Kamapim Insait Bilong Tok Bilong Baibel—Husat i Stiaim Dispela Wok?
WANPELA buk dikseneri i tok, dispela tok “kamapim insait bilong,” i olsem man i “kisim wanpela tingting long bilip bilong em yet, o long pasin bilong em long skelim wanpela samting, o long samting i kamap long i stap bilong em.” (Webster’s Ninth New Collegiate Dictionary) Olsem na taim man i kamapim insait bilong sampela tok, i gat sampela samting i save stiaim tingting bilong em, olsem i stap bilong em kirap long taim em i liklik yet, na skul em i bin kisim, na pasin bilong papamama long mekim bikpela long em.
Tasol olsem wanem long wok bilong kamapim insait bilong ol tok bilong Baibel? Yumi inap larim ‘bilip bilong yumi yet, o pasin bilong yumi long skelim wanpela samting, o samting i kamap long i stap bilong yumi’ i stiaim yumi taim yumi laik kamapim insait bilong sampela tok bilong Baibel? Planti saveman bilong Baibel na man bilong tanim tok bilong en ol i tok ol i no save mekim olsem—ol i tok God yet i stiaim ol.
Yumi ken tingim wanpela tok i stap long sta daunbilo bilong Jon 1:1 long wanpela Baibel (A New Version of the Four Gospels) em John Lingard i bin wokim long yia 1836, tasol em i no raitim nem tru bilong em long dispela Baibel—em i raitim olsem “Wanpela Katolik.” Dispela tok long sta daunbilo i tok: ‘Ol man bilong kain kain bilip bilong lotu ol i bilip olsem ol inap painim as bilong ol tingting, olsem bilip, bilong ol yet long Ol Skripsa Holi: long wanem, i no Skripsa yet i tokim ol, nogat; long tingting bilong ol yet ol i kamapim insait bilong tok bilong Skripsa.’
Tru, i olsem dispela tok i gat as bilong en, tasol dispela man i gat wanem tingting na em i raitim dispela tok? Em i mekim bilong helpim pasin bilong em long kamapim insait bilong dispela ves, em i bin tanim olsem: “Long pastaim tru ‘tok’ i stap; na ‘tok’ i stap wantaim God; na ‘tok’ em i God”; ol man i bilip long God Triwan ol i save tanim dispela ves long wankain pasin.
Wanem samting i kirapim dispela man long tanim tok bilong Jon 1:1 bilong helpim bilip bilong God Triwan? Yu ting “Skripsa yet i tokim” em long mekim olsem? Nogat tru, long wanem, yumi no inap painim dispela tok bilong God Triwan long Baibel. Yumi ken tingim tok em wanpela buk i mekim long dispela samting, em i tok: “Dispela tok God Triwan na dispela bilip bilong God Triwan i no stap long Nupela Testamen.” (The New Encyclopædia Britannica) Na wanpela profesa bilong Yunivesiti Yel, em E. Washburn Hopkins, em i tok: “Ating Jisas na Pol i no bin save long dispela bilip bilong God Triwan; . . . ol i no stori liklik long en.”
Orait yumi ken ting olsem wanem long ol man i helpim tok bilong God Triwan taim ol i tanim tok bilong Jon 1:1 o ol narapela ves bilong Baibel? I olsem Mista Lingard yet i tok, ‘i no Skripsa yet i tokim ol, nogat; long tingting bilong ol yet ol i kamapim insait bilong tok bilong Skripsa.’
Tasol gutpela tru, yumi gat Tok Bilong God yet long stiaim yumi long dispela samting. Aposel Pita i tok: “Bikpela samting yupela i mas save long en, em i olsem. Yumi no ken bihainim tingting bilong yumi yet na autim as bilong wanpela tok profet i stap long buk bilong God. Long wanem, i no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.”—2 Pita 1:20, 21.