God Triwan—Gutpela Yu Bilip long En o Nogat?

YU SAVE bilip long God Triwan? Planti milion manmeri ol i kolim Kristen ol i save bilip long dispela tok. Ating yu ting dispela tok i stap long Baibel. Tasol yu save tru long as bilong en? Yu inap stori gut long narapela man long dispela tok?

Wanpela tok bilong ol misin (Athanasian Creed) bilong kamapim bilip bilong ol long God Triwan i stori olsem:

“Papa na Pikinini na Holi Spirit ol i wanpela God tasol: biknem bilong tripela i wankain, narapela i no winim narapela, na tripela wantaim i stap oltaim oltaim. . . . Papa i gat olgeta strong, na Pikinini i gat olgeta strong, na Holi Spirit i gat olgeta strong. . . . Olsem na Papa em i God, na Pikinini em i God, na Holi Spirit em i God. Tasol i no gat tripela God, i gat wanpela God tasol. . . . long God Triwan [Triniti] narapela i no paslain long narapela o bihain long narapela; narapela i no bikpela long narapela o liklik long narapela. Tripela wantaim i stap oltaim na i strong olgeta, narapela i no winim narapela.”

Olsem na dispela tok bilong God Triwan i olsem: Papa na Pikinini na Holi Spirit i gat wankain strong na namba na tripela wantaim i stap oltaim. Tasol bikpela askim em olsem: Krais Jisas na ol aposel i bilip olsem God em i God Triwan? Sapos olsem, orait bai i gat planti askim long tok bilong ol.

Long Mak 13:32 Krais Jisas i tok: “I no gat wanpela man i save long dispela de na dispela aua [bilong God i bekim pe nogut]. Ol ensel bilong heven ol i no save long en. Pikinini tu em i no save long en. Papa tasol em i save long dispela.” Tasol sapos Papa na Pikinini i strong wantaim, olsem wanem na Pikinini i no save long dispela samting Papa i save long en? Sampela i tok, Jisas em i man na em i God, na taim em i stap man long graun em i mekim dispela tok. Tasol sapos olsem, orait olsem wanem long Holi Spirit? Ol i tok Holi Spirit i hap bilong God Triwan, orait olsem wanem na Holi Spirit i no save long dispela samting? Dispela tok bilong God Triwan i no gat strong, i olsem sen i bruk.

Na wanpela taim Jisas i tok: “I no gat wanpela man i save long Pikinini. Papa wanpela tasol i save long em. Na i no gat wanpela man i save long Papa. Pikinini tasol i save long em.” (Luk 10:22) Orait, olsem wanem long Holi Spirit? Sapos Holi Spirit i hap bilong dispela God Triwan na em i bikpela wankain olsem Papa na Pikinini, olsem wanem na Holi Spirit i no save?

Inap 20 yia samting bihain long taim Jisas i dai na kirap bek, aposel Pol i raitim tok olsem: ‘“Husat i save long tingting long Bikpela [Papa], bai em inap long skulim Bikpela?’ Tasol mipela i gat tingting bilong Krais.” (1 Korin 2:16) Sapos Papa na Pikinini i strong wankain na narapelai no winim narapela, olsem wanem yumi inap kisim “tingting bilong Krais”, tasol yumi no inap save long “tingting bilong Bikpela”?

Na long Provep 8:22-24 Baibel i tok: “Bipo bipo tru, long taim Bikpela i laik wokim ol samting, em i wokim mi pastaim. Na bihain em i wokim olgeta arapela samting. Bipo tru, long taim Bikpela i no wokim graun yet, em i wokim mi na mi stap. Mi kamap long taim Bikpela i no bin wokim solwara na ol wara nabaut.” Ol Kristen bilong pastaim i save dispela tok i makim Krais. Wanpela man i skul long tok bilong God Triwan, em Edmund J. Fortman, em i tok: “Pol i kamapim dispela tok [Provep 8:22-31] na i kolim long Pikinini Bilong God. Dispela lain, ol i kolim ol Apolojis, ol i kamapim dispela tok bilong soim ol Juda na ol manmeri bilong ol narapela lain, Tok em i bin i stap bipo na em i helpim God long wokim ol samting.” (Lukim tu Kolosi 1:15-17; Revelesen 3:14.) Tasol sapos Jisas i bin kamap nupela long wanpela taim na God i bin “wokim em” long bipo bipo tru taim em i no kam daun yet long graun, orait i no stret ol i tok em i bin i stap oltaim wankain olsem Papa. Papa i no bin kamap nupela long wanpela taim, tasol Papa i wokim Pikinini na Pikinini i kamap nupela. Olsem na dispela Pikinini em inap tok: “Mi stap laip long strong bilong Papa.”—Jon 6:57.

