Ol Yangpela i Laik Save  . . .

Mi Ken Mekim Wanem Bilong Amamas Moa Long Ritim Baibel?

“Sampela taim i hatwok long kisim gut ol tok bilong Baibel, na mi bel hevi long dispela.”​—⁠Annalieza, 17 krismas.

“Mi les long ritim Baibel.”​—⁠Kimberly, 22 krismas.

PLANTI man i no laik ritim ol buk. Olsem na planti ol inap ting em i hatwok tumas long ritim bikpela buk olsem Baibel​—⁠ol man bilong ritim ol buk ol tu inap ting olsem. Tammy i gat 17 krismas, em i tok: “Long tingting bilong mi, Baibel em i wanpela bikpela buk i gat planti strongpela tok i hatwok long save gut long mining bilong en. Man i ritim Baibel em i mas putim gut tingting long tok em i ritim na em i no ken les kwik.”

Na tu, homwok, wok bilong haus, na amamas yu painim inap kisim bikpela hap taim na strong bilong yu. Dispela tu inap mekim na yu hatwok long putim gut tingting bilong yu long ritim Baibel na amamas long ritim. Alicia, em i wanpela Witnes Bilong Jehova, em i save lusim tu taim bilong redim ol tok na go long ol miting Kristen, na autim bilip bilong em long ol narapela. Em i tok: “Sampela taim i hatwok long ritim Baibel, bikos i gat planti kain kain samting bilong mekim.”

Tasol Alicia, Tammy, na planti narapela yangpela i bin winim ol samting i pasim ol long ritim Baibel. Nau ol i save ritim Baibel long olgeta de na ol i amamas long mekim olsem. Yu tu inap! Tingim 3-pela samting yu inap mekim bilong amamas moa long ritim Baibel.

Makim Taim Bilong Ritim Baibel

Kelly i gat 18 krismas, em i tok: “Mi ting ol yangpela i save tok ol i les long ritim Baibel, bikos ol i no bin ritim Baibel planti taim tumas.” Ating yu save amamas long pilai wanpela spot em yu save pilai planti taim, na olsem tasol yu bai amamas long ritim Baibel taim yu mekim olsem long olgeta de.

Tasol olsem wanem sapos yu no gat planti fri-taim? Aposel Pol i tok: “Yupela i mas lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save.  . . . Tasol dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.” (Efesus 5:​15, 16) Yu inap kisim sampela hap taim moa sapos yu no lusim bikpela hap taim long mekim ol samting i no bikpela samting tumas, olsem lukim TV. Dispela tok “taim” em Pol i tok long en, em inap makim hap taim man i makim bilong mekim wanpela samting. Yu inap makim wanem taim bilong ritim Baibel?

Planti ol i save ritim Baibel long moningtaim, bihain long ol i skelim teks bilong de na sampela tok bilong en i stap long buklet Skelim Sampela Tok Bilong Baibel Long Olgeta De.a Sampela ol i laik ritim Baibel paslain long ol i slip long nait. Makim wanpela hap taim i gutpela long yu, na senisim taim sapos yu mas mekim olsem. Alicia i tok: “Pasin bilong redi long senisim taim i helpim mi long ritim Baibel long olgeta de.”

Sampela yangpela Kristen i makim 10 i go inap 15 minit bilong ritim Baibel long olgeta de. Long dispela rot ol inap ritim Baibel olgeta insait long wanpela o tupela yia! Maski yu no inap long mekim olsem, putim mak long ritim Baibel long olgeta de. Taim yu strong long bihainim sediul bilong yu long ritim Baibel, bai yu laikim Tok Bilong God moa yet.​—⁠Song 119:97; 1 Pita 2:⁠2.

Beten Long Kisim Gutpela Tingting

Tru, ol man i save ritim Baibel long olgeta de, ol tu i hatwok long kisim gut sampela hap tok bilong Tok Bilong God. Man bilong kamapim Baibel, em God Jehova, em i laik bai yu save gut long Tok bilong em. Buk Aposel i stori long wanpela man Itiopia i no kisim gut mining bilong tok profet i stap long Aisaia sapta 53. Man ya i redi long askim narapela long helpim em, na ensel bilong Jehova i salim wanpela misineri, em Filip, long kamapim mining bilong dispela tok profet long man Itiopia.​—⁠Aposel 8:​26-39.

Olsem na bilong pasin bilong ritim Baibel i ken helpim yu tru, yu mas beten pastaim. Paslain long ol i opim Baibel, sampela ol i save beten askim Jehova long givim gutpela tingting na save long ol, na long ol i ken putim tru long bel ol tok ol i ritim. (2 Timoti 2:7; Jems 1:⁠5) Spirit bilong God inap helpim yu long tingim gen sampela ves em ol inap helpim yu long bekim ol askim o winim ol traim.

Wanpela yangpela man Kristen i tok: “Taim mi gat 12-pela krismas, papa bilong mi i lusim famili. Wanpela nait mi slip long bet na mi beten askim Jehova long mekim papa i kam bek long mipela. Mi kisim Baibel na mi ritim Song 10:14: ‘Yu [Jehova] redi long helpim ol dispela lain i gat hevi. Oltaim yu save helpim ol rabisman, na man i no gat strong i save putim em yet long han bilong yu.’ Mi tingting long dispela. Mi pilim olsem Jehova i toktok long mi na em i laik bai mi save olsem em i man bilong helpim mi, em i Papa bilong mi. I no gat narapela papa i gutpela olsem em, a?”

