Stap Gutpela Taim Yu Yangpela Yet

OL I bin tokim sampela manmeri bilong wanpela kantri long Yurop long makim wanpela bilong 3-pela samting ol i laikim moa: gutpela skin, o planti mani kago, o stap yangpela. Planti i bin makim olsem ol i laik i stap yangpela. Tru tumas, ol manmeri bilong kain kain krismas ol i ting taim man i gat 13 i go inap 23 krismas samting, dispela i gutpela taim tru long i stap bilong man. Na olgeta man i laik bai ol yangpela i ken mekim ol samting na bai ol i ken stap gutpela taim ol i kamap bikpela. Ol inap mekim olsem wanem?

Yu ting Baibel inap helpim ol? Yes, Baibel inap helpim tru ol. Orait nau yumi ken skelim tupela samting em Baibel inap helpim tru ol yangpela long en.

Stap Gut Wantaim Ol Narapela

Buk Jugend 2000 i kamapim ripot bilong wanpela lain i bin givim askim long 5,000 yangpela long Jemani bilong kisim save long tingting na pasin bilong ol na ol samting i bikpela samting long ol. Dispela ripot i kamapim olsem taim ol yangpela i mekim sampela samting bilong amamas​—⁠olsem harim musik, spot, raun nating​—⁠klostu olgeta taim ol i stap wantaim ol narapela. Ol yangpela i laik i stap wantaim ol wanlain bilong ol. Olsem na wanpela samting bilong helpim ol long i stap gutpela taim ol i yangpela yet, em pasin bilong stap gut wantaim ol narapela.

Tasol sampela taim i hatwok long stap gut wantaim ol narapela. Tru tumas, pasin bilong stap gut wantaim ol narapela em wanpela samting ol yangpela i tok ol i gat hevi long en. Long dispela samting Baibel inap helpim tru ol. Baibel i gat planti tok bilong stiaim tingting bilong ol yangpela na ol i ken stap gut wantaim ol narapela. Baibel i tok wanem?

Wanpela bikpela lo bilong stiaim tingting bilong ol man na ol i ken stap gut wantaim ol narapela em ol i kolim Gutpela Lo Tru, olsem: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” Taim yu daun long ol narapela, givim biknem long ol, na mekim gutpela pasin long ol, dispela bai kirapim ol long mekim wankain pasin long yu. Pasin bilong mekim gut long ol narapela inap daunim pasin bilong kros na hevi. Taim yu kisim nem olsem man i save mekim gutpela pasin long ol narapela, ating ol narapela bai laikim yu na ol i laik stap pren wantaim yu. Olsem wanem? Yu amamas taim ol narapela i laik stap pren wantaim yu?​—⁠Matyu 7:⁠12.

Baibel i tok: “Yu mas laikim ol wantok olsem yu laikim yu yet.” Yu mas laikim yu yet, olsem yu mas lukautim yu yet na amamas long yu yet​—⁠yu no ken hambak, tasol yu no ken ting yu samting nating. Bilong wanem dispela inap helpim yu? Sapos yu no laikim yu yet, ating bai yu skelim skelim pasin bilong ol narapela, na dispela i no inap helpim yu long stap gut wantaim ol. Tasol sapos long pasin i stret yu laikim yu yet, dispela bai mekim na yu ken stap pren tru wantaim ol narapela.​—⁠Matyu 22:⁠39.

Taim yu kamap pren pinis wantaim narapela, orait nau yutupela wantaim i mas wok strong long strongim dispela pasin pren. Sapos yu lusim hap taim bilong strongim pasin pren wantaim narapela, dispela bai mekim yu i stap amamas, long wanem, “amamas bilong man i givim samting long ol arapela man, dispela i winim amamas bilong man i kisim samting bilong em yet.” Wanpela rot bilong givim samting long narapela, em pasin bilong lusim tingting long rong bilong em, olsem no ken tingim ol liklik pasin kranki bilong em o ting em i mas mekim ol samting i gutpela olgeta. Baibel i tokim yumi: “Yupela i mas isi isi long olgeta man na larim ol i lukim dispela gutpela pasin bilong yupela.” Tru tumas, “oltaim yupela i mas painim rot bilong i stap wanbel wantaim olgeta man.” Orait olsem wanem sapos wanpela pren i kamapim wanpela pasin kranki bilong yu? Yu save mekim wanem? Tingim dispela gutpela tok bilong Baibel: “[Yu] no ken belhat kwik long narapela man,” long wanem, “ol pren tru i save givim pen long yu bilong helpim yu.” Ol pren i save stiaim tingting na toktok na pasin bilong yu, a? Olsem na Baibel i givim tok lukaut olsem: “Sapos yumi poroman wantaim ol man nogut, bai ol i bagarapim gutpela pasin bilong yumi.” Tasol “sapos man i wokabaut wantaim man i gat gutpela tingting, orait em tu bai i kisim gutpela tingting.”​​—⁠Aposel 20:35; Filipai 4:5; Rom 12:​17, 18; Saveman 7:9; Sindaun 13:20; 27:6; 1 Korin 15:⁠33.

