Jehova Tasol ‘i Save Kisim Bek Mipela’
TAIM bikpela hevi tru i kamap insait long kantri na pasin birua i stap namel long ol narapela narapela kantri, ol man i save lukluk i go long gavman bilong ol bilong helpim na lukautim ol. Ol gavman yet i save wok strong long kirapim ol man long sapotim kantri. Taim pasin bilong givim bel tru long kantri i kamap strong, dispela i save mekim na i gat planti bung bilong litimapim kantri i kamap.
Taim bikpela hevi tru i kamap long kantri, pasin bilong givim bel long kantri i save helpim ol man long pilim olsem ol i stap wanbel na i stap strong, na em i kirapim ol long wok gut wantaim na mekim wok bilong helpim ol man bilong ples. Tasol wanpela stori long nius The New York Times Magazine i tok, ‘pasin bilong givim bel tru long kantri, dispela i gat bikpela strong na inap kamapim samting nogut.’ Samting ol man i mekim bilong kamapim olsem ol i givim bel tru long kantri, dispela inap mekim na nau sampela man long kantri ol i no stap fri moa long mekim ol samting i stret long ol i ken mekim na long bihainim lotu bilong ol. Ol man i strong long ol trupela Kristen i mas insait long sampela wok i no stret wantaim bilip bilong ol. Long kain taim olsem, ol trupela Kristen i mas mekim wanem? Wanem ol stiatok bilong Baibel inap helpim ol long bihainim gutpela tingting na stap gut long God?
‘No Ken Brukim Skru Long Ol’
Sampela taim, pasin bilong salut long plak i kamap olsem wanpela rot em planti man i bihainim bilong kamapim tingting bilong ol olsem ol i givim bel tru long kantri. Tasol planti plak ol i gat piksa bilong sampela samting i stap long skai—olsem ol sta—na piksa bilong ol samting i stap long graun tu. God i kamapim tingting bilong em long pasin bilong brukim skru long kain samting olsem taim em i tokim lain bilong em: “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi. Nogat tru.”—Kisim Bek 20:4, 5.
Olsem wanem? Pasin bilong salut o brukim skru long plak, em mak bilong Gavman, dispela i brukim lo bilong God i tok yumi mas lotu long God Jehova wanpela tasol? Ol Israel long bipo i gat ol “plak” na ol tripela tripela lain ol i save bung klostu long ol wan wan plak taim ol i stap long ples drai nating. (Namba 2:1, 2) Buk Cyclopedia bilong McClintock na Strong i stori long hap tok Hibru olsem plak na i tok: ‘Dispela tok Hibru, olsem plak, i no wankain long ol plak em yumi long nau i save long en, nogat.’ Na narapela samting tu, ol Israel i no save tingim plak na ol bung bilong plak i olsem samting holi, nogat. Ol dispela plak i bin mekim wok olsem mak tasol, bilong makim hap graun ol man i mas bung long en.
Nambawan wok bilong ol piksa bilong ol ensel i stap long haus lotu sel na tempel bilong Solomon, i olsem: Ol i bilong makim ol ensel long heven. (Kisim Bek 25:18; 26:1, 31, 33; 1 King 6:23, 28, 29; Hibru 9:23, 24) Yumi ken save ol dispela piksa i no bilong lotuim, long wanem, ol manmeri i no inap lukim ol, na i gat tambu long lotuim ol ensel.—Kolosi 2:18; KTH 19:10; 22:8, 9.
Tingim tu piksa bilong snek bras em profet Moses i wokim taim ol Israel i stap long ples drai nating. Dispela piksa i stap olsem mak, na tu, em i makim samting bai kamap bihain. (Namba 21:4-9; Jon 3:14, 15) Ol i no save adorim o lotuim dispela piksa. Tasol planti handet yia bihain long taim bilong Moses, ol Israel i kirap mekim pasin i no stret na lotuim dispela piksa, na tu, ol i kukim paura i gat gutpela smel na givim long en. Olsem na King Hesekia bilong Juda i kisim dispela snek bras na i brukim liklik liklik.—2 King 18:1-4.
Olsem wanem? Plak bilong kantri i olsem mak nating tasol bilong mekim wanpela wok? Plak i makim wanem samting? Man bilong raitim buk, J. Paul Williams, em i tok: “Plak em i namba wan samting bilong kantri long makim bilip, na em i namba wan samting bilong kantri ol man i lotu long en.” Buk The Encyclopedia Americana i tok: “Plak i holi, olsem kruse i holi.” Plak em i mak bilong Gavman. Olsem na pasin bilong brukim skru o salut long plak em i wanpela pasin bilong lotu long adorim Gavman. Dispela kain pasin i makim olsem Gavman em i rot bilong kisim bek ol man, na dispela i no stret wantaim ol tok Baibel i mekim long pasin bilong lotuim imis.