Planti taim Jisas i kolim Papa olsem “God bilong mi.”: Taim em i kirap bek na em i kisim pinis biknem long heven, long dispela taim tu em i kolim Papa olsem “God bilong mi.” (Matyu 27:46; Jon 20:17; Revelesen 3:2, 12) Man i stap liklik long narapela, o em i lotu long narapela, dispela kain man tasol em inap kolim narapela olsem “God bilong mi.” Orait, bilong wanem i no gat wanpela taim long Baibel, Papa i kolim Pikinini olsem “God bilong mi”? Na bilong wanem i no gat wanpela taim Papa o Pikinini i kolim Holi Spirit olsem “God bilong mi”?

Em ol bikpela askim bilong kirapim tingting bilong yumi, a?

Bilong Wanem Ol i No Kirap Nogut?

Sapos yumi ting Krais Jisas i tok em i bikpela olsem God na em i lainim ol man olsem, orait yumi gat askim: Bilong wanem Nupela Testamen i no tok ol man i kirap nogut long dispela samting? Sapos Jisas i bin tokim ol man em i bikpela olsem God, bai ol man i mekim wanem?

Orait, pastaim yumi ken skelim ol disaipel bilong Jisas. Pastaim ol i ting Jisas em i wanpela man tasol. (Lukim Mak 6:3.) Tasol sapos bihain em i tokim ol em i God, orait yu ting ol bai mekim wanem? Bai yu mekim wanem? Ating ol bai kirap nogut, long wanem ol i ting ol i sanap klostu long God yet, a?

Bipo, wanpela profesa bilong wanpela bikpela skul bilong lotu (Harvard Divinity School) em i tok: ‘Sapos Jisas i bin tok em i God, bai yumi kirap nogut tru! Sapos wanpela man i save em i bin sanap klostu long God yet, oltaim bai em i toktok long dispela samting na stori long en!’

Tasol taim yumi kaunim Nupela Testamen yumi no lukim kain tok olsem, a? Ol disaipel i no ting Jisas em i God na ol i kirap nogut na stori stori long dispela samting. Nogat. Tasol ating bai sampela i tok, isi isi Jisas i tokim ol long dispela samting na bihain bihain ol i save long en. Tasol sapos yumi kaunim ol pas ol i bin raitim taim Jisas i kirap bek pinis, ol i no tok ol i ting Jisas em i God.

Ol Juda i bilip olsem ‘Bikpela . . . em i wanpela tasol.’ Olsem na sapos Jisas em i bin lainim ol long em i bikpela olsem God na em i namba tu long God Triwan, bai ol i kirap nogut na ting em i tok bilas long God. (Diuteronomi 6:4) Olsem na i gat tupela askim yumi mas tingim:

(1) Ol man bilong raitim tok bilong Nupela Testamen, bilong wanem ol i no stori gut long dispela tok olsem God em i God Triwan na helpim ol Juda i bilip? I hatwok tru long ol i stori long kain tok olsem long ol Juda!

(2) Na ol Juda i no bilip, em ol i birua long lotu Kristen, bilong wanem ol i no sutim tok long ol Kristen long dispela bilip ol Juda i no ken laikim liklik? Sapos ol Kristen i bin tok ol i bilip olsem God em i tripela, olsem God Triwan, bai bikpela kros na tok pait i kamap long dispela!a

Olsem Profesa Norton i tok:

“Ol i gat askim long sampela samting (olsem ol manmeri bilong ol narapela lain, em ol i kamap Kristen, ol i mas katim skin o nogat). Ol i tok pait long ol dispela samting na ol Aposel i hatwok long kamapim as bilong tok i tru bambai ol i bilip long en. Tasol dispela tok bilong God Triwan, em i hatwok long save long en na em i narapela kain tru na planti man i no ken laikim, em ol i no gat tok long en. Ol i kisim tasol na bilip long en. Ol i no birua long en o kisim tingting kranki long en.”