Olsem wanem? Yu inap kirap bihainim pasin bilong beten taim yu laik ritim Baibel? Adrian i tok: “Beten paslain long yu ritim Baibel​—⁠na bihain long en​—⁠long dispela rot i olsem yu toktok wantaim Jehova.” Beten bai strongim laik bilong yu long bihainim sediul bilong ritim Baibel, na bai yu pas strong moa wantaim God.​—⁠Jems 4:⁠8.

Wokim Piksa Long Tingting

Kimberly, em yumi stori long em long kirap bilong dispela stori, em i les long ritim Baibel. Tru, Baibel em i olpela buk tru​—⁠ol i bin raitim ol tok bilong en paslain tru long ol man i kamapim ol kompiuta, TV, na balus​—⁠na ol man em Baibel i stori long ol, ol i dai inap planti tausen yia i go pinis. Tasol aposel Pol i tok: “Tok bilong God em i gat laip, na em i wok strong i stap.” (Hibru 4:12) Olsem wanem kain olpela buk olsem inap wok strong?

Long taim bilong Esra, em man bilong raitim gen ol tok bilong Baibel, planti tausen man, meri, na ol man em ol “inap long putim yau gut na kisim save long tok,” ol i bung long Jerusalem bilong harim Lo Bilong Moses. Long dispela taim Lo i bin stap inap 1,000 yia pinis! Tasol Esra na ol helpim bilong em ol i “ritim lo long tok Hibru, na ol Livai i tanim long tok Aram, bilong ol manmeri i ken save gut. Na tu ol Livai i autim as bilong lo long ol.” Orait wanem samting i kamap taim ol dispela man i kamapim gut mining bilong ol skripsa na ol i ritim gut ol stori? “Ol manmeri i go long haus bilong ol na ol i amamas na kaikai na dring. Na ol i givim hap kaikai long ol manmeri i sot long kaikai. Nau ol i save gut long as bilong lo bilong God, olsem na ol i mekim ol dispela samting.”​—⁠Nehemia 8:​1-12.

Yu ken mekim wanem na Baibel ritim bilong yu i kamap gutpela? Cathy i save hatwok long ritim ol buk, olsem na em i save rit strong bambai em i ken putim gut tingting long tok em i ritim. Nicki i save wokim piksa long tingting na ting em yet i stap long dispela hap Baibel i stori long en. Em i tok: “Mi save tingim olsem mi bai pilim olsem wanem sapos wankain samting i painim mi. Feivorit stori bilong mi em stori bilong Rut na Naomi. Mi inap ritim dispela stori planti taim. Taim mi go sindaun long narapela taun, dispela stori i bin mekim gut bel bilong mi, long wanem, mi inap pilim tingting bilong Rut taim em i go long hap em i no save long en na em i no save long wanpela man long dispela hap. Mi inap luksave long pasin bilong em long bilip tru long Jehova, na dispela i helpim mi tu long mekim olsem.”​—⁠Rut, sapta 1-4.

Bilong Baibel i ken ‘strongim’ yumi, yumi mas tingim tingim ol tok bilong en long bel. Taim yu ritim Baibel, lusim hap taim bilong tingim tok yu ritim, na tingting long olsem wanem yu bai bihainim dispela tok. Bilong helpim Baibel ritim bilong yu long kamap gutpela moa, yu ken skelim sampela buk bilong stadi long Baibel, em ol Witnes Bilong Jehova i wokim.b

No Ken Les!

I hatwok long bihainim sediul bilong ritim Baibel. Maski yu gat gutpela sediul bilong ritim Baibel, ating sampela taim yu mas senisim dispela sediul. Olsem wanem yu inap ritim Baibel long olgeta de na yu no les long mekim olsem?

Ol pren na famili bilong yu inap helpim yu. Amber i gat 15 krismas, em i tok: “Mi na susa bilong mi i stap long wanpela rum. Sampela nait skin bilong mi i save les tru na mi laik slip, tasol susa bilong mi i save tokim mi long ritim Baibel. Olsem na mi no save lusim tingting long mekim olsem!” Sapos wanpela ves o hap bilong Baibel i kirapim tru tingting bilong yu, orait toktok long dispela wantaim ol narapela. Dispela bai mekim na yu laikim moa yet Tok Bilong God na em inap kirapim laik bilong ol narapela tu long ritim Baibel. (Rom 1:​11, 12) Sapos wanpela o sampela de i lus na yu no ritim Baibel, yu no ken givap! Kirap gen long ritim long hap yu bin lusim, na tingting strong moa long bihainim sediul bilong yu.

Yu no ken lusim tingting long ol gutpela samting yu bai kisim taim yu ritim Baibel long olgeta de. Taim yu harim tok bilong Jehova long rot bilong Tok bilong em, yu inap pas gut wantaim em. Bai yu save long ol tingting bilong em. (Sindaun 2:​1-5) Ol dispela tok i tru i kam long Papa bilong yumi long heven bai lukautim yu gut. Man bilong raitim Song i tok: “Olsem wanem na yangpela man i ken wokabaut long klinpela pasin? Em i mas bihainim tok bilong yu na bai em i stap klin.” (Song 119:⁠9) Olsem na kirap ritim Baibel, na mekim olsem oltaim. Bai yu amamas tru long ritim, ating bipo yu no bin ting bai yu amamas olsem long ritim Baibel!

[Ol Futnot]

[Ol Piksa long pes 26]

Beten na stadi bai mekim na Baibel ritim bilong yu i kamap gutpela moa na i helpim yu long save gut long mining bilong ol tok bilong en

[Piksa long pes 27]

Bai yu pilim gut ol tok bilong Baibel taim yu ting yu yet i stap insait long stori yu ritim