Baibel i tokaut klia: “Bikpela, yu wanpela tasol yu save kisim bek mipela.” (Song 3:8) Yumi no ken tok ol lain bilong graun o ol mak bilong ol inap kisim bek yumi, nogat. Aposel Pol i tokim ol wanlain Kristen: “Ol pren tru bilong mi, yupela i mas i stap longwe long pasin bilong lotu long ol giaman god.” (1 Korin 10:14) Ol Kristen bilong pastaim ol i no save insait long pasin bilong lotuim Gavman. Long buk Those About to Die, Daniel P. Mannix i tok: “Ol Kristen i no save . . . mekim ofa long was spirit bilong empera [bilong Rom]—wankain olsem sampela bilong nau i no laik salut long plak.” Na i wankain tu long ol trupela Kristen long nau. Bilong ol i ken lotu long Jehova wanpela tasol, ol i no save salut long plak, maski em i plak bilong wanem wanem kantri. Long dispela rot, ol i putim God i go pas, tasol ol i rispek long ol gavman na ol bikman bilong ol. Yes, ol i save ol i gat wok long stap aninit long “ol gavman.” (Rom 13:1-7) Orait, Baibel i tok wanem long pasin bilong mekim singsing bilong kantri?
Singsing Bilong Kantri
Buk The Encyclopedia Americana i tok: “Singsing bilong kantri i save kamapim tingting bilong ol man olsem ol i givim bel tru long kantri, na planti singsing i save askim God long lukautim na soim rot long ol manmeri o ol lida bilong ol.” Singsing bilong kantri i olsem wanpela singsing lotu o wanpela beten bilong helpim kantri, bai kantri i gat gutpela sindaun long ol samting bilong skin na i stap strong inap longtaim. Yu ting ol trupela Kristen i ken insait long dispela kain singsing i olsem beten?
Profet Jeremaia i sindaun namel long ol man i tok ol i lotuim God. Tasol Jehova i tokim em: “Yu no ken beten long mi bilong helpim ol dispela manmeri. Yu no ken krai na singaut strong long mi. Long wanem, mi no ken harim dispela beten bilong yu.” (Jeremaia 7:16; 11:14; 14:11) Bilong wanem God i givim dispela tok long Jeremaia? Long wanem, ol dispela lain i save stil na kilim man i dai na pamuk wantaim ol man na meri i marit, na ol i giaman long taim ol i mekim ol strongpela promis, na ol i lotuim ol god giaman.—Jeremaia 7:9.
Jisas Krais i kamapim wanpela tok ol narapela i ken bihainim taim em i tok: “Mi no beten bilong helpim olgeta manmeri bilong graun. Mi beten bilong helpim ol dispela man yu bin givim mi.” (Jon 17:9) Baibel i tok “dispela graun olgeta em i stap aninit long strong bilong Satan” na em “bai i pinis.” (1 Jon 2:17; 5:19) Olsem na yu ting i stret long ol trupela Kristen i ken beten long ol lain bilong dispela graun bambai ol dispela lain i ken kisim gutpela sindaun long ol samting bilong skin na stap strong inap longtaim?
Tru, i no olgeta singsing bilong kantri i singaut askim God long sampela samting, nogat. Buk Encyclopædia Britannica i tok: ‘Ol tok insait long ol singsing bilong kantri ol i narapela narapela kain. Sampela singsing i olsem beten bilong askim God long helpim king o kwin, na sampela i toktok long ol bikpela pait bilong kantri, na sampela i kamapim ol tok bilong kirapim ol man long givim bel tru long kantri.’ Tasol ol man i laik mekim ol samting God i laikim, yu ting i stret long ol i ken amamas long ol pait bilong kantri? Aisaia i tok profet long ol man i lotu tru long God, olsem: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip.” (Aisaia 2:4) Aposel Pol i tok: “Mipela i save stap long dispela graun, tasol mipela i no save pait olsem ol man bilong graun. Olgeta samting bilong pait mipela i holim, ol i no samting bilong dispela graun. Nogat.”—2 Korin 10:3, 4.