Em dispela profesa i tok olsem.

Tasol bilong wanem ol man bilong raitim Nupela Testamen ol i no tokaut long dispela tok na kamapim sampela tok bilong helpim ol man long save gut long en? Bilong wanem i no gat tok pait long en? Bilong wanem ol Juda i no birua long ol Kristen long dispela tok? Long wanem Jisas na ol aposel i no bin lainim ol man long dispela tok! Ol i no lainim ol man olsem God em i tripela o God Triwan. Nogat tru! Orait, wanem as bilong dispela tok? Em i kamap olsem wanem?

Tok Bilong God Triwan—I No Litimapim Nem Bilong God

Tasol sampela man i tok, ‘Maski Baibel i no lainim yumi long God Triwan, tasol yumi kisim dispela tok long maus bilong ol man na yumi mas bilip long en.’ Tasol long Galesia 1:8, Pol i tok: “Sapos mipela yet i telimautim wanpela gutnius long yupela, o sapos wanpela ensel bilong heven em i telimautim, na sapos dispela em i no wankain olsem dispela gutnius bipo mipela i telimautim long yupela, orait man i mekim olsem em i ken lus.”

Baibel i tok, bihain bai ol man i lusim lotu Kristen tru na bihainim ol tok giaman: “Holi Spirit i tok klia olsem: Bihaintaim bai sampela man ol i lusim bilip. Bai ol i harim maus bilong ol spirit bilong giaman na bihainim tok bilong ol spirit nogut.” (1 Timoti 4:1) Ol bikpela buk (olsem New Catholic Encyclopedia) i tok, ol misin i kirap bilip long dispela tok long yia 350 samting. Olsem na yumi gat askim: Ating ol man i lusim bilip tru ol i kamapim dispela tok? Ating tok bilong God Triwan i wanpela “tok bilong ol spirit nogut”?

Orait, dispela tok i kamapim wanem kain wok? Ol Juda i sutim tok long Jisas na i tok: “Spirit nogut i stap long yu.” Jisas i bekim tok, olsem: “Mi no gat spirit nogut i stap long mi. Nogat. Mi litimapim nem bilong Papa bilong mi.” (Jon 8:49) Olsem wanem long tok bilong God Triwan? Dispela tok i helpim yu long i go klostu long God bilong Baibel? Dispela tok i helpim ol man long i go klostu long God na long dispela rot i litimapim nem bilong God? Oriat, nau yumi ken skelim dispela samting.

Wanpela prista bilong misin Katolik em Robert I. Gannon, em i tok: “I hatwok tru long yumi save long tok bilong God Triwan, i no gat wanpela man inap save long en.” Tasol ol man i gat tingting ol i mas save gut long ol tok bambai ol inap bilip long en. Olsem wanem yumi ken bilip long wanpela God ol man i no inap save long em? Na sapos ol man i no inap save long God, olsem wanem bai ol i litimapim nem bilong em? Ol Kristen i save long dispela God ol i lotu long Em. Em i no olsem samting i hait!—Jon 17:3.

Dispela tok bilong God Triwan i no helpim ol manmeri long i go klostu long God na litimapim nem bilong em. Nogat! Dispela tok i daunim nem bilong God na kirapim ol man long putim wanpela senis bilong God! Planti Talatala ol i litimapim nem bilong Jisas na God i stap olsem namba tu. Taim ol i tok, “Litimapim nem bilong Bikpela,” sapos yu askim ol, husat dispela “Bikpela,” bai ol i tok “Em Jisas tasol!”

Klostu long God—o Maria?