Marco i kamapim tingting bilong planti yangpela taim em i tok: “Ol lo bilong Baibel bilong stiaim tingting bilong yumi i save helpim tru yumi long stap gut wantaim ol narapela. Sampela manmeri mi save long ol, ol i save tingim ol yet tasol na ol samting ol inap kisim. Baibel i skulim yumi long tingim ol narapela, na yumi no ken tingim yumi yet tasol. Mi bilip tru olsem dispela em i nambawan gutpela rot bilong pas gut wantaim narapela.”

Ol samting ol yangpela man olsem Marco i lainim long Baibel i save helpim ol taim ol i yangpela na long bihain tu. Na long i stap bilong ol yangpela long bihain, yumi lukim narapela rot em Baibel i save helpim tru ol.

Tingting Planti Long Bihain

Planti yangpela i laik save long ol samting. Ol i laik save wanem ol samting i kamap, na i gat wanem as na ol i kamap. Na Baibel i winim ol narapela buk long kamapim as bilong ol hevi long graun na i tokim yumi long ol samting yumi inap wetim long bihain. Ol yangpela i laik save long ol dispela samting. Olsem wanem yumi save?

Tru, planti man i ting ol yangpela i save tingim ol samting bilong nau tasol, tasol sampela lain i bin kisim tingting bilong planti yangpela na ol ripot bilong ol i kamapim narapela kain samting. Ol i kamapim olsem ol yangpela i save tingim tru ol samting i kamap, na ol i gat tingting bilong ol yet long i stap bilong ol long bihain. Dispela i kamap klia long tingting bilong planti yangpela, olsem: Long olgeta 4-pela 4-pela yangpela, inap 3-pela i save tingting “planti taim” o “planti taim tru” long ol samting bilong bihain. Tru, ol yangpela i save ting olsem ol gutpela samting bai kamap, tasol planti i save tingting planti long ol samting bai kamap bihain.

Bilong wanem ol i save tingting planti? Planti yangpela long nau ol i gat hevi long pasin raskol, kros pait, na drak. Long nau ol man i resis long winim ol narapela, olsem na ol yangpela i tingting planti long kisim wok mani. Ol i pilim olsem ol narapela i strong long ol i mas kisim ol gutpela mak long skul o mekim ol bikpela wok long kamap nambawan. Wanpela yangpela i gat 17 krismas i tok: “Nau ol man i save mekim hatpela pasin na tingim ol yet tasol. Olgeta man i strong long bihainim laik bilong ol yet tasol. Long olgeta taim yu mas kamapim olsem yu inap mekim planti samting, na mi bel hevi stret long dispela.” Narapela yangpela, em i gat 22 krismas, i tok: “Ol man i save mekim gut wok, ol samting bilong ol i save kamap gutpela, na sindaun bilong ol i gutpela. Na ol man i gat sampela hevi long i stap bilong ol, na long kain kain as ol i no inap mekim gut wok olsem ol narapela yangpela, ol samting bilong ol i no save kamap gutpela tumas.” Bilong wanem narapela i resis wantaim narapela? I stap bilong yumi bai i olsem tasol?

As Bilong En

Taim ol yangpela i tingting planti long ol pasin ol i lukim long graun, ol i wanbel long tok bilong Baibel​—⁠maski ol i save long dispela o ol i no save. Baibel i kamapim olsem pasin bilong ol man long “mekim hatpela pasin na tingim ol yet tasol,” em i olsem mak bilong taim bilong yumi. Long wanpela pas aposel Pol i raitim long yangpela man Timoti, Pol i tok: “Long taim bilong las de planti hevi nogut tru bai i kamap.” Bilong wanem planti hevi nogut tru bai i kamap? Long wanem, olsem Pol i tok, ol man bai i ‘laikim ol yet tasol, laikim tumas long kisim mani, litimapim nem bilong ol yet, i no tok tenkyu, givim baksait long ol pasin bilong God, pait na bagarapim ol man nabaut.’ Dispela tok i kolim stret pasin bilong ol man long nau, a?​—⁠2 Timoti 3:​1-3.

