Husat Em ‘Wanpela Tasol i God Tru’?

JISAS i save beten long God, em Man em i kolim olsem Papa, na em i bin skulim ol narapela tu long mekim olsem. (Matyu 6:​9-​11; Luk 11:​1, 2) Taim Jisas i beten i stap wantaim ol aposel​​—⁠sampela aua paslain long em i dai​​—⁠em i tok: “Papa, taim i kamap pinis. Nau yu ken givim biknem long Pikinini bilong yu, olsem na bai Pikinini i ken givim biknem long yu. Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​​—⁠Jon 17:​1, 3.

Jisas i beten long Man em i kolim olsem “yu wanpela tasol yu God tru.” Em i tok long bikpela namba bilong God taim em i beten: “Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen na bai mi stap wantaim yu.” (Jon 17:⁠5) Olsem wanem na bai Jisas em i dispela man em ‘wanpela tasol i God tru’ sapos em i beten askim God long em i laik stap wantaim God? Yumi ken skelim dispela samting.

Namba Bilong Jisas Long Heven

Sampela aua bihain long Jisas i mekim dispela beten, ol i kilim em i dai. Tasol em i dai i stap inap sotpela taim tasol​​—⁠kirap long apinun long Fraide na i go inap long moningtaim long Sande. (Matyu 27:⁠57–​28:⁠6) Aposel Pita i tok: “Dispela man Jisas, God i kirapim em pinis long matmat. Mipela olgeta i lukim em bihain long em i kirap bek, na mipela i save tokaut long ol samting mipela i lukim.” (Aposel 2:​31, 32) Olsem wanem? Jisas inap kirapim bek em yet? Nogat, Baibel i tok ol man i dai pinis “ol i no inap save long wanpela samting.” (Saveman 9:⁠5) Papa bilong Jisas long heven, em ‘wanpela tasol i God tru,’ em i bin kirapim bek Pikinini bilong em.​​—⁠Aposel 2:​32; 10:⁠40.

Bihain liklik ol birua i kilim i dai Stiven, em disaipel bilong Jisas. Taim ol i laik tromoi ston long em, Stiven i lukim wanpela samting olsem driman. Em i tok: “Harim. Mi lukim heven i op, na Pikinini Bilong Man em i sanap i stap long han sut bilong God.” (Aposel 7:​56) Stiven i lukim Jisas, “Pikinini Bilong Man,” i holim wok i sambai long God long heven​​—⁠“em i sanap i stap long han sut bilong God”⁠​—⁠long wankain pasin olsem em i bin stap ‘wantaim God’ paslain long em i kam long graun.​​—⁠Jon 17:⁠5.

Ol i kilim i dai Stiven pinis na bihain, long rot bilong wanpela mirakel Jisas i kamap long Sol, em ol man i save long em long nem Rom bilong em, Pol. (Aposel 9:​3-6) Taim Pol i stap long Atens, Grik, em i toktok long dispela “God i bin wokim skai na graun wantaim olgeta samting i stap long en.” Em i tok dispela God, em ‘wanpela tasol i God tru,’ em bai “skelim pasin bilong olgeta manmeri bilong graun. Na em i bin makim wanpela man bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God i bin givim dispela wok long em.” (Aposel 17:​24, 31) Long dispela ves aposel Pol i tok long Jisas olsem “wanpela man”​​—⁠yes, dispela man i no gat bikpela namba olsem God​​—⁠em God i bin kirapim em na em i kisim laip gen long heven.

Aposel Jon tu i bin tok long Jisas olsem em i stap nambatu long God. Jon i tok em i raitim gutnius na bai ol man i ken bilip olsem Jisas em i “Pikinini Bilong God”​​—⁠em yet i no God. (Jon 20:31) Na tu, Jon i bin lukim samting olsem driman na em i lukim “Pikinini Sipsip”​—⁠long Gutnius bilong em, em i tok dispela Pikinini Sipsip em Jisas. (Jon 1:​29) Pikinini Sipsip i sanap wantaim 144,000 manmeri em Jon i tok “God i bin baim bek [o kirapim bek] ol namel long olgeta manmeri bilong graun.” Jon i tok ol dispela 144,000 manmeri ol i gat “nem bilong Pikinini Sipsip na nem bilong Papa bilong en . . . long pes bilong ol.”​​—⁠KTH 14:​1, 3.