Planti singsing bilong kantri i save kamapim ol tok bilong kirapim ol man long ting kantri i nambawan na i winim ol narapela kantri. Baibel i no as bilong dispela tingting. Taim aposel Pol i mekim tok long maunten Areopagus, em i tok: “Long wanpela tumbuna tasol [God Jehova] i bin mekim olgeta lain manmeri i kamap. Na em i putim ol i stap long olgeta hap bilong graun.” (Aposel 17:26) Aposel Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Planti man i tingim ol tok bilong Baibel na ol i pasim tok long bel long ol i no ken salut long plak o mekim singsing bilong litimapim kantri. Tasol wanem kain pasin ol i save mekim taim kain samting olsem i kamap?
Ol i No Mekim
Bilong strongim pasin wanbel long gavman bilong em, King Nebukatnesar bilong Babilon long bipo em i sanapim wanpela traipela imis gol long ples stret bilong Dura. Orait nau em i mekim wanpela bung bilong dediketim dispela imis na em i bungim olgeta ofisa na bikman bilong gavman, na ol jas na majistret na ol man bilong bosim ol provins. Taim ol i harim krai bilong musik, olgeta i mas brukim skru na lotu long dispela imis. Namel long ol man i mas i kam bung, em 3-pela yangpela Hibru—Satrak, Mesak, na Abetnego. Ol i mekim wanem bilong soim olsem ol i no insait long dispela bung bilong lotu? Taim musik i kirap na ol man i brukim skru long dispela imis, dispela 3-pela Hibru i sanap i stap.—Daniel 3:1-12.
Long nau, taim ol man i salut long plak, ol i save apim han o holim han long poret o long bros. Sampela taim, ol i mekim sampela narapela kain pasin. Long sampela kantri, ol pikinini long skul i mas brukim skru na kis long plak. Taim ol man i salut long plak na Kristen i sanap isi tasol, ol i lukim olsem Kristen i rispek long samting ol i mekim.
Orait olsem wanem sapos pasin bilong sanap tasol long bung bilong salut long plak i kamapim olsem Kristen i insait long dispela bung? Olsem: Sapos ol i makim wanpela sumatin long skul long stap olsem mausman bilong olgeta sumatin na em i go na salut long plak i sanap long ausait, tasol ol narapela sumatin i stap insait long klasrum na ol i mas sanap, orait olsem wanem long dispela? Long kain taim olsem, pasin bilong sanap bai makim olsem Kristen i wanbel long dispela sumatin i ken stap olsem mausman bilong em taim sumatin i salut long plak. Orait nau dispela pasin yet bilong sanap tasol em bai makim olsem Kristen i insait long dispela bung. Sapos i olsem, orait ol husat i no laik insait long dispela bung, ol i mas sindaun i stap na stap isi tasol. Tasol olsem wanem sapos ol sumatin i sanap pinis i stap taim kain bung olsem i kirap? Long dispela kain taim, sapos yumi sanap yet i stap, bai dispela i no makim olsem yumi insait long dispela bung.
Orait olsem wanem sapos ol i askim Kristen long holim plak insait long klasrum o long narapela hap o long taim ol sumatin i mats wantaim bambai ol narapela i ken salut long en, tasol ol i no tokim em long salut long en? Sapos em i holim plak, bai em i no “stap longwe long pasin bilong lotu long ol giaman god” olsem Baibel i tok yumi mas mekim, nogat; bai em i insait tru long dispela bung. Na i wankain tu sapos em i insait long ol mats bilong litimapim kantri. Sapos em i mekim olsem, dispela bai makim olsem em i givim bel long dispela samting ol i givim ona long en insait long dispela mats, olsem na ol trupela Kristen i save bihainim maus bilong bel na ol i no mekim.
Taim ol i wokim musik bilong singsing bilong kantri, ol man i wanbel long dispela singsing ol i save kirap sanap na em tasol. Long kain taim olsem, ol Kristen i save sindaun i stap. Tasol sapos Kristen i sanap pinis na nau ol i kirapim singsing bilong kantri, orait em i no ken tingting long em i mas sindaun, long wanem, i no olsem em i bin kirap sanap long taim ol i kirapim dispela singsing. Tasol sapos ol i laik bai olgeta i mas sanap na singsing tu, orait taim Kristen i kirap sanap bilong soim rispek, tasol em i no singsing, dispela i no makim olsem em i wanbel long ol tok bilong singsing.
“Stap Stret Long Ai Bilong God”
Taim man bilong raitim song i stori pinis long ol imis i no inap helpim man liklik, em i tok: “Ol man i wokim ol giaman god, ol i ken kamap wankain olsem ol giaman god ol i bin wokim. Na ol manmeri i save bilip long ol giaman god, ol tu i ken kamap olsem.” (Song 115:4-8) Olsem na ol man i lotuim Jehova ol i no orait long holim wok mani long wanpela kampani em nambawan wok bilong en i bilong wokim plak bilong kantri na ol samting bilong adorim. (1 Jon 5:21) Na ating i gat sampela samting moa inap kamap long ples wok na ol Kristen i kamapim olsem ol i no save lotuim plak o samting plak i makim; ol i lotu long Jehova tasol.
