Yu Ting Baibel Inap Helpim Yumi Long Nau?
WANPELA yangpela man i tok: ‘Taim yumi tingim olgeta tok bilong Baibel, liklik hap tasol, olsem wan pesen, em i gutpela long kaunim—ol narapela hap i no inap helpim yumi ol man bilong nau.’ Planti man i wanbel long dispela tok bilong em. Tru, Baibel i stap yet olsem nambawan long lista bilong ol buk ol man i save baim, tasol planti milion manmeri ol i no save kaunim na ol i no save long ol tok bilong en.
Wanpela nius bilong Jemani (Süddeutsche Zeitung) bilong Disemba 1996 i tok, ‘namba bilong ol man i kaunim Baibel em i wok long i go liklik. Yumi stap long taim bilong tingim ol samting bilong graun tasol na ol samting bilong saiens, olsem na long tingting bilong planti man ol tok bilong Baibel i narapela kain tru na i hatwok long save long en.’ Ol lain i askim ol man long dispela samting ol i kisim save olsem dispela tok em i tru. Sampela lain i kisim save olsem planti pikinini i no save long Jisas em i husat tru. Na i no planti man inap kolim stori bilong Baibel i toktok long pikinini man i lusim papa na i go mekim nabaut na stori bilong gutpela man bilong Samaria.
Nius bilong Misin Evanjelikal Bilong Swiselan (Reformiertes Forum) i tok ol man long Swiselan i laik kisim Baibel ol i no planti olsem bipo. Na planti man i gat Baibel pinis ol i putim i stap na ol i no kaunim. Long Briten tu i wankain. Wanpela lain i skelim tingting bilong ol man, ol i kisim save olsem klostu olgeta man i gat Baibel, tasol bikpela hap lain ol i no save kaunim.
Tasol planti manmeri long olgeta hap ol i gat narapela kain tingting long Baibel. Ol i bilip olsem Baibel em i Tok Bilong God na em inap helpim tru ol. Olsem na oltaim ol i save kaunim. Wanpela yangpela meri i tok: “Mi wok long kaunim wanpela o tupela sapta bilong Baibel long olgeta de. Mi amamas tru long kaunim.” Ol i tingim gut ol samting Baibel i lainim ol long en, na ol i wok long bihainim ol tok bilong en long i stap bilong ol. Ol i bilip olsem Baibel inap helpim ol long dispela taim nogut nau yumi stap long en.
Wanem tingting bilong yu? Yu ting Baibel i no inap helpim ol man bilong nau? O yu ting ol tok bilong en i gutpela na inap helpim tru yumi ol man bilong nau?