Yu ting “Pikinini Sipsip” em i wankain man olsem “Papa bilong en”? Yumi save olsem nogat. Baibel i stori long tupela olsem ol i narapela narapela man. Nem bilong ol tu i narapela narapela.

Nem Bilong Pikinini Sipsip na Nem Bilong Papa

Olsem yumi stori pinis, nem bilong Pikinini Bilong God​—⁠Pikinini Sipsip​—⁠em Jisas. (Luk 1:​30-​32) Na olsem wanem long nem bilong Papa bilong em? Taim ol i bin raitim Baibel long namba wan taim, nem bilong God i bin stap planti tausen taim long en, na dispela nem em Jehova. Tasol sori tru, long planti Baibel ol i bin rausim nem bilong God, em Jehova, na ol i raitim “Bikpela” na “God.”a Tasol long planti Baibel ol i bin putim bek nem bilong God long ples stret bilong en.

I gat wanpela Baibel long tok Inglis, em American Standard Version bilong 1901 we ol i bin putim bek nem bilong God, Jehova, long ples stret bilong en. Hap bilong ol tok i go pas i tok: “Lain bilong stretim sampela tok long dispela Baibel ol i bin skelim gut ol samting na ol i kisim save olsem ol Juda i bin bihainim wanpela tingting kranki na ol i pret long kolim Nem Bilong God, long wanem, ol i tok dispela nem i holi tumas. Tasol yumi no ken bihainim moa dispela tingting kranki. Yumi mas putim nem bilong God long ol Baibel Inglis na long ol narapela Baibel tu, olsem ol misineri long nau i save mekim long planti Baibel ol i wokim.”b

Bilip Bilong God Triwan i Kirap We?

Orait olsem wanem long dispela bilip olsem Jehova na Jisas ol i wankain God, olsem bilip bilong God Triwan i tok? Nius The Living Pulpit bilong Epril-Jun 1999 i stori long bilip bilong God Triwan olsem: “I gat wanpela God na wanpela Papa, wanpela Bikpela Jisas Krais, na wanpela Holi Spirit, tripela ‘man’ . . . em ol i wankain o wanpela tasol . . . ; tripela man em ol i wanpela God, olgeta samting long ol i wankain, tasol pasin bilong ol i narapela narapela.”c

Dispela bilip bilong God Triwan i bin kirap olsem wanem? Nius Christian Century bilong Me 20-​27, 1998, i kamapim tok bilong wanpela pasto em i tok God Triwan em i “wanpela bilip ol lotu i skulim ol man long en na i no samting Jisas i skulim ol man long en.” Maski Jisas i no bin skulim ol man long bilip bilong God Triwan, yu ting dispela bilip i stret wantaim ol tok Jisas i skulim ol man long en?

Papa i Winim Pikinini

Jisas i bin skulim ol disaipel long beten olsem: “Papa bilong mipela, yu stap long heven, nem bilong yu i mas i stap holi.” Baibel i stori long Papa bilong yumi long heven, nem bilong em Jehova, olsem em i bikpela na i winim Pikinini. Olsem: Jehova i stap “oltaim oltaim . . . long bipo na long bihain tu.” Tasol Baibel i tok Jisas em i “namba wan pikinini bilong God.” Jisas yet i bin skulim ol man olsem Jehova i bikpela na i winim em taim em i tok: “Papa i stap namba wan tru na i winim mi.” (Matyu 6:9; Song 90:​1, 2; Kolosi 1:​15; Jon 14:28) Tasol bilip bilong God Triwan i tok Papa na Pikinini “ol i wanpela God.”

Ol dispela save olsem Papa i winim Pikinini na Papa i narapela long Jisas, ol i stap ples klia long ol beten bilong Jisas, olsem dispela beten em i bin mekim paslain long ol i kilim em i dai: “Papa, sapos yu laik, yu ken rausim dispela kap [em bai i dai olsem wanpela man nogut] long mi. Tasol yu no ken bihainim laik bilong mi. Nogat. Yu mas bihainim laik bilong yu tasol.” (Luk 22:42) Sapos God na Jisas ol i “wanpela tasol,” olsem bilip bilong God Triwan i makim, olsem wanem na bai laik bilong Jisas i narapela long laik bilong Papa?​​—⁠Hibru 5:​7, 8; 9:​24.