Olsem: Ating bos i askim wokman long apim na daunim plak long haus bilong kampani. Wokman bai mekim o nogat, em samting em yet i mas skelim. Sapos wok bilong apim na daunim plak em i hap bilong wanpela bung we ol man i sanap o salut long plak, orait man i mekim dispela wok em i insait long ol samting bilong dispela bung.
Tasol sapos wokman i mas apim na daunim plak na i no gat bung bilong en, orait nau dispela wok bai i wankain long ol narapela wok ol i mekim long haus bilong kampani, olsem lokim na opim dua na pasim na opim windo. Long kain taim olsem, plak em mak tasol bilong Gavman, na wok bilong apim na daunim plak wantaim ol narapela wok bilong kampani, em samting man yet i mas tingim na bihainim maus bilong bel em Baibel i skulim pinis. (Galesia 6:5) Ating maus bilong bel bai kirapim man long askim bos long makim narapela wokman long apim na daunim plak. Tasol ating bel bilong narapela Kristen i no gat tok sapos em i mekim dispela wok na i no gat wanpela bung o bilaspasin bilong en. Tasol maski wanem wanem samting ol man i lotu tru long God i tingting long mekim, ol i mas “stap stret” long ai bilong God.—1 Pita 3:16.
I no gat sampela tok long Baibel i makim olsem ol Kristen i no ken go insait o wok insait long wanpela haus bilong gavman i gat plak bilong gavman i sanap long ples klia, olsem haus kaunsil na skul, nogat. Ating piksa bilong plak i stap tu long sampela stem na namba-plet bilong ka na sampela samting moa em gavman i wokim. Taim ol Kristen i mekim wok long ol dispela samting, dispela yet i no makim olsem ol i insait long sampela pasin bilong lotu, nogat. Long kain taim olsem, plak yet o piksa bilong en i no bikpela samting—pasin ol i mekim long en, dispela em i bikpela samting.
Sampela taim ol i putim plak long windo, dua, ka, tebol, o long sampela narapela samting. Na tu, piksa bilong plak i stap long sampela klos yumi baim. Long sampela kantri, i gat tambu long werim kain klos olsem. Tasol maski dispela i no brukim lo bilong gavman, sapos Kristen i werim kain klos olsem, dispela bai makim olsem em i stap olsem wanem long ol samting bilong dispela graun? Jisas Krais i tok long ol lain bilong em olsem: “Ol i no bilong dispela graun, olsem mi yet mi no bilong dispela graun.” (Jon 17:16) Na tu, Kristen i mas tingim samting dispela inap mekim long ol wanbilip. Nogut dispela i bagarapim maus bilong bel bilong sampela. Na tingting ol i bin pasim long bel long stap strong long bilip, nogut dispela tingting i no strong moa. Pol i tokim ol Kristen: “Skelim gut wanem ol samting i bikpela samting tru, na bai yupela i stap klin tru na i no pundaunim ol narapela.”—Filipai 1:10.
“Mekim Gutpela Pasin Long Olgeta Man”
Ol samting i wok long go moa nogut nau long dispela ‘taim bilong planti hevi nogut tru,’ olsem na ating pasin bilong givim bel tru long kantri em bai kamap strong moa. (2 Timoti 3:1) Ol man i laikim tru God ol i no ken lusim tingting olsem Jehova tasol inap kisim bek ol. Em inap tru long yumi lotuim em wanpela tasol. Taim ol i askim ol aposel bilong Jisas long mekim wanpela samting i no stret wantaim laik bilong Jehova, ol i tok: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:29.
Aposel Pol i tok: “Wokman bilong Bikpela i no ken tok pait na tok kros. Nogat. Em i mas mekim gutpela pasin long olgeta man.” (2 Timoti 2:24) Olsem na ol trupela Kristen i wok strong long stap isi na soim rispek na bihainim maus bilong bel em Baibel i skulim pinis taim ol i tingim ol samting ol yet bai mekim long pasin bilong salut long plak na mekim singsing bilong litimapim kantri.
[Piksa long pes 23]
Tripela Hibru i strong long mekim pasin God i laikim, tasol ol i mekim long gutpela pasin
[Piksa long pes 24]
Kristen i mas mekim wanem long taim bilong bung bilong litimapim kantri?