Misin Katolik i daunim moa nem bilong God, long wanem ol i litimapim nem bilong Maria. Ol i tok, Maria em i “Mama bilong God”, na “Namelmeri bilong olgeta gutpela samting,” na ol i tok em i wok wantaim Jisas long baim bek ol man, na em i “Kwin Bilong Heven.” Em, tok bilong God Triwan i kamapim dispela samting! Wanpela buk bilong ol Katolik (New Catholic Encyclopedia) i stori olsem: “Sapos Maria em i mama tru bilong Jisas na tru Jisas em i God, orait, Maria em i mama tru bilong God.”

Ol i daunim tru nem bilong Papa, olsem na wanpela man bilong Frans long bipo (Pierre Bayle, 17 senseri) em i tok bilas na em i tok God i bin putim olgeta samting bilong heven na graun long han bilong Maria na Maria i bosim. Em i tok:

“Kirap long dispela taim God i no insait moa long dispela wok. Em i larim Maria i was long olgeta samting; na em i salim sampela ensel i go toksave long ol man long Graun bambai ol i ken save i gat nupela gavman i bosim graun, na bai ol man i save ol i mas beten long husat na beten olsem wanem. Ol i no ken . . . beten moa long Maria, olsem wanpela Namelmeri o namba tu kwin. Nogat. Nau ol i mas beten long Maria olsem em i bos bilong olgeta samting.”—An Historian’s Approach to Religion bilong Arnold Toynbee.

Tasol God Jehova i tok, yumi mas lotu long em wanpela tasol! (Eksodas 20:5) Long Aisaia 42:8 (NW) em i tok, “Mi no ken givim biknem bilong mi long narapela.”

Orait, yumi skelim pinis dispela samting na olsem wanem? Nau yumi save: Tok bilong God Triwan i no bin helpim ol man long i go klostu long God na i no litimapim nem bilong God. Nogat. Dispela tok i bagarapim nem bilong God. Olsem na yumi save, ol man i bin kamapim dispela, ol i lusim pinis bilip Kristen.

Wanem As Bilong Dispela Tok?

Taim lotu Kristen i no kamap yet, ol haiden i save lotuim ol god triwan. Long stori bilong ol tumbuna bilong Isip na Babilon i gat stori bilong ol god triwan. Olsem wanem dispela tok i kam insait long lotu Kristen? Peter Eckler i stori long ol samting bilong lotu Kristen (History of Christianity), na em i tok:

“Lotu Kristen i daunim lotu Haiden, tasol lotu Haiden i paulim lotu Kristen. Ol Kristen bilong pastaim i bilip long wanpela God tasol (wanpela tingting tasol bilong ol i narapela kain long ol narapela Juda: Ol i bilip olsem Jisas em i Mesaia), tasol misin Katolik bilong Rom i senisim dispela. Misin i kamapim dispela tok olsem God em i tripela o God Triwan, em ol man i no inap save long dispela tok. Ol i holim planti bilip bilong haiden, em ol Isip i bin kamapim na Plato i bin litimapim. Ol i ting ol dispela tok i gutpela bilong bilip long en.”

Yu ting ol dispela tok i “gutpela bilong bilip long en”? Krais Jisas i tok, ol disaipel tru bilong em i mas “lotu long Papa . . . long pasin i tru.” (Jon 4:23, 24) Tru tumas, lotu bilong yumi i mas stret wantaim ol tok i tru i stap long Baibel. Yumi mas bilip olsem Krais Jisas em i “Pikinini Bilong God,” em i no God Pikinini! (Jon 20:31; 1 Jon 4:15) Yumi mas sakim olgeta tok giaman bilong ol lotu haiden. Dispela nius nau yu kaunim em i bin helpim planti milion manmeri long lotuim “long pasin i tru” dispela wanpela God em i God tru, em God Jehova.—Sam 140:7.

[Futnot]

[Piksa long pes 4]

Long olpela haus lotu Katolik, long Tagnon, long Frans ol i wokim dispela piksa bilong makim God Triwan

[Rait long pes 6]

Ol Juda i birua long lotu Kristen, bilong wanem ol i no sutim tok long ol Kristen, long dispela bilip ol i no ken laikim liklik?

[Piksa long pes 8]

Taim lotu Kristen i no kamap yet, ol haiden i lotuim ol god triwan. Yu bin save long dispela samting?