Autim Gutnius Long Ol Gaden Rais Bilong Taiwan

Yumi Ol Manmeri Bilong Bilip

Autim Gutnius Long Ol Gaden Rais Bilong Taiwan

TAIWAN i save kisim planti ren, olsem na ol inap kamautim rais tupela taim long olgeta wan wan yia. Tasol sampela taim ren i no kam long taim stret na ol liklik kru rais i save dai. Olsem wanem? Taim dispela samting i kamap, fama i save les na lusim wok? Nogat. Em i save em i mas wok yet. Em bai kamapim ol nupela kru rais na planim ol long gaden. Na sapos ol samting i kamap gut, dispela fama bai kamautim planti rais long gaden bilong em. Sampela taim pasin bilong planim na kamautim ol kaikai bilong spirit i wankain.

Wok Strong Long Bungim Ol Kaikai Bilong Spirit i Mau Pinis

Inap planti yia ol Witnes Bilong Jehova long Taiwan ol i wok strong long planim na kamautim ol pikinini kaikai bilong tok i tru bilong Baibel long sampela hap, tasol i luk olsem dispela wok i no karim gutpela kaikai. Distrik Mial-li em i wanpela hap olsem. Long wan wan taim ol Witnes i bin autim tok long dispela hap, tasol ol man i no putim yau long tok bilong ol. Olsem na long 1973 ol i makim tupela marit, ol i mekim wok painia salim, long autim tok bilong Kingdom long olgeta de long dispela hap. Pastaim sampela i laik harim gutnius. Tasol kwiktaim laik bilong ol i dai. Olsem na ol i salim tupela painia salim i go long narapela hap.

Long 1991 ol i salim tupela narapela painia salim i go long dispela hap. Tasol ol samting i kamap i soim olsem wok bilong spirit long dispela hap i no redi long i go bikpela. Sampela yia bihain, ol i salim dispela tupela painia salim i go long wanpela narapela hap ol i ting em bai karim sampela kaikai. Olsem na dispela hap i stap nating inap sampela taim.

Wok Ol i Mekim Gen i Karim Kaikai

Taiwan i gat planti longwe teritori, na long Septemba 1998 ol i pasim tok long wok strong long painimaut wanem ol hap i gat planti manmeri i laik harim tok i tru. Ol i mekim olsem wanem? Ol i makim 40 painia salim long autim tok inap sampela mun long ol longwe teritori i gat planti man long en.

Ol i makim tupela taun, wanpela i stap klostu long narapela, insait long Distrik Mial-li bilong autim tok long ol. Ol i makim 4-pela sista singel long mekim wok autim tok inap 3-pela mun bilong skelim dispela teritori i gutpela o nogat. Ol i stap sotpela taim tasol na ol i kirap raitim ol gutpela ripot i stori olsem ol i painim planti manmeri i gat laik long harim tok. Taim 3-pela mun i pinis ol i lukautim planti Baibel-stadi long haus bilong ol man. Wanpela elda bilong wanpela kongrigesen i stap klostu i helpim ol na ol i kirapim wanpela grup i save mekim Buk-Stadi.

Tripela bilong dispela fopela sista i tokaut olsem ol i laik i stap yet bilong lukautim ol dispela “nupela kru” i wok long kamap gut. Olsem na Sosaiti i makim tupela bilong mekim yet wok painia salim na narapela sista i wok i stap olsem painia oltaim. Wanpela elda bilong wanpela kongrigesen i stap klostu i kam sindaun long dispela hap bilong helpim ol. Winim 60 manmeri i bin kam long namba wan pablik-tok ol i bin mekim long dispela hap. Long nau wanpela kongrigesen i stap klostu i wok long helpim dispela nupela grup long mekim miting long olgeta Sande na mekim sampela Buk-Stadi tu. Ating klostu nau bai nupela kongrigesen i kamap long dispela hap.

Ol Blesing Long Ol Narapela Hap Bilong Taiwan

Wankain samting i kamap long sampela narapela hap tu. Long Distrik I-lan long hap not-is bilong ailan, wanpela nupela Buk-Stadi Bilong Kongrigesen i kamap, em long dispela hap ol painia salim i bin mekim wok long en inap sampela mun.

Wanpela painia salim i bin bungim wanpela yangpela man taim em i wok autim tok klostu long taim bilong tudak na em i soim em wanpela pepa bilong singautim ol man i kam long ol miting. Wantu dispela man i askim olsem: “Mi inap kam long miting long tumora nait? Na sapos i orait long mi kam, bai mi pasim wanem kain klos?” Long olgeta wik dispela painia i lukautim 8-pela Baibel-stadi wantaim ol man i gat laik long kisim save long Baibel. Kwiktaim sampela bilong ol dispela Baibel-stadi ol i gat tingting long kamap pablisa bilong autim gutnius na ol i putim mak olsem ol i laik kisim baptais.

Inap planti yia wanpela meri long dispela taun i go oltaim long lotu, tasol em i no inap painim wanpela man bilong lainim em long tok bilong Baibel. Taim em i kisim save long pasin bilong ol Witnes long mekim Baibel-stadi, wantu em i kirap long stadi. Painia i strongim em long redim stadi paslain. Taim dispela painia salim i kam bilong mekim stadi wantaim em, em i luksave olsem meri i bin mekim “homwok” bilong em. Em i bin baim wanpela notbuk na i raitim ol askim bilong stadi long en. Na em i bin raitim ol bekim bilong olgeta wan wan askim long en. Na tu, em i bin raitim olgeta skripsa bilong stadi long notbuk. Taim sista i kamap bilong mekim namba wan stadi, dispela meri i bin redim pinis stadi namba wan, tu, na tri!

Klostu wankain samting i bin kamap long Dongshi, wanpela taun i stap namel long Taiwan. Ol painia salim ol i bin tilim 2,000 samting liklik buk long dispela hap insait long 3-pela mun. Long namba 3 mun ol i mekim 16 Baibel-stadi. Wanpela guria i kamap long Septemba 21, 1999, na taun i kisim bikpela bagarap, tasol sampela manmeri ol i gat laik yet long harim tok i tru na ol i wok long kamap strong long ol samting bilong spirit, maski ol i mas lusim wanpela aua bilong raun long ka samting bilong kam long ol miting long Haus Kingdom. Tru tumas, bilong bungim ol kaikai i mau pinis yumi mas wok strong i go i go, maski em i kaikai bilong skin o kaikai bilong spirit.

[Mep long pes 8]

(Bilong save ol dispela rait i stap we long pes, lukim buk o magasin)

SAINA

Solwara Taiwan Streit

TAIWAN

[Kredit Lain]