Ripot Bilong Jessica
JESSICA, em wanpela liklik meri long Amerika i gat 13-pela krismas, na tisa i givim wok long em wantaim ol narapela long klas long mekim wanpela tok i gat nem, “God, Plak, na Kantri.” Em i save, ol narapela sumatin i tingting planti, long wanem, em i wanpela bilong ol Witnes Bilong Jehova na em i no save salut long plak, olsem na Jessica i strongim bel long mekim wok long dispela rot bilong kamapim klia ol bilip bilong em. Em hia sampela hap bilong ripot em i bin mekim.
“Long olgeta de paslain long skul i kirap, olgeta sumatin i mas mekim ol tok bilong stap gut long plak, tasol mi no save mekim olsem, long wanem, mi bihainim ol lo na bilip bilong lotu bilong mi. Planti man i laik save i gat wanem as na mi save mekim olsem. Nau, bai mi tokim yupela.
“Namba wan tok ol i mekim bilong salut long plak em olsem: ‘Mi tok tru antap long stap gut long plak.’ Orait, dispela tok i makim wanem samting? Dispela tok i makim olsem yumi tok promis long sambai na stap gut na givim bel long wanpela samting. Mi bin tok promis long i stap gut na givim bel long God, olsem na mi no inap mekim wankain samting long plak. Taim mi no lotu o tok tru antap long stap gut long plak, dispela i no makim olsem mi save bikhet long plak, nogat.
“God i olsem bikpela samting long i stap bilong mi. Mi save wok strong long mekim ol samting bilong bihainim ol lo bilong em olsem i stap long Baibel. Olgeta de mi save beten long em, na mi save beten tu long taim mi laik bai em i ken helpim mi moa o strongim mi. Em i save helpim mi na strongim mi long taim stret. Mi kisim save olsem: Taim God i stap namba wan long i stap bilong mi na mi mekim ol samting em i laik yumi mekim, mi stap amamas moa.
“Olsem na maski mi no save salut long plak, mi save daun long en na mi no inap mekim wanpela samting bilong nogutim plak. Tasol mi mas stap gut na givim bel long God, na i stret mi mekim olsem, long wanem, em i bin wokim mi.”
Tisa i askim ol sumatin long klas bilong Jessica long skelim ol ripot ol i bin harim. Jessica i amamas tru, long wanem, long gutpela tok em i mekim, ol wanklas i tok, nau ol i save gut long ol bilip bilong em. Bikpela samting moa, taim ol yangpela i no pret long tokaut long ol lo bilong Baibel, ol i mekim God Jehova i belgut tru!—Sindaun 27:11.