Askim

Olsem wanem? I gat samting yumi inap mekim sapos wanpela Kristen God i bin makim em i sik na i hatwok long em i bung wantaim kongrigesen long mekim Kaikai Bilong Bikpela?

Yes. I gat samting yumi inap mekim na em i bikpela samting long yumi mas tingim ol Kristen God i bin makim em ol i sik na slip tasol long bet, na ol i no inap i go long Memorial bilong tingim indai bilong Krais. Taim kain samting olsem i kamap, lain elda i ken stretim rot long wanpela elda o wanpela strongpela brata Kristen i ken kisim sampela bret na wain bilong Memorial i go long dispela wanbilip long nait bilong Memorial paslain long san i kamap.

Elda o brata i go lukim dispela wanbilip, ating em i ken mekim sotpela tok na ritim ol skripsa i stret. Em i ken bihainim pasin Jisas i bin kamapim taim Em i kirapim bung bilong Kaikai Bilong Bikpela. Olsem: Em i ken ritim Matyu 26:26 na tilim bret i no gat yis bihain long wanpela beten. Bihain em i ken ritim Matyu 26:​27, 28 na tilim wain bihain long wanpela beten. Em i ken stori liklik long ol samting bret na wain i makim, na mekim beten bilong pinisim dispela liklik bung.

Tru, em i bikpela samting long man i mas wok strong tru long bung wantaim kongrigesen taim ol i mekim Kaikai Bilong Bikpela. Tasol olsem wanem sapos wanpela Kristen God i bin makim em i gat bikpela sik tru, o em i stap long haus sik, o sampela samting i pasim em long mekim Memorial taim san i go daun pinis long Nisan 14? Dispela Kristen God i bin makim, em i ken bihainim pasin olsem Lo Bilong Moses i makim na 30 de bihain long Memorial em i ken mekim.​​—⁠Namba 9:​9-​14.