Baibel i tok planti hevi nogut tru bai kamap “long taim bilong las de,” paslain long ol bikpela senis bai kamap long olgeta hap bilong graun. Ol dispela senis bai mekim sampela samting long olgeta man, ol yangpela na ol lapun. Wanem ol senis bai kamap? I no longtaim na gavman bilong heven bai kirap bosim ol man bilong graun, na ol man aninit long dispela gavman bai “sindaun gutpela tumas na amamas i stap.” Na “ol stretpela man bai i kisim graun God i givim ol, na bai ol i stap oltaim long en.” Pasin bilong tingting planti na pret bai i stap olsem ol samting bilong bipo tasol.​—⁠Song 37:​11, 29.

Baibel tasol i givim save tru long yumi long ol samting bai kamap bihain. Taim ol yangpela i save long ol samting bai kamap insait long sampela yia bihain, ol inap redi na stap bel isi na bosim gut i stap bilong ol. Dispela kain tingting inap daunim pasin bilong tingting planti tumas na bel hevi. Long dispela rot, Baibel i helpim ol yangpela long ol samting ol i mas save long en, olsem ol i mas save long as na ol samting i kamap na save long ol samting bai kamap bihain.

Stap Gutpela Taim Yu Yangpela Yet

Wanem samting inap helpim ol yangpela long i stap gutpela? Bikpela skul, mani kago, planti pren? Planti i ting olsem. Ol yia namel long 13 na 23 krismas samting i gutpela taim bilong helpim ol long mekim ol samting na bai i stap bilong ol long bihain i ken kamap gutpela. Olsem, sapos i stap bilong ol i kamap gutpela taim ol i yangpela yet, orait dispela inap makim olsem i stap bilong ol bai kamap gutpela long bihain.

Olsem yumi lukim pinis, Baibel inap helpim ol yangpela bambai i stap bilong ol i gutpela taim ol i yangpela yet. Planti yangpela i kisim save pinis long dispela long i stap bilong ol yet. Ol i ritim Baibel long olgeta de na bihainim ol samting ol i lain long en. (Lukim stori “Gutpela Tok Bilong Wanpela Yangpela Wokman Bilong Jehova,” long pes 6.) Tru tumas, Baibel i wanpela buk bilong ol yangpela long nau, long wanem, em inap helpim ol long ‘kisim tru olgeta gutpela pasin, na redi long mekim olgeta kain gutpela wok.’​—⁠2 Timoti 3:​16, 17.

[Rait long pes 5]

Wanpela samting bilong helpim ol yangpela long i stap gutpela, em pasin bilong i stap gut wantaim ol narapela

[Rait long pes 6]

Ol i laik save wanem ol samting i kamap, na i gat wanem as na ol i kamap

[Blok long pes 6, 7]

Gutpela Tok Bilong Wanpela Yangpela Wokman Bilong Jehova

Alexander i gat 19 krismas. Em i kamap bikpela insait long wanpela famili bilong ol Witnes Bilong Jehova, na em i amamas tru long givim bel olgeta long bilip bilong em. Tasol pastaim em i no bin mekim olsem. Alexander i tok:

“Ating bai yu kirap nogut long save olsem, mi bin bung wantaim ol Witnes Bilong Jehova olsem wanpela yangpela i no baptais yet inap 7-pela yia. Long ol dispela yia, mi no givim bel tumas long lotuim Jehova, nogat; mi mekim nating tasol olsem samting mi mas mekim. Ating mi pret long skelim gut laik bilong bel bilong mi.”

Bihain tingting bilong Alexander i senis. Em i tok moa:

“Papamama na ol pren bilong mi long kongrigesen ol i strong long kirapim mi long ritim Baibel long olgeta de, bambai mi ken save gut long Jehova. Orait mi pasim tok long bel long mekim olsem. Olsem na mi no lusim moa bikpela hap taim long lukim televisen olsem bipo, na mi kirap ritim Baibel long olgeta moningtaim. Em nau, mi kirap long kisim save long ol tok bilong Baibel. Mi kisim save long olsem wanem Baibel inap helpim mi. Na bikpela samting moa, mi kisim save olsem Jehova i laik mi mas save long em. Taim mi pilim tru dispela samting, pasin bilong mi long pas gut wantaim Jehova i kamap strong moa, na mi pren gut wantaim ol brata sista long kongrigesen. Man! Ol tok bilong Baibel i senisim tru i stap bilong mi! Mi laik kirapim olgeta yangpela wokman bilong Jehova long ritim Baibel long olgeta de.”

Long olgeta hap bilong graun i gat planti milion yangpela i save bung wantaim ol Witnes Bilong Jehova. Olsem wanem? Yu wanpela bilong ol? Yu laik bai pasin bilong ritim Baibel long olgeta de i helpim yu? I gutpela yu bihainim pasin bilong Alexander, a? Lusim sampela wok i no bikpela samting na makim hap taim bilong ritim Baibel long olgeta de. Dispela bai helpim yu gut tru.