting Moa?
BIKPELA guria i bagarapim tru ol samting long biktaun Kobe long hap wes bilong Japan, na kwiktaim ol volantia i kam bilong helpim ol man i bin kisim bagarap. Tasol wanpela man long lain bilong helt bilong Kobe, em i no laik givim ol marasin samting long lain dokta i kam bilong helpim ol man. Dispela man, em i dairekta tu bilong wanpela bikpela haus sik, em i laik ol man i bin kisim bagarap ol i go long ol haus sik bilong Kobe. Em i no laik ol dokta i givim ol sut na drip i gat bikpela pe long ol man long ol ples bilong lukautim ol man i bin kisim bagarap. Bihain ol dispela dokta i kisim ol marasin samting ol i laik kisim, tasol pasin bilong dispela dairekta long sakim laik bilong ol long pastaim na i olsem em i no sori long ol man, dispela samting i mekim na ol man i toktok planti long em.
Ating wanpela man i gat namba i bin mekim kain pasin olsem long yu tu. O ating yu yet i bin mekim kain pasin olsem. Olsem wanem? Sapos yu wok long kisim sampela tingting moa long ol samting dispela bai helpim yu?
Skelim Olgeta Samting
Taim ol man i skelim samting, planti taim ol i no tingim olgeta narapela narapela samting bilong en, olsem na ol i no inap save gut na pilim tru dispela samting. Planti taim as bilong dispela pasin em skul man i bin kisim, o ol samting i bin painim em, o em i go bikpela long wanem hap. Taim man i skelim olgeta samting, em inap bihainim gutpela tingting. Olsem: Sapos yu laik brukim rot long wanpela mausrot em planti ka i go i kam long en na i no gat trafik-lait, em i no savepasin long lukluk stret tasol, a? Nogat tru! Na olsem tasol, taim yu skelim gut olgeta samting bambai yu ken save gut long en, dispela bai helpim yu long pasim tok long ol samting yu laik mekim na i helpim yu long bihainim gutpela tingting. Em inap helpim yu long abrusim bagarap tu.
Ating yumi olgeta i ken wok long kisim moa yet dispela pasin. Olsem na askim yu yet, ‘Sapos mi kisim sampela tingting moa dispela bai helpim mi long wanem ol samting?’
Tingting Bilong Yu Long Ol Narapela
Yu tingim wanem samting taim yu lukim ol narapela? Yu save ting olsem tok na pasin bilong ol i nogut tasol o i gutpela tasol? Yu ting tok narapela i mekim em gutpela tok amamas o tok nogut? Yu ting tingting bilong narapela i stret olgeta o i kranki olgeta? Dispela kain tingting i olsem pasin bilong wanpela man i kisim poto. Em i no tingim kain kain gutpela kala bilong ol diwai na plaua, i olsem em i lukim blakpela na waitpela kala tasol. O yu save tingim tasol pasin kranki bilong narapela man, olsem wanpela turis i no amamas long lukim gutpela hap, long wanem, sampela narapela man i bin tromoi sampela pipia long en?—Skelim wantaim Saveman 7:16.
Yumi ken lain long planti samting taim yumi skelim pasin bilong Jehova long tingim rong bilong man. Em i save long ol pasin kranki bilong man, tasol em i no laik tingting long dispela samting tasol. Man bilong raitim Song i tok: “Sapos yu kaunim olgeta sin bilong mipela bai husat inap long winim kot bilong yu?” (Song 130:3) Jehova i redi long lusim tingting olgeta long rong bilong ol sinman i tanim bel bambai ol dispela rong i no pasim yumi long pas gut wantaim em. (Song 51:1; 103:12) King Devit i bin mekim ol bikpela rong wantaim Batseba, tasol Jehova i tok Devit i “bin strong long bihainim olgeta lo bilong mi. Na wanem ol pasin i stret long ai bilong mi, em tasol Devit i save mekim.” (1 King 14:8) Bilong wanem God inap tok olsem long Devit? Long wanem, em i tingim ol gutpela pasin bilong Devit, em man i bin tanim bel. Em i skelim olgeta samting bilong dispela rong bilong Devit, na em i marimari yet long wokboi bilong em.
