Strongpela Kristen i Dai Pinis

LONG Me 30, 1983 Brata Suiter i pundaun na kisim bikpela bagarap. Olgeta bun bilong em i dai. Tasol em i stap laip inap 6-pela mun moa. Em i no inap toktok, tasol em i tingim wok bilong Jehova na em i amamas long save lain bilong Jehova i kamap bikpela. Inap 36 yia Brata Suiter i stap olsem sekreteri bilong Sosaiti Was Taua na lukautim ol akaun. Tasol long Novemba 22, 1983 em i dai pinis. Long Novemba 23, taim ol brata sista bilong Betel long Bruklin na bilong Wastaua Fam ol i bung bilong mekim lotu na kisim kaikai bilong moningtaim, ol i harim tok long dispela samting.

Long apinun ol i bung long Haus Kingdom long Betel bilong tingim Brata Suiter. Ol i bikpela lain, olsem na sampela i bung long arapela hap bilong haus Betel na ol i lukim ol samting long televisen, na ol brata sista long Wastaua Fam i harim ol tok long rot bilong telefon. Planti brata sista bilong Betel, ol inap olsem 3,123, ol i bung. Sampela ol i sumatin bilong Skul Giliat na planti narapela manmeri tu ol i kam. Sampela brata bilong Betel ol i mekim tok na stori long gutpela wok Brata Suiter i bin mekim. Dispela i no bilong litimapim nem bilong Brata Suiter. Nogat. Tasol ol i laik kirapim ol narapela brata sista long mekim gutpela wok olsem Brata Suiter i bin mekim na i stap gut long wok bilong God i go inap long taim ol i dai. Brata Suiter i strong long bihainim “stretpela pasin.” Em i bilip long Bikpela na em i dai. Em i mekim bikpela wok bilong helpim wok bilong Kingdom. (Aisaia 61:3, NW; Revelesen 14:13) Ol dispela brata i tok tu, ol i pilim gutpela pasin Sista Suiter i mekim bilong lukautim man bilong em i go inap long taim em i dai.