Ol Gutpela Wok i Litimapim Nem Bilong God
OL KRISTEN tru i litimapim nem bilong God long rot bilong ol gutpela pasin na wok ol i mekim. (1 Pita 2:12) Dispela samting i kamap ples klia taim wanpela hevi i kamap long Itali long sampela yia i go pinis.
Long Septemba 1997, wanpela strongpela guria i kamap long sampela hap bilong Marche na Umbria na bagarapim klostu 90,000 haus. Kwiktaim sampela Witnes Bilong Jehova i go long helpim ol wanlotu bilong ol na ol narapela man. Ol i givim ol trela, matres, stov, jenareta, na ol narapela samting long ol. Ol man i lukim wok ol i mekim bilong helpim ol brata na ol narapela.
Niuspepa Il Centro i tok: “Namba wan lain i kam wantaim ol samting bilong helpim ol man long dispela hap em ol Witnes Bilong Jehova bilong Roseto [long provins Teramo] . . . Sampela taim ol i bung bilong beten, na ol man i stap gut long Jehova ol i save mekim ol samting bilong helpim ol man i karim hevi, na ol i no tingting long ol dispela man i bilong wanem lotu.”
Bikman bilong taun Nocera Umbra, em wanpela bilong ol taun i bin kisim bikpela bagarap, i raitim pas long ol Witnes na em i tok: “Mi tok tenkyu tru long yupela i helpim ol manmeri bilong Nocera. Na mi save olsem olgeta manmeri bilong dispela hap i laik tok tenkyu tru long yupela.” Na tu, wanpela dipatmen (Ministry of the Interior) bilong gavman i praisim Congregazione Cristiana dei Testimoni di Geova (Kongrigesen Kristen Bilong Ol Witnes Bilong Jehova) na givim wanpela setifiket na medal “bilong tokaut long wok ol i bin givim bel long mekim long taim hevi i kamap long hap bilong Umbria na Marche.”
Long Oktoba 2000, wanpela bikpela tait wara i kamap long hap bilong Piedmont long noten Itali. Ol Witnes i kirap gen long mekim ol samting bilong helpim ol man. Ol man i lukim gen ol gutpela wok bilong ol. Provins Piedmont i praisim ol na givim wanpela hap plang i gat rait long en. Ol i praisim ol long “gutpela wok volantia ol i mekim bilong helpim ol man bilong Piedmont i kisim hevi long tait wara.”
Jisas Krais i tokim ol disaipel bilong em: “Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” (Matyu 5:16) Ol Witnes Bilong Jehova i amamas long litimapim nem bilong God, na nem bilong ol yet nogat, taim ol i mekim “ol gutpela pasin” bilong helpim ol man long ol samting bilong spirit na long ol narapela rot tu.