Wanpela Buk Planti Yangpela i No Save Tingim
WANPELA yangpela meri, nem bilong em Beate, em i tok: “Olsem wanem mi inap save olsem Baibel em i Tok Bilong God o nogat? Mi no gat laik long save long dispela buk.”
Long Jemani, em kantri Beate i sindaun long en, planti yangpela i gat wankain tingting olsem em; olsem na ol i no ting pasin bilong ritim Baibel em i bikpela samting. Wanpela lain i bin askim sampela yangpela na ol i kisim save olsem inap liklik lain tasol, olsem wan pesen, ol i ritim Baibel planti taim, na inap 2 pesen ol i ritim planti taim liklik, na inap 19 pesen i ritim wan wan taim tasol, na klostu 80 pesen i no save ritim Baibel liklik. Ating ol namba long ol narapela kantri bai klostu wankain, na long kantri yu stap long en tu. Tru tumas, Baibel i wanpela buk em planti yangpela i no save tingim.
Olsem na yumi no ken kirap nogut olsem planti yangpela i no save gut long tok bilong Baibel! Long kirap bilong yia 2000, wanpela nius (Lausitzer Rundschau) i kamapim wanpela ripot i soim hamas manmeri i save long Tenpela Lo na ol i larim ol dispela lo i stiaim wokabaut bilong ol. Long ol manmeri i winim 60 krismas, inap 67 pesen i save long Tenpela Lo na ol i larim ol dispela lo i stiaim ol; long ol manmeri i no winim yet 30 krismas, inap 28 pesen tasol i mekim olsem. Tru tumas, planti yangpela i no save long ol tok i stap long Baibel.
Sampela i Gat Narapela Kain Tingting
Tasol long olgeta hap bilong graun, i gat planti milion yangpela em ol i pilim olsem Tok Bilong God i save helpim tru ol. Olsem: Alexander em i gat 19 krismas na i save ritim Baibel long olgeta moningtaim paslain long go long wok. Em i tok: “I no gat wanpela samting i gutpela moa bilong kirapim de bilong mi.” Sandra i save ritim wanpela hap bilong Baibel long olgeta nait. Em i tok: “Em samting mi save mekim long olgeta de.” Na Julia, em i gat 13 krismas, em i gat pasin bilong ritim wanpela sapta bilong Baibel long olgeta nait paslain long em i go slip. Em i tok: “Mi amamas tru long ritim Baibel, na mi laik mekim yet dispela pasin long bihain.”
Wanem tingting i stret na i gutpela tingting? Yu ting yumi inap kisim ol gutpela samting taim yumi ritim Baibel? Yu ting i gutpela na i bikpela samting long ol yangpela i ritim Baibel, na em inap helpim ol? Yu ting olsem wanem?