Ripot Long Wok Bilong Kingdom
Ol Famili i Stap Amamas, Dispela i Helpim Ol Narapela Long Kam Long God
JEHOVA i bin mekim gut long Josep na em i gat gutpela save na tingting. (Aposel 7:10) Dispela samting i mekim na “king bilong Isip wantaim ol ofisa bilong en i harim dispela tok bilong Josep, na ol i orait long en.”—Stat 41:37.
Olsem tasol, long nau Jehova i givim save na tingting long ol manmeri bilong em long rot bilong stadi ol i mekim long Baibel. (2 Timoti 3:16, 17) Taim man i bihainim tok bilong Baibel bilong stretim em, dispela gutpela save na tingting i save kamapim gutpela kaikai. Taim ol man i lukim gutpela pasin bilong em na harim ol tok bilong em, dispela i mekim na ol i orait long em, olsem dispela stori i kam long Simbabwe na i stap daunbilo i kamapim.
• Long hap wanpela meri i sindaun long en, ol man i sindaun klostu long em ol i Witnes Bilong Jehova. Maski em i no laikim ol Witnes, em i save laikim pasin ol i mekim, na sindaun bilong famili bilong ol. Em i lukim man na meri i pas gut wantaim, na ol pikinini bilong ol i save bihainim tok. Wanpela samting em i lukim em olsem man i save laikim tru meri bilong em.
Wanpela bikpela bilip long hap bilong Afrika i olsem, sapos wanpela man i laikim meri bilong em, dispela i makim olsem ating meri i bin wokim marila bilong mekim na “man bai i laikim em.” Olsem na dispela meri i go lukim meri Witnes na i askim em: “Inap yu givim mi dispela marila yu bin givim long man bilong yu na bai man bilong mi i ken laikim mi olsem man bilong yu i save laikim yu?” Witnes i tok: “Orait, bai mi kisim i kam tumora long apinun.”
Long de bihain, sista i kisim dispela “marila” bilong em na i go lukim dispela meri. Wanem dispela samting? Em Baibel, na buk Save i Bringim Man Long Laip Oltaim. Taim em i skelim pinis dispela tok “Wok Long Kamapim Famili i Givim Biknem Long God” long buk Save, em i tokim meri olsem: “Em dispela ‘marila’ mi na man bilong mi i mekim wok long en bilong ‘laikim’ narapela, na dispela i mekim na mi laikim em tumas na em i laikim mi tumas.” Sista i kirapim Baibel-stadi wantaim meri, na meri i kamap strong hariap na em i kisim baptais long wara bilong makim dediket bilong em long Jehova.
• Sosaiti i salim tupela painia salim i go wok long wanpela liklik kongrigesen long hap not-is long boda bilong Simbabwe na Mosambik, tasol tupela i no go autim tok long ol haus inap tupela wik. Bilong wanem? Long wanem, ol manmeri i wok long kam long haus bilong tupela long harim tok tupela i mekim. Wanpela painia i stori long olsem wanem dispela samting i bin kamap: “Mipela i wokabaut 15 kilomita bilong stadi long Baibel wantaim wanpela i gat laik long harim tok. I hatwok long i go long dispela ples. Mipela i mas wokabaut long graun malumalum, na mipela i brukim ol wara i tait na wara i kam antap inap long nek bilong mipela. Mipela i mas putim ol klos na su long het bilong mipela na brukim wara, na mipela i bilas gen long hapsait bilong wara.
“Ol man i sindaun klostu long dispela man i laik harim tok, ol i amamas tru long mipela i wok strong long kam. Wanpela bilong ol dispela man i bin lukim mipela i kam em hetman bilong wanpela lotu long dispela hap. Em i tokim ol lain bilong em: ‘Olsem wanem? Yupela i laik wok strong olsem dispela tupela yangpela man, em ol Witnes Bilong Jehova?’ Long de bihain, planti lain bilong em i kam long haus bilong mipela long kisim save long as na mipela i save kam planti taim. Na tu, insait long tupela wik moa mipela i no bin kukim kaikai bilong mipela, long wanem, planti man tru i bin kam lukim mipela long haus!”
Wanpela bilong ol man i bin kam long haus painia long dispela tupela wik em dispela hetman bilong lotu. Dispela man i orait long stadi long Baibel na tupela painia i amamas tru!