Na tu, sapos Jehova na Jisas ol i wankain man, olsem wanem bai wanpela bilong tupela i save long ol samting em narapela i no save long en? Olsem: Jisas i tok long dispela taim God bai mekim kot long ol man: “I no gat wanpela man i save wanem de na wanem aua dispela ol samting bai i kamap. Ol ensel bilong heven i no save, na Pikinini tu em i no save. Papa wanpela tasol em i save.”​​—⁠Mak 13:⁠32.

God Triwan na Lotu

Jisas na ol Kristen bilong pastaim ol i no bin skulim ol man long bilip bilong God Triwan. Olsem yumi stori pinis, em i “wanpela bilip ol lotu i skulim ol man long en.” Nius The Living Pulpit bilong 1999 i tok long bilip bilong God Triwan olsem: “Sampela taim i luk olsem olgeta man i tingim bilip bilong God Triwan olsem wanpela as bilip bilong lotu,” tasol nius i tok moa olsem em i no “wanpela bilip Baibel i stori long en.”

Buk New Catholic Encyclopedia bilong 1967 i stori gut long bilip bilong God Triwan na i tok: “Taim yumi skelim gut olgeta samting, bilip bilong God Triwan i bin kirap klostu long yia 400. . . . Paslain long yia 400, dispela tok ‘tripela Man long wanpela God’ i no kamap strong, na ol Kristen i no kisim tru olsem wanpela tok ol i bilip long en.”

Martin Werner, em i profesa long Yunivesiti Bilong Bern, Swiselan, em i tok: “Taim Nupela Testamen i stori long Jisas i stap olsem wanem long God Papa, maski em i stori long Jisas i kam long graun olsem wanpela man o wok bilong em olsem Mesaia, long olgeta taim Nupela Testamen i tok em i stap nambatu.” Dispela i kamapim klia olsem samting em Jisas na ol Kristen bilong pastaim i bilip long en i narapela olgeta long bilip bilong God Triwan em ol lotu long nau i skulim ol man long en. Orait dispela bilip bilong God Triwan i bin kirap olsem wanem?

Bilip Bilong God Triwan i Kirap

Baibel i stori long planti god man na god meri em ol man i bin lotuim, na sampela bilong ol em Astarte, Molek, na Kemos. (1 King 11:​1, 2, 5, 7) Planti manmeri bilong Israel bilong bipo ol i bin bilip olsem Bal em i God tru. Olsem na Elaija, em profet bilong Jehova, em i tokim ol: “Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.”​​—⁠1 King 18:⁠21.

Pasin bilong lotuim ol god haiden i gat tripela man long en, o ol god triwan, em i bin stap pinis paslain long mama i karim Jisas. Saveman Will Durant i tok: “Ol tingting bilong god triwan i bin kirap long Isip.” Long buk Encyclopædia of Religion and Ethics, James Hastings i tok: “Long lotu bilong India i gat god triwan bilong Brama, Siva, na Visnu; na long lotu bilong Isip i gat god triwan bilong Osairis, Aisis, na Horas.”

Olsem na i gat planti god. Olsem wanem? Ol Kristen bilong pastaim i bin bilip long ol dispela god? Ol i tingim Jisas olsem em i God i Gat Olgeta Strong?

[Ol Futnot]

[Piksa long pes 7]

ISIP

God triwan bilong Horas, Osairis, na Aisis, winim 3,000 yia i go pinis

[Piksa long pes 7]

PALMIRA, SIRIA

God triwan bilong god bilong mun, Bikpela Bilong Skai, na god bilong san, long taim bilong ol aposel

[Piksa long pes 7]

INDIA

God triwan bilong ol Hindu, yia 600 samting

[Piksa long pes 7]

NOWE

God Triwan (Papa, Pikinini, na Holi Spirit), yia 1200 samting

[Piksa Kredit Lain long pes 7]

Top two photos: Musée du Louvre, Paris