Gutpela Lida—Hatwok Long Painim

Em i wanpela man bilong raitim ol buk na ol stori. Bel bilong em i gat bikpela laik long ol gutpela samting bai kamap bihain. Inap 90 yia i go pinis, em i ting olsem wanpela taim bai kamap we “ol man bai i no pret na ol i ting ol gutpela samting bai kamap; ol man i ken kisim fri save; ol lain manmeri bilong dispela graun i no bruk bruk; ol man bai mekim tok tru tasol; [na] ol man bai wok strong tru na long dispela rot ol inap mekim ol gutpela gutpela samting.”

BIHAIN dispela man bilong raitim ol buk i tok, em i laik bai ol manmeri long kantri bilong em, na ol manmeri long olgeta narapela hap tu, ol i ken stap long wanpela gutpela ples olsem. Sapos dispela man bilong winim Prais Nobel em i stap yet long nau, em bai bel hevi stret. Maski ol man i wokim planti nupela samting, ol manmeri bilong dispela graun i bruk bruk moa yet. Na ol man i no inap wetim ol gutpela samting i kamap bihain.

Taim ol i askim wanpela fama, bilong wanem kros pait i kamap wantu namel long sampela lain long kantri bilong em, em i kamapim wanpela samting em i ting i as bilong dispela. Em i tok: “As bilong en em ol lida nogut.” Long buk bilong em, Humanity​​—⁠A Moral History of the Twentieth Century, saveman Jonathan Glover i kamapim wankain tingting, em i tok: “Pasin bilong bagarapim na pinisim wanpela lain olgeta [long dispela kantri] i no kamap nating tasol namel long sampela lain, nogat, ol man i laik holimpas strong bilong bosim ol man ol i kirapim ol lain long mekim kain pasin olsem.”

Long 1991 samting, taim pait i kamap namel long tupela ripablik em bipo ol i insait long Yugoslavia, wanpela niusman i tok: “Mipela i bin sindaun gut wantaim inap planti yia na nau mipela i kirap kilim i dai ol bebi bilong ol, na ol tu i mekim olsem long ol bebi bilong mipela. Bilong wanem mipela i mekim dispela kain pasin?”

Planti tausen kilomita longwe long Yurop em kantri India, em ples dispela man bilong raitim ol buk samting i kamap long en, em yumi toktok long em long kirap bilong dispela stori. Long wanpela tok bilong em, nem bilong en “Yu Ting India Inap i Stap Yet Olsem Wanpela Kantri?,” man bilong raitim ol buk, Pranay Gupte, i tok: ‘Inap 70 pesen bilong bikpela lain manmeri long India ol i no winim yet 30 krismas, tasol i no gat ol lida i stap olsem gutpela piksa ol i ken bihainim.’

Long sampela kantri, ol lida i mas lusim wok bilong ol, long wanem, ol i bin paulim planti mani samting. Olsem na i gat kain kain as na i hatwok long painim ol gutpela lida. Ol samting i wok long kamap i soim olsem tok bilong wanpela profet i bin stap inap olsem 2,600 yia i go pinis, em i tru. Profet i tok: “Mipela man i no inap bosim wokabaut bilong mipela yet na bihainim ol rot mipela i laikim.”​—⁠Jeremaia 10:⁠23.

Olsem wanem? I gat rot bilong stretim ol bikpela hevi bilong dispela graun? Husat inap kamapim pasin long dispela graun we ol man i no pait moa na ol i no pret moa, na ol man i ken kisim fri trupela save na save i kamap planti, na ol man i wok long kamap gutpela olgeta?

[Piksa Kredit Lain long pes 3]

Fatmir Boshnjaku