Krais Jisas i bihainim stret pasin bilong Jehova long skelim rong bilong man long stretpela tingting. (Jon 5:19) Taim ol aposel bilong em i popaia, Jisas i marimari na i pilim gut hevi bilong ol. Em i save olsem ol man i gat sin ol i “gat laik bilong mekim samting, tasol bodi em i no gat strong.” (Matyu 26:41) Jisas i tingim dispela, olsem na em inap pilim hevi bilong ol disaipel na mekim pasin isi long ol taim ol i mekim rong o pasin kranki. Em i no tingting tasol long ol rong bilong ol, nogat; em i tingim ol gutpela pasin bilong ol.
Wanpela taim Jisas i stretim ol aposel, long wanem, ol i bin tok pait long husat i namba wan bilong ol, na bihain em i tok: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela. Na long kingdom bilong mi yupela bai i sindaun long tebol bilong mi na kaikai na dring. Na yupela bai i sindaun long ol gutpela sia na yupela bai i bosim ol 12-pela lain bilong Israel.” (Luk 22:24-30) Em nau, maski ol aposel i gat planti pasin kranki, Jisas i tingim pasin bilong ol long stap gut long em na long laikim em tru. (Sindaun 17:17) Jisas i bilip tru olsem ol disaipel bai mekim ol samting ol inap mekim, olsem na em i wokim kontrak bilong Kingdom wantaim ol. Tru tumas, ‘Jisas i laikim tru ol disaipel i go inap long taim em i dai.’—Jon 13:1.
Olsem na sapos pasin na rong bilong narapela i skrapim bel bilong yu, bihainim pasin bilong Jehova na Jisas. Tingting bilong yu i mas op, na yu mas wok strong long traim skelim olgeta samting. Taim yu tingting stret long ol samting, bai yu no hatwok long laikim tru ol brata na pilim gutpela pasin bilong ol.
Pasin Bilong Givim Ol Samting
Pasin bilong givim samting em i wanpela amamas bilong ol Kristen. Tasol olsem wanem? Bai yumi givim ol samting long wanpela rot tasol, olsem long rot bilong autim tok? (Matyu 24:14; 28:19, 20) O yu inap mekim sampela samting moa, olsem givim ol samting bilong skin long ol man i sot? Tru, olgeta Kristen i save olsem pasin bilong givim ol samting bilong spirit em nambawan bikpela samting. (Jon 6:26, 27; Aposel 1:8) Tasol maski em i bikpela samting, yumi no ken lusim tingting long givim ol samting bilong skin long ol narapela.—Jems 2:15, 16.
Taim yumi tingim ol samting ol brata long kongrigesen bilong yumi yet na long olgeta hap ol i sot tru long en, yumi ken save gut long ol samting yumi ken mekim bilong helpim ol. Taim ol brata i gat mani ol i givim ol samting bilong skin long ol narapela, orait olgeta brata bilong yumi i kisim ol samting ol i mas kisim. Wanpela elda Kristen i tok: “Sapos long wanpela hap ol brata i sot, ol brata long narapela hap bai helpim ol. Sapos ol i no inap mekim olsem, orait ol brata long sampela narapela hap bai helpim ol. Olsem na ol brata bilong yumi long olgeta hap ol bai kisim ol samting ol i mas kisim. Lain brata i stap long olgeta hap em i wanpela gutpela samting tru.”—2 Korin 8:13-15; 1 Pita 2:17.
Wanpela sista Kristen i gat bikpela laik long i go long wanpela kibung intenesenel long Isten Yurop, tasol em i no inap long i go. Tasol em i harim olsem ol brata long dispela hap ol i sot tru long ol Baibel, olsem na em i baim ol Baibel na salim ol i go wantaim narapela brata i go long dispela kibung. Olsem na sista hia i kisim amamas bilong man i givim ol samting long ol brata long narapela kantri.—Aposel 20:35.
Sapos yu kisim sampela tingting moa, ating yu inap mekim planti samting moa bilong helpim bikpela wok bilong skulim ol man long Baibel long olgeta hap, na dispela bai givim amamas long yu na long ol narapela tu.—Lo 15:7; Sindaun 11:24; Filipai 4:14-19.
Taim Yu Givim Tok Bilong Stretim Narapela
Taim ol i askim yumi long givim tok bilong stretim narapela, gutpela pasin na tingting bilong yumi bai mekim na ol brata spirit i tingim gut tok bilong yumi na yumi inap helpim ol gut. Tasol planti taim yumi save tingim wan wan samting tasol, na kwiktaim yumi wokim tingting maski yumi no bin skelim gut olgeta samting i bin kamap. Dispela inap mekim na ol narapela i ting, yumi no tingim gut ol samting o tingting bilong yumi i pas olgeta, olsem bilong ol bikman bilong lotu long taim bilong Jisas em ol i bin kamapim planti lo i putim hevi long ol narapela. (Matyu 23:2-4) Tasol sapos yumi no strong long kamapim tingting bilong yumi yet, na yumi givim gutpela tok em lo bilong Baibel i as bilong en na i kamapim stretpela tingting bilong Jehova na pasin marimari bilong em, orait ol narapela bai no hatwok long kisim na bihainim tok bilong yumi.
Inap sampela yia i go pinis, ol yangpela brata bilong sampela kongrigesen ol i bung wantaim bilong pilai spot. Tasol sori tru, pasin bilong resis i kamap namel long ol, na ol i tok pait. Ol elda i stretim dispela hevi olsem wanem? Ol i save ol yangpela i mas mekim ol samting bilong amamas, olsem na ol i no tokim ol long lusim pasin bilong pilai samting, nogat. (Efesus 5:17; 1 Timoti 4:8) Tasol ol elda i givim strongpela na gutpela tok lukaut long ol long ol samting pasin resis inap kamapim. Ol i givim sampela gutpela tingting tu long ol, olsem ol i ken kisim sampela man i bikpela pinis i go wantaim ol. Ol yangpela hia ol i amamas long dispela gutpela tok na ol i bihainim. Na tu, pasin bilong ol long daun long ol elda na long laikim ol i go bikpela.
Wok Long Kisim Sampela Tingting Moa
Ating yu no gat laik long tingting nogut long ol narapela, tasol yu mas wok strong yet long kisim sampela tingting moa. Taim yu stadi long Baibel, tingim tingim tok bilong en bambai yu ken save na pilim tru tingting bilong Jehova. (Song 139:17) Wok strong long save gut long as bilong ol tok na ol lo bilong Baibel, na bihainim pasin bilong Jehova long skelim ol samting. Dispela bai stret wantaim beten bilong Devit: “God, yu mas skulim mi long gutpela pasin bilong yu, na soim mi long rot bilong yu. Lainim mi long bihainim tok tru bilong yu.”—Song 25:4, 5.
Taim yu wok long kisim sampela tingting moa, bai yu kisim blesing. Wanpela blesing bilong dispela i olsem: Bai yu kisim nem olsem man i gat gutpela tingting na i pilim tingting bilong ol narapela. Bai yu inap bihainim gutpela na stretpela pasin taim yu helpim ol narapela. Na dispela bai helpim lain brata Kristen long i stap wanbel na wok gut wantaim.
[Ol Piksa long pes 12]
Pasin bilong givim ol samting i helpim ol narapela, na i givim amamas long man i givim ol samting, na Papa bilong yumi long heven em i laikim dispela pasin