Luksave Long Stiatok—Em Pasin Bilong Man i Bikpela Pinis
SAPOS yu poroman wantaim ol man nogut, bai ol i bagarapim gutpela pasin bilong yu. Samting yu planim, dispela samting tasol bai yu kamautim. (1 Korin 15:33; Galesia 6:7) Long ol samting bilong skin na bilong spirit tu, dispela tupela tok i kamapim wanpela bikpela tok i tru—wanpela stiatok (principle), olsem tok bilong stiaim tingting—na tupela tok hia i olsem as bilong ol lo. Tasol sampela lo i save stap sotpela taim tasol na bihain ol i pinis, na ol i kolim stret ol samting man i mas mekim o i no ken mekim. Tasol ol stiatok yumi inap bihainim long planti samting, na ol dispela tok inap i stap oltaim. Olsem na Baibel i kirapim yumi long tingim ol stiatok taim yumi inap long mekim olsem.
Olsem: Yumi save givim lo long pikinini olsem: “Yu no ken holim stov.” Tasol long man i bikpela pinis bai yumi tok tasol, “Stov i hat.” Dispela tok i karamapim planti samting. Em i bosim ol samting man inap mekim, olsem kukim kaikai, kukim samting insait long aven, o mekim dai stov, olsem na dispela tok i kamap olsem wanpela stiatok.
Ol Stiatok na Bel Bilong Yumi
Ating yumi no amamas long bihainim wanpela lo, tasol yumi bihainim, long wanem, yumi pret long kisim strafe. Tasol taim yumi bihainim wanpela stiatok, yumi no gat dispela kain tingting, long wanem, ol stiatok i save kirapim bel bilong yumi long bihainim ol dispela tok. Yumi ken tingim Josep. Olsem Abel na Noa, Josep tu i bin stap long taim Lo Bilong Moses i no kamap yet. Taim meri bilong Potifar i laik pulim Josep, em i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” Em nau, Josep i save long dispela stiatok, olsem man na meri marit ol i “wanpela bodi tasol.”—Stat 2:24; 39:9.
Long nau ol man i no bihainim ol stretpela stiatok. Ol i laikim tumas pasin pait na pamuk samting, olsem man bilong kaikai planti i laikim tumas kaikai. Ol Kristen i mas lukaut, nogut ol i hait na kisim liklik ol dispela rabis kaikai long rot bilong TV, ol video, o ol buk. Olsem na i gutpela tru taim yumi bihainim ol stiatok na sakim pasin nogut olsem Josep i bin mekim, na tingim, long taim bilong “bikpela hevi tru,” God bai lukautim tasol ol man i stap gut long em. (Matyu 24:21) Pasin yumi mekim taim yumi tasol i stap—i no long taim yumi stap long ai bilong ol man—i kamapim bel tru bilong yumi, olsem yumi wanem kain man.—Song 11:4; Sindaun 15:3.
Sapos yumi larim ol stiatok bilong Baibel i stiaim yumi, bai yumi no wok long painim rot bilong abrusim ol lo bilong God o mekim wanpela pasin i go inap long mak bilong brukim wanpela lo, tasol yumi no abrusim dispela mak. Kain tingting olsem i nogutim yumi yet; bihain bai yumi kisim nogut long en.
Tingim Ol Tok i As Bilong Lo
Tru, ol lo i bikpela samting tru long laip bilong ol Kristen. Ol i olsem ol was bilong lukautim yumi, na planti bikpela stiatok i as bilong ol dispela lo. Sapos yumi no tingim ol dispela stiatok, ating bai yumi no laikim moa ol lo ol i kisim long ol dispela stiatok.
Tasol ol yangpela tu, sapos ol i gat gutpela bel ol inap pilim ol stiatok bilong Baibel, na long dispela rot ol i givim biknem long Jehova. Rebecca i gat 13 krismas. Tisa bilong em i askim klas olsem husat bai pilai laki. Klostu olgeta i tok ol i no ken mekim. Tasol taim tisa i kolim ol samting inap kamap na ol bai mekim wanem long dispela taim, olgeta i tokaut olsem ol bai mekim samting i olsem pilai laki—Rebecca tasol i no laik mekim. Tisa i askim Rebecca, em inap baim wanpela laki-tiket long 20 toea samting bilong helpim wanpela gutpela wok. Rebecca i tok nogat, na em i kamapim ol tok bilong Baibel bilong soim tisa olsem dispela em i wanpela pasin bilong pilai laki. Tisa i tokim klas: ‘Long tingting bilong mi, long dispela klas Rebecca tasol i save bihainim tru samting mi save kolim olsem “ol stiatok.” ’ Tru, Rebecca inap tok tasol, “lotu bilong mi i tambuim dispela pasin.” Tasol em i tingim gut dispela samting; em inap tokaut long as na pilai laki i gat rong, na bilong wanem em i no laik insait long en.
Pasin bilong Abel, Noa, Josep, na Jisas i soim yumi olsem wanem “pasin bilong tingting gut” na bihainim “stretpela tingting” long lotuim God i save helpim yumi. (Sindaun 2:11; Rom 12:1, NW ) Ol elda Kristen i mas bihainim pasin bilong Jisas taim ol i ‘lukautim gut ol manmeri bilong God, ol i stap olsem sipsip long han bilong ol.’ (1 Pita 5:2) Olsem pasin bilong Jisas i makim, ol man i laikim tumas ol stiatok bilong God, ol i save stap gut aninit long wok king bilong Jehova.—Aisaia 65:14.
This is a partial repeat of article in w97 10/15 “Man i Gat Gutpela Tingting i Save Pilim Gut As Bilong Lo” taken from w-E 97 10/15 “Discerning the Principle Reflects